(ព្រះសីហនុ)៖ រដ្ឋបាលខេត្តព្រះសីហនុ នៅព្រឹកថ្ងៃទី២៨ ខែកក្ដដា ឆ្នាំ២០២៣ បានបើកកិច្ចប្រជុំសម្របសម្រួល ជាមួយប្រជាពលរដ្ឋប្រមាណជាង២០គ្រួសារ ពាក់ព័ន្ធទៅនឹងការចូលកាន់កាប់ដីធ្លីដោយខុសច្បាប់របស់ក្រុមហ៊ុន កាណាឌីយ៉ា នៅចំណុចអូត្រាវ ឃុំបិត្រាំង ស្រុកព្រៃនប់ ខេត្តព្រះសីហនុ។

ដំណើរនៃកិច្ចប្រជុំមានការចង្អុលបង្ហាញពីលោក គួច ចំរើន អភិបាលខេត្តព្រះសីហនុ ដឹកនាំដោយលោក ប៊ូ វឌ្ឍនា នាយកទីចាត់ការអន្តរវិស័យ សាលាខេត្តព្រះសីហនុ និងបានសហការអាជ្ញាធរ មានសមត្ថកិច្ច តំណាងប្រជាពលរដ្ឋ និងប្រជាពលរដ្ឋជាង១០គ្រួសារ ក្នុងចំណោម២៦គ្រួសារបានចូលរួម នៅសាលប្រជុំសាលាខេត្តព្រះសីហនុ។

កន្លងមករដ្ឋបាលខេត្តព្រះសីហនុ បានធ្វើការសម្របសម្រួល និងដោះស្រាយបញ្ហាទំនាស់ដីធ្លីនេះក្រៅប្រព័ន្ធតុលាការជាបន្តបន្ទាប់រួចមកហើយដែរ ជាលទ្ធផលប្រជាពលរដ្ឋប្រមាណ ៨៥% បានឯកភាពទទួលយកគោលការណ៍ដោះស្រាយរបស់ធនាគារកាណាឌីយ៉ា ដោយយល់ព្រមទទួលយកដីឡូត៍ទំហំ ៥ម៉ែត្រ គុណ ២០ម៉ែត្រ និងយល់ព្រមរុះរើសំណង់ផ្សេងៗ និងរបងថ្ម ចេញពីទីតាំងដីខាងលើដោយស្ម័គ្រចិត្ត។

ប្រជាពលរដ្ឋដែលបានឯកភាពខាងលើ រដ្ឋបាលខេត្តព្រះសីហនុ បានសម្របសម្រួលបំពេញបែបបទឯកសារជូន ដើម្បីត្រៀមចុះបញ្ជីទទួលយកប័ណ្ណកម្មសិទ្ធិដីលើទីតាំងដីឡូត៍ដែលធនាគារបានរៀបចំជូន។ ក្នុងនោះនៅថ្ងៃទី០៨ ខែមិថុនា ឆ្នាំ២០២៣កន្លងទៅនេះ រដ្ឋបាលខេត្តព្រះសីហនុ បានរៀបចំពិធីចាប់ឆ្នោត និងប្រគល់លេខដីឡូត៍ ជូនប្រជាពលរដ្ឋដែលយល់ព្រមតាមគោលការណ៍ដោះស្រាយរបស់ ធនាគារកាណាឌីយ៉ារួចរាល់។ ដោយឡែកនៅតែប្រមាណជាង២០គ្រួសារតែប៉ុណ្ណោះ នៅមិនទាន់យល់ព្រមទទួលយក។

ក្នុងនាមរដ្ឋបាលខេត្ត ក៏ដូចជាអាជ្ញាធរពាក់ព័ន្ធនៅតែព្យាយាមពន្យល់ណែនាំ សម្របសម្រួល និងនៅតែបន្តដោះស្រាយតាមគោលនយោបាយឈ្នះៗ ជាក់ស្តែងនៅព្រឹកនេះប្រជាពលរដ្ឋជាង១០គ្រួសារ ក្នុងចំណោម២៦គ្រួសារ បានមកចូលរួមក្នុងកិច្ចប្រជុំ ដើម្បីស្តាប់ការណែនាំសម្របសម្រួលពីមន្ត្រីជំនាញនៃរដ្ឋបាលខេត្តព្រះសីហនុ។

ក្រោយការពិនិត្យស្រាវជ្រាវរបស់ក្រុមការងារបានរកឃើញថា ការចូលកាន់កាប់រស់នៅរបស់ប្រជាពលរដ្ឋ គឺជាការចូលទន្ទ្រានលើដីកម្មសិទ្ធិឯកជនរបស់អ្នកដទៃ តាមរយៈក្រុមមេខ្យល់មួយក្រុមដែលបាន ធ្វើសកម្មភាពចាប់ដីខាងលើលក់បន្តឲ្យទៅប្រជាពលរដ្ឋផ្សេងទៀតក្នុងតម្លៃទាប។ បន្ទាប់មកក្រុមមេខ្យល់នេះ បានកៀរគរប្រមូលប្រាក់ពីប្រជាពលរដ្ឋដែលបានទិញដីខាងលើ ដោយអះអាងថាយកប្រាក់ទាំងនេះទៅរត់ការធ្វើប័ណ្ណកម្មសិទ្ធិជូនប្រជាពលរដ្ឋ។

ចំពោះក្រុមមេខ្យល់ដែលធ្វើសកម្មភាពខាងលើនេះ ត្រូវបានក្រុមការងារស្រាវជ្រាវទំនាស់ដីធ្លី នៃស្នងការដ្ឋាននគរបាលខេត្តព្រះសីហនុ បានកំណត់មុខសញ្ញារួចរាល់ហើយផងដែរ ក្នុងនោះមានចំនួន៣នាក់ ដូចខាងក្រោម៖

*ទី១៖ ឈ្មោះ សុក ពឿន
*ទី២៖ ឈ្មោះ យស់ សាវ៉ាត
*ទី៣៖ ឈ្មោះ សួង ផល្លា

តាមការបញ្ជក់របស់រដ្ឋបាលខេត្តព្រះសីហនុ នៅក្នុងសេចក្តីប្រកាសព័ត៌មាន បានក្រើនរំលឹកដល់បងប្អូនប្រជាពលរដ្ឋ បើនៅតែបន្តធ្វើសកម្មភាពល្មើសច្បាប់ រដ្ឋបាលខេត្តព្រះសីហនុ នឹងអនុវត្តវិធានការច្បាប់យ៉ាងម៉ឺងមាត់ដោយគ្មានការលើកលែងចំពោះបងប្អូន និងមេខ្លោងទាំងឡាយណាដែលព្យាយាមញុះញង់ឲ្យមានការទន្រ្ទានកាន់កាប់ដីដោយខុសច្បាប់ យកមកផ្តន្ទាទោសឲ្យខានតែបាន៕