(ភ្នំពេញ)៖ លោក ឃួង ស្រេង អភិបាលនៃគណៈអភិបាលរាជធានីភ្នំពេញនៅចុងសប្តាហ៍នេះ បានទទួលសៀវភៅ «មរតកស៊ីហ្គេម និងអាស៊ានប៉ារ៉ាហ្គេម លើកដំបូងនៅកម្ពុជា ក្នុងសម័យតេជោ» ចំនួន ១០០ច្បាប់ ពីអ្នកនិពន្ធ ឆាយ សុផល ដើម្បីចែកជូនមន្ត្រីរាជការក្រោមឱវាទ ទុកជាឯកសារនៅក្នុងប្រវត្តិសាស្រ្តមហាកីឡាទាំងនៅកម្ពុជា និងក្នុងតំបន់។
សូមរម្លឹកថា លោក ឃួង ស្រេង គឺជាអភិបាលរាជធានីភ្នំពេញដំបូងគេ នៅក្នុងប្រវត្តិសាស្រ្ត នៃមេដឹកនាំរាជធានីភ្នំពេញមុនៗ ដែលបានកាន់ និងដង្ហែភ្លើងគប់កីឡាថ្នាក់អន្តរជាតិជាមួយមន្ត្រីមួយចំនួនទៀតនៃរដ្ឋបាលរាជធានី តំណាងឱ្យអ្នករស់នៅក្នុងរាជធានីភ្នំពេញ។
នៅក្នុងរយៈពេលកាន់តំណែងជាអភិបាលនៃគណៈអភិបាលរាជធានីភ្នំពេញ ក្រោមម្លប់សន្តិភាពពេញលេញ និងជាសេនាធិការរបស់រាជរដ្ឋាភិបាលដឹកនាំដោយសម្តេចតេជោ ហ៊ុន សែន នាយករដ្ឋមន្ត្រីកម្ពុជា លោក ឃួង ស្រេង មានភារៈទទួលខុសត្រូវយ៉ាងធំធេង ក្នុងការថែរក្សាទាំងសន្តិសុខ សណ្នាប់ធ្នាប់សាធារណៈ បរិស្ថាន និងសោភណភាពរាជធានី ដែលជាបេះដូងរបស់ប្រទេស ក្នុងកិច្ចសហការយ៉ាងជិតស្និទ្ធជាមួយមន្ត្រី និងស្ថាប័នពាក់ព័ន្ធ។
មិនមែនមានតែលោក ឃួង ស្រេង និងមន្ត្រីរដ្ឋបាលរាជធានីភ្នំពេញប៉ុណ្ណោះទេ គឺមានអភិបាល និងមន្ត្រីរដ្ឋបាលខេត្តជាច្រើនរូបទៀត ពិសេសខេត្តនៅជុំវិញបឹងទន្លេសាប និងខេត្តឆ្លងកាត់ ក៏មានឱកាសបានកាន់ និងដឹកនាំដង្ហែភ្លើងគប់កីឡាជាលើកដំបូងរបស់ខ្លួនដែរ ហើយរូបថតរបស់ពួកគាត់ក៏មាននៅក្នុងសៀវភៅនេះទៀតផង។
សៀវភៅ «មរតកស៊ីហ្គេម និងអាស៊ានប៉ារ៉ាហ្គេម លើកដំបូងនៅកម្ពុជា ក្នុងសម័យតេជោ» ត្រូវបានចងក្រងដោយលោក ឆាយ សុផល អ្នកសារព័ត៌មានជើងចាស់ និងជាគ្រូឧទ្ទេសផ្នែកសារព័ត៌មាន នៅសាកលវិទ្យាល័យមួយចំនួនផង ត្រូវបានសម្ពោធជាផ្លូវការកាលពីថ្ងៃទី២១ ខែកក្កដា កន្លងទៅ ក្រោមអធិបតីភាពរបស់លោក ខៀវ កាញារីទ្ធ រដ្ឋមន្រ្តីក្រសួងព័ត៌មាន។
សៀវភៅក៏បានបង្ហាញពីរឿងរ៉ាវក្រៅឆាកខ្លះៗអំពីកីឡាដោយមានការទាក់ទិននឹងមនោគមន៍វិទ្យា និងការយកប្រៀបលើភូមិសាស្រ្តនយោបាយរបស់ប្រទេសមហាអំណាចនៅពេលសង្គ្រាមត្រជាក់ចាប់ផ្តើម ដែលបែងចែកពួកស្តាំនិយម (ពួកប្លុកសេរី) និងឆ្វេងនិយម (ពួកប្លុកកុម្មុយនីស្ត) ហើយចាប់តាំងពីកីឡាទាំងពីរនេះ ត្រូវបានបង្កើតឡើងជាផ្លូវការ កម្ពុជាមិនដែលបានរៀបចំធ្វើម្តងណាឡើយ រហូតមកដល់ឆ្នាំ២០២៣ ទើបមានឱកាស។
ប្រសាសន៍របស់សម្តេចតេជោ ហ៊ុន សែន ដែលលើកឡើងថា កម្ពុជា ជាប្រទេសតូច តែបេះដូងធំ ហើយលុយអាចចាយអស់ តែកិត្តិយស និងកេរ្តិ៍ឈ្មោះ ចាយមិនអស់ឡើយ ហើយបន្សល់ទុកឱ្យកូនចៅជំនាន់ក្រោយៗបានដឹងទៀតផង គឺពិតជាមាតម្លៃ និងមានខ្លឹមសារគ្រប់គ្រាន់បង្ហាញពីឧត្តមភាពនៃកម្ពុជា។
លោក ឆាយ សុផល បានអត្ថាធិប្បាយថា កម្ពុជាអាចរៀបចំព្រឹត្តិការណ៍ដ៏អស្ចារ្យទាំងពីរនេះ បាន ដោយធ្វើឱ្យប្រទេសទាំងនៅក្នុងតំបន់ និងនៅពិភពលោកមានការស្ញប់ស្ញែង នឹកស្មានមិនដល់នោះ ក៏ដោយសារតែកម្ពុជាមានសន្តិភាពពេញលេញ អាចរក្សាបានសណ្តាប់ធ្នាប់ និងសុខសុវត្ថិភាពជូនអត្តពលិក និងភ្ញៀវបរទេស ព្រមទាំងមានហេដ្ឋារចនាសម្ព័ន្ធគ្រប់គ្រាន់សម្រាប់បម្រើការប្រកួតកីឡាខ្នាតអន្តរជាតិ ដោយមិនចាញ់បណ្តាប្រទេសនៅជុំវិញពិភពលោកនោះទេ ហើយល្អជាងប្រទេសជាច្រើនទៀតផង។
ពាក្យស្លោក «កីឡារស់ក្នុងសន្តិភាព» និង «សន្តិភាពដើម្បីទាំងអស់គ្នា ទាំងអស់គ្នាដើម្បីសន្តិភាព» ដែលរាជរដ្ឋាភិបាលកម្ពុជាក្រោមការដឹកនាំរបស់ សម្តេចតេជោ បានប្រកាន់យក គឺស្របពេលដែលពិភពលោកកំពុងជួបវិបត្តិសេដ្ឋកិច្ចចេញពីសង្រ្គាមរវាងរុស្ស៊ី និងអ៊ុយក្រែន ហើយមានការលូកដៃពីអង្កការណាតូ និងសម្ព័ន្ធមិត្ត ខណៈជំងឺរាតត្បាត កូវីដ-១៩ ជាសកលនៅតែបន្ត ហើយបញ្ហាប្រែប្រួលអាកាសធាតុជាក្តីបារម្ភដ៏ធំរបស់ពិភពលោក។ ទាំងនេះគឺជាភាពជោគជ័យមហាធំធេង ហើយបាននាំកិត្យានុភាព និងឧត្តមភាព នៃប្រទេសទៅលើឆាកអន្តរជាតិ ក្នុងនាមជាម្ចាស់ផ្ទះនៃព្រឹត្តិការណ៍កីឡាទាំងពីរខាងលើ៕
