(ភ្នំពេញ)៖ គ្រួសារមានកូនតូចៗ៦នាក់ ដែលត្រូវបានម្ចាស់បុរីដេញចេញពីផ្ទះ ព្រោះតែអត់មានលុយបង់រំលស់នោះ ពេលនេះបានត្រឡប់ចូលទៅរស់នៅក្នុងផ្ទះរបស់ខ្លួនវិញហើយ ជាមួយក្តីរំភើប និងត្រេកអរគ្មានអ្វីមកប្រៀបផ្ទឹមនោះឡើយ។
លោក ធុច តួ និងភរិយា ព្រមទាំងកូនតូចៗ៦នាក់ ត្រូវបានលោក មិន គឹមសាន ម្ចាស់បុរីសែនមនោរម្យ រឹបអូសយកផ្ទះត្រឡប់ទៅវិញ ព្រោះតែខកខានបង់រំលស់ថ្លៃផ្ទះអស់ពេលជាង៣ឆ្នាំចុងក្រោយនេះ។ លោក ធុច តួ និងភរិយា ព្រមទាំងកូនៗ ត្រូវបានបណ្តេញចេញពីផ្ទះអស់រយៈពេលជិត៦ខែមកហើយ។ លោកបានព្យាយាមស្វះស្វែងរកកិច្ចអន្តរាគមន៍ និងសម្របសម្រួលជាច្រើន ជាមួយម្ចាស់បុរី ដើម្បីបានចូលទៅរស់នៅក្នុងផ្ទះនោះវិញ។ តែការស្វះស្វែងរកកិច្ចអន្តរាគមន៍នោះ មិនទាន់មានពន្លឺនៃដំណោះស្រាយអ្វីនោះឡើយ។
បន្ទាប់ពីព័ត៌មានត្រូវបានផ្សព្វផ្សាយនៅ Fresh News ហើយបានជ្រាបដល់សម្តេចតេជោ ហ៊ុន សែន នាយករដ្ឋមន្ត្រីកម្ពុជាហើយនោះ សម្តេចតេជោ ក៏បានណែនាំទៅលោក ឃួង ស្រេង អភិបាលរាជធានីភ្នំពេញ ជួបជជែកជាមួយម្ចាស់បុរី និងម្ចាស់ផ្ទះ ស្វែងរកដំណោះស្រាយ ដែលអាចទទួលបានទាំងអស់គ្នា។
ក្រោមការណែនាំនេះ នៅព្រឹកថ្ងៃចន្ទ ទី៣១ ខែកក្កដា ឆ្នាំ២០២៣ លោកអភិបាលរាជធានីភ្នំពេញ បានហៅម្ចាស់បុរី និងម្ចាស់ទៅជជែកគ្នា ហើយក៏ឈានដល់ការយោគយល់ និងអនុគ្រោះឱ្យគ្នាទៅវិញទៅមក។ ម្ចាស់បុរី ក៏បានអនុញ្ញាតឱ្យលោក ធុច តួ នាំភរិយា និងកូនៗត្រឡប់ចូលទៅរស់នៅក្នុងផ្ទះរបស់ខ្លួនវិញ។
ការឃ្លាតឆ្ងាយពីផ្ទះធ្លាប់រស់នៅយ៉ាងសុខសាន្តរយៈពេលជាង៥ខែ បានធ្វើឱ្យលោក ធុច តួ និងភរិយា ព្រមទាំងកូនតូចៗនោះ នឹករលឹកផ្ទះជាខ្លាំង។ លោក ធុច តួ និងភរិយា ព្រមទាំងកូនៗ មិននឹកស្មានថា ខ្លួនមានឱកាសបានត្រឡប់មករស់នៅក្នុងផ្ទះវិញនោះឡើយ។
បន្ទាប់ពីទទួលបានការសម្របសម្រួលលោក ធុច តួ មិនបង្អង់យូរនោះឡើយ គ្រាន់តែចេញពីសាលារាជធានីភ្នំពេញភ្លាម លោក ក៏បាននាំភរិយា និងកូនៗទាំង៦នាក់ ត្រឡប់ទៅកាន់លំនៅឋានរបស់ខ្លួនវិញ។ ផ្ទះជាតម្រូវការដ៏ចាំបាច់សម្រាប់មនុស្សគ្រប់រូប ដើម្បីជាជម្រកជីវិត។ លោក ធុច តួ និងភរិយា ព្រមទាំងកូនៗ បានបង្ហាញស្នាមញញឹមយ៉ាងពព្រាយ នៅពេលបានត្រឡប់ចូលជម្រករបស់ខ្លួន។
ទាំងលោក ធុច តួ ភរិយា និងកូនៗ បង្ហាញក្តីរីករាយឥតឧបមា។ លោក ធុច តួ បានគោរពថ្លែងអំណរគុណយ៉ាងជ្រាលជ្រៅជូនចំពោះសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ព្រមទាំងលោកអភិបាលរាជធានីភ្នំពេញ ដែលបានចេញមុខសម្របសម្រួលជាមួយម្ចាស់បុរីឱ្យលោកបានត្រឡប់ចូលទៅរស់នៅក្នុងផ្ទះវិញ។
លោក ធុច តួ បានលើកឡើងថា ការជួយរបស់សម្តេចតេជោ និងសម្តេចកិត្តិព្រឹទ្ធបណ្ឌិត ជាគុណបំណាច់ដ៏មហាសាលសម្រាប់លោក និងគ្រួសារ ហើយពេញមួយជីវិតរបស់លោកនឹងមិនភ្លេចនូវគុណបំណាច់មួយនេះឡើយ។
សូមបញ្ជាក់ថា លោក ធុច តួ បានទិញផ្ទះនៅក្នុងបុរីខាងលើកាលពីឆ្នាំ២០១៥ តម្លៃជិត ៣ម៉ឺនដុល្លារ ហើយត្រូវបង់រំលស់ក្នុងមួយខែជិត ៤០០ដុល្លាររយៈពេលជាង ១០ឆ្នាំ។
លោក ធុច តួ បានចូលមករស់នៅក្នុងផ្ទះខាងលើប្រមាណជាង៦ឆ្នាំ និងបង់រំលស់បានរយៈពេលប្រមាណជា៥ឆ្នាំផងដែរ។ វិបត្តិជំងឺកូវីដ១៩ សង្គ្រាមនៅអ៊ុយក្រែន និងការប្រជែងឥទ្ធិពលរបស់ប្រទេសមហាអំណាច បានជះឥទ្ធិពលអាក្រក់ដល់សេដ្ឋកិច្ចនៅកម្ពុជា ហើយលោក ធុច តួ ដែលជាជាងកញ្ចក់ និងរត់ម៉ូតូកង់៣ ក៏បានប៉ះពាល់ចំណូលប្រចាំថ្ងៃផងដែរ។ លោក ធុច តួ លែងមានលទ្ធភាពបង់ប្រាក់រំលស់ជូនទៅបុរីដូចក្នុងកិច្ចសន្យា ដែលជាហេតុនាំឱ្យម្ចាស់បុរីរឹបអូសយកផ្ទះទៅវិញ។
ការទុកផ្ទះចោលជិត៦ខែ ក្នុងផ្ទះត្រូវស្រោមដោយធូលី និងសំបុកពីងពាង។ ពេលមកដល់ផ្ទះ លោក ធុច តួ និងកូនៗនាំគ្នាបោសសំអាតផ្ទះ ដើម្បីរស់នៅប្រកបដោយភាពដោយស្នាមញញឹម៕
