(ភ្នំពេញ)៖ ដើម្បីបន្តការព្រមានដ៏ធ្ងន់ៗពីសំណាក់សម្តេចតេជោ ហ៊ុន សែន ចំពោះអ្នកលេង Facebook ម្នាក់ជាជនជាតិវៀតណាម ដែលបាន Comment ថា (លោកហ៊ុនសែនក្បត់វៀតណាម), នៅរសៀលថ្ងៃទី០១ ខែសីហា ឆ្នាំ២០១៦នេះ សម្តេចតេជោ បានបង្ហោះឡើងវិញ នូវសារព្រមានខ្លាំងៗដែលមើលងាយ ជាតិសាសន៍របស់ខ្មែរ បន្ទាប់ពីបុគ្គលឈ្មោះ Phạm Đức Hiển បានលុប Comment របស់ខ្លួន ដោយជាប់ជាមួយនឹងសាររបស់នាយករដ្ឋមន្រ្តី។

នៅរសៀលថ្ងៃនេះ សម្តេចនាយករដ្ឋមន្រ្តី បានបង្ហោះឡើងវិញនូវខ្លឹមសារទាំងស្រុងយ៉ាងដូច្នេះថា៖

«កាលពីម្សិលមិញ នៅពេលខ្ញុំបានចូលរួមផ្តល់ពានរង្វាន់ដល់ជ័យលាភីក្នុងកម្មវិធី «ខ្ញុំជាយុវជនគំរូកម្ពុជា» លើក ទី៦ មានអ្នកលេង Facebook ឈ្មោះ Phạm Đức Hiển បានចូលមក Comment ក្នុង Page ខ្ញុំថា (លោកហ៊ុនសែនក្បត់វៀតណាម)។ កាលពីយប់មិញខ្ញុំបាន Comment ឆ្លើយតបទៅបុគ្គលនោះវិញ។ តែមកទល់ថ្ងៃនេះ បុគ្គលនោះបានលុប Comment ខ្លួនចោលអស់រួមទាំងមតិយោបល់ប្រជាពលរដ្ឋខ្មែរផងដែរ។ ខ្ញុំសូម Post ចម្លើយទាំងស្រុងរបស់ខ្ញុំ​ ជូនជនរួមជាតិដូចខាងក្រោម។

ហេតុអ្វីបានជាលោកនិយាយថា ខ្ញុំក្បត់វៀតណាម? តើវៀតណាមជាឪពុកខ្ញុំឬជាមហាក្សត្រខ្ញុំឬ? លោកត្រូវដឹងថាអ្នកដែលខ្ញុំត្រូវស្មោះត្រង់គឺជាតិខ្មែរបស់ខ្ញុំ ព្រះមហាក្សត្រកម្ពុជា ជាទីសក្ការះរបស់ខ្ញុំ និងភរិយាជាទីស្រឡាញ់របស់ខ្ញុំ។ វៀតណាមមិនមែនជាចៅហ្វាយរបស់ខ្ញុំដែលខ្ញុំត្រូវស្មោះត្រង់នោះទេ។ បើលោកជាជនជាតិវៀតណាម រស់នៅកម្ពុជាស្របច្បាប់ ត្រូវគោរពច្បាប់កម្ពុជា បើរស់នៅមិនស្របច្បាប់ត្រូវចាកចេញពីកម្ពុជា និងបើរស់នៅវៀតណាម សុំស្រឡាញ់មេដឹកនាំវៀតណាមទៅ។

ខ្ញុំជាមេដឹកនាំកម្ពុជាដែលមានឯករាជ្យ អធិបតេយ្យភាពដែលត្រូវទំនាក់ទំនងជាមួយមេដឹកនាំវៀតណាមដោយស្មើភាព និងស្មើសិទ្ឋិ។ សុំលោកបញ្ជូនសារនេះជូន មេដឹកនាំវៀតណាមផងបើលោកជាជនជាតិវៀតណាមត្រឹមត្រូវមែន ព្រោះខ្ញុំស្គាល់ច្បាស់ចរិតមេដឹកនាំវៀតណាមតែងគោរពនូវឯករាជ្យ អធិបតេយ្យភាព របស់កម្ពុជា ខុសពីអាម៉ីអាថោងដូចលោកនេះឯង»។

សូមជំរាបថា កាលពីយប់មិញបន្ទាប់ពីមានការឆ្លើយតបដោយសារព្រមានខ្លាំងៗទៅលើ Comment មួយរបស់ម្ចាស់ Facebook មានឈ្មោះ «Phạm Đức Hiển» ពីសំណាក់ប្រមុខរាជរដ្ឋាភិបាលកម្ពុជា មានបងប្អូនប្រជាពលរដ្ឋទាំងក្នុង និងក្រៅប្រទេសយ៉ាងច្រើនអនេក បាននាំគ្នាសម្តែងការអបអរសាទរ និងគាំទ្រពេញទំហឹងចំពោះការព្រមាន របស់សម្តេចតេជោ ទៅលើអ្នកលេង Facebook ជនជាតិវៀតណាមមួយនេះ៕