(កំពង់ស្ពឺ)៖ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានប្រកាសជាសាធារណៈឲ្យដឹងថា ចាប់ពីថ្ងៃនេះតទៅ នឹងមានយុទ្ធនាការចែកស្លាកសញ្ញា សុវត្ថិភាព (ចំណាំងផ្លាត) ជាង ៣លាន៤សែន ដល់ប្រជាពលរដ្ឋ។ សម្តេចតេជោ ហ៊ុន សែន បានប្រកាសបែបនេះ ខណៈសម្តេចថ្លែងនៅក្នុងពិធី សម្ពោធដាក់ឱ្យ ប្រើប្រាស់ផ្លូវជាតិលេខ៤៤ នៅក្នុងខេត្តកំពង់ស្ពឺ នាព្រឹកថ្ងៃទី០២ ខែសីហា ឆ្នាំ២០១៦នេះ ។

សម្តេចតេជោ ហ៊ុន សែនបានប្រកាសខ្លាំងៗថា ប្រសិនបើមានអ្នកណាម្នាក់ យកស្លាកសុវត្ថិភាពទៅលក់ជូនប្រជាពលរដ្ឋក្នុងតម្លៃណាមួយ ត្រូវឃាត់ខ្លួននៅនឹង កន្លែងពី ព្រោះស្លាកសុវត្ថិភាពនេះ គឺចែកជូនដោយឥតគិតថ្លៃដល់ប្រជាពលរដ្ឋទូទាំងប្រទេស។

សម្តេចតេជោបន្តប្រកាសថា «កុំចាំរហូតដល់ប្រជាពលរដ្ឋ២០០-៣០០នាក់ ទើបចែកជូនពលរដ្ឋ, ត្រូវចែកមួយៗតែម្តង កុំចាំទុកច្រើនទើបចែក»។

ក្រៅពីការលើកឡើងខាងលើនេះ សម្តេចតេជោ ហ៊ុន សែន បានព្រមានដល់អាជ្ញាធរ ដែលប្រមូលប្រជាពលរដ្ឋបានច្រើន ទើបចែកអត្តសញ្ញាណបណ្ណជូនពួក គាត់ ហើយផ្សាយតាមទូរទស្សន៍ ដើម្បីឱ្យនាយករដ្ឋមន្រ្តីឃើញ, នោះសម្តេចមិនសរសើរនោះទេ គឺជេរតែម្តង។ សម្តេចថាការធ្វើបែបនេះគឺខាតពេលវេលារបស់ប្រជាពលរដ្ឋ។ សម្តេចជំរុញឱ្យអាជ្ញាធរយកអត្តសញ្ញាណបណ្ណប្រគល់ ជូនប្រជាពលរដ្ឋដល់គេហដ្ឋាន។

សូមជំរាបថា ប្រជាពលរដ្ឋទូទាំងប្រទេសដែលប្រើប្រាស់គោយន្ត រឺម៉កម៉ូតូ កង់ និង រទេះគោដែលគ្មានភ្លើងបំភ្លឺនៅពេលយប់ នឹងទទួលបានស្ទីគ័រសុវត្ថិភាព (ចំណាំងផ្លាត) សម្រាប់បិទការពារ គ្រោះថ្នាក់ចរាចរណ៍នៅពេលយប់ ពីក្រសួងសាធារណការ និងដឹកជញ្ជូន ដោយឥតគិតថ្លៃ ដើម្បីបញ្ជៀសរាល់គ្រោះថ្នាក់ចរាចរណ៍ ជាយថាហេតុ ដែលកន្លងមកគ្រោះថ្នាក់ភាគច្រើន កើតឡើងទៅលើគោយន្ត ដែលសារតែគ្មានភ្លើងបំភ្លឺ។ គ្រោះថ្នាក់ចរាចរណ៍ភាគច្រើនកើតឡើងដោយសារការមើល មិនឃើញនៅពេលយប់ ដូច្នេះពេលបិទស្ទីគ័រនេះ ទៅវានឹងមានពន្លឺចំណាំងផ្លាត ពេលឡានបើកទៅនឹងអាចដឹងថា មានគោយន្តមានរឹម៉កម៉ូតូ កង់ និង រទេះគោជាដើម វានឹងអាចបញ្ជៀសបាននូវគ្រោះថ្នាក់៕

សូមទស្សនា និងស្តាប់ប្រសាសន៍សម្តេចតេជោ ហ៊ុន សែន៖