(ភ្នំពេញ)៖ លោក ហ្សង់-ហ្វ្រង់ស័រ តាន់ អ្នកគ្រប់គ្រងការផ្សាយជាខេមរភាសារបស់វិទ្យុបារាំង RFI បានប្រកាសលាឈប់ពីការងារ ក្រោយបម្រើការងារអស់រយៈពេលប្រមាណ ៣០ឆ្នាំ។
ការលាឈប់របស់លោក ហ្សង់-ហ្វ្រង់ស័រ តាន់ អ្នកសារព័ត៌មានភូមិសាស្ត្រនយោបាយដ៏ល្បាញល្បីរូបនេះ បង្កឱ្យមានការភ្ញាក់ផ្អើលជាខ្លាំង។
លោក ហ្សង់ ហ្វ្រង់ស័រ តាន់ បានបញ្ជាក់ដូច្នេះ «ខ្ញុំបានជូនដំណឹងស្តីពីការចាកចេញរបស់ខ្ញុំដល់លោកស្រីប្រធានអគ្គនាយកនៃស្ថាប័ន នៅទីក្រុងប៉ារីសប្រទេសបារាំង ក្នុងថ្ងៃទី១៥ ខែមីនា កាលពីជាងបួនខែមុន។ ប៉ុន្តែគាត់បានស្នើខ្ញុំឱ្យបន្តកិច្ចការរហូតដល់ចុងខែសីហា ដើម្បីកែទម្រង់ការផ្សាយជាខេមរភាសា ដោយត្រូវឆ្លងចេញពីការផ្សាយតាមវិទ្យុទៅកាន់ការផ្សាយតាមប្រពន្ធ័ឌីជីថលទាំងស្រុង ជាអាទិ៍តាមហ្វេសប៊ុក (Facebook)។ កាងារទាំងនេះ ចប់ដាច់ស្រេចអស់ហើយ»។
លោកបន្តថា «ក្នុងពេលនេះ ទោះជាត្រូវនៅបន្តកិច្ចការបន្តិចបន្តួចនៅវិទ្យុ RFI រហូតដល់ចុងខែសីហា ក្តី ក៏ខ្ញុំសូមឆ្លៀតពេលសរសេរថ្លែងអំណរគុណនិងសរសេរលាឱ្យហើយប្រិយមិត្តទាំងអស់ដែលគាំទ្រខ្ញុំបាទ ជាយូរឆ្នាំកន្លងមកហើយ…»។
ក្នុងសារជម្រាបលាពីប្រិយមិត្តអ្នកស្តាប់ លោក បានបញ្ជាក់ថា លោកមិនភ្លេចទេ ប្រិយមិត្តអ្នកគាំទ្រដំបូងគេបង្អស់នៅប៉ារីស និងជាយក្រុងប៉ារីសដែល ពីឆ្នាំ១៩៩៣ ដល់ឆ្នាំ២០០៥ តាមដានស្តាប់វិទ្យុ RFI តាមរលកអាកាសមធ្យមOM។ លោក ក៏មិនភ្លេចទេ ប្រិយមិត្តអ្នកគាំទ្រនៅកម្ពុជាដែលពីឆ្នាំ២០០៥ ដល់ឆ្នាំ២០២៣ តាមដានស្តាប់វិទ្យុRFIតាមរលកអាកាសFM។
លោក ក៏មិនភ្លេចផងដែរ ចំពោះប្រិយមិត្តអ្នកគាំទ្រនៅគ្រប់ជ្រុងជ្រោយ ក្នុងពិភពលោកដែលក្នុងរយៈពេលប៉ុន្មានឆ្នាំចុងក្រោយនេះ តាមដានស្តាប់វិទ្យុ RFI តាមប្រព័ន្ធឌីជីថល ពិសេស Facebook និងYouTube។ លោក បានសម្តែងការដឹងគុណចំពោះការគាំទ្រ និងសេចក្តី ស្រឡាញ់ទាំងអស់នេះ។
លោក ហ្សង់-ហ្វ្រង់ស័រ តាន់ បានឱ្យដឹងថា ចាប់ពីថ្ងៃទី១ ខែកញ្ញាខាងមុខនេះតទៅ លោក សេង ឌីណា និងលោក គួច គុន្ធារ៉ា នឹងដើរតួនាទីជាអ្នកដឹកនាំវិទ្យុ RFI ជាខេមរភាសា គ្រប់គ្រងក្រុមការងារនៅប៉ារីស និងនៅភ្នំពេញ។
បើទោះបីជាយ៉ាងណា លោក ហ្សង់-ហ្វ្រង់ស័រ តាន់ មិនបង្ហាញពីមូលហេតុនៃការលាឈប់នេះ ហើយក៏មិនទាន់បង្ហាញផងដែរថា លោកនឹងធ្វើអ្វីជាបន្តទៀត៕
