(ភ្នំពេញ)៖ សមាគមតន្ត្រីសំនៀងជនពិការ បានបង្ហាញការពេញចិត្តជាខ្លាំងចំពោះការបោះឆ្នោតជ្រើសតាំងតំណាងរាស្ត្រនីតិកាលទី៧ ដែលប្រព្រឹត្តទៅកាលពីថ្ងៃអាទិត្យ ទី២៣ ខែកក្កដា កន្លងទៅនេះ។ សមាគម បានកត់សម្គាល់ថា ការបោះឆ្នោតនេះប្រព្រឹត្តទៅក្នុងបរិយាកាសល្អ គ្មានអំពើហិង្សា គ្មានការបំភិតបំភ័យ និងគ្មានការគម្រាមកំហែង
នៅក្នុងសេចក្តីថ្លែងការណ៍នាថ្ងៃទី២៥ ខែកក្កដា នេះ សមាគមតន្ត្រីសំនៀងជនពិការ បានឱ្យដឹងថា អំឡុងពេលបោះឆ្នោត សមាជិកនៃសមាគមតន្ត្រីសំនៀងជនពិការជិត៧០០នាក់ បានចេញទៅបោះឆ្នោតនៅតាមរាជធានី ខេត្ត ដោយគ្មានការបង្ខិតបង្ខំ។ ក្នុងសេចក្តីថ្លែងការណ៍បន្តថា ជនមានពិការភាពមានសេចក្តីរំភើបរីករាយដែលបានចូលរួមចំណែក និងទំនួលខុសត្រូវចំពោះជោគវាសនារបស់ប្រទេសជាតិ ជាពិសេសក្នុងកិច្ចដំណើរការលទ្ធិប្រជាធិបតេយ្យនៅកម្ពុជា។
ក្នុងសេចក្តីថ្លែងការណ៍នោះ សមាគមបានកត់សម្គាល់ថា «សមាគមតន្ត្រីសំនៀងជនពិការ ក៏បានកត់សម្គាល់ និងសូមវាយតម្លៃខ្ពស់នូវកិច្ចខិតខំប្រឹងប្រែងរបស់គណៈកម្មាធិការជាតិរៀបចំការបោះឆ្នោត ដោយបានយកចិត្តទុកដាក់រៀបចំបន្ទប់ពិសេសដាច់ដោយឡែកបង្កលក្ខណៈងាយស្រួលចំពោះជនមានពិការភាពដែលបានមកបោះឆ្នោត ចំណែកមន្ត្រីក្នុងបន្ទប់បោះឆ្នោត បានជួយសម្របសម្រួលតាមសំណូមពរជនពិការដោយជួយរកឈ្មោះជួយគូសសន្លឹកឆ្នោតជូនគណបក្សនយោបាយដែលជនពិការភាពចង់បោះជូន។ ការយកចិត្តទុកដាក់នេះ ត្រូវបានទទួលការកោតសរសើរពីជនមានពិការភាព និងក្រុមអ្នកសង្កេតការណ៍អន្តរជាតិ»។
សមាគម ក៏បានកត់សម្គាល់ពីការរាប់សន្លឹកឆ្នោតផងដែរ។ សមាគម បានមើលឃើញថា ដំណើរការរាប់សន្លឹកឆ្នោតបានប្រព្រឹត្តទៅដោយមានការចូលរួមពីគ្រប់ភាគីពាក់ព័ន្ធ រួមមានភ្នាក់ងារគណបក្សនយោបាយ អ្នកអង្កេតការណ៍ជាតិ-អន្តរជាតិ ក៏ដូចជាភ្នាក់ងារសារព័ត៌មាន ចំណុចនេះឆ្លុះបញ្ចាំងពីតម្លាភាពនិងការបើកចំហនៃដំណើរការរាប់សន្លឹកឆ្នោត។
សមាគមតន្ត្រីសំនៀងជនពិការ បានប្រកាសគាំទ្រ និងចូលរួមអបអរសាទរជាពិសេស គណៈកម្មាធិការជាតិរៀបចំការបោះឆ្នោតដែលបានធានាការប្រព្រឹត្តទៅដោយរលូន សេរី ត្រឹមត្រូវ យុត្តិធម៌ និងតម្លាភាពនៃការបោះឆ្នោតនៅកម្ពុជា និងបានបង្កើតទំនុកចិត្តជាបន្តបន្ទាប់ដល់ប្រជាពលរដ្ឋខ្មែរ ពិសេសយើងខ្ញុំជាជនមានពិការភាព (ឆ្លុះបញ្ចាំងតាមរយៈកំណើននៃការបោះឆ្នោតរបស់ប្រជាពលរដ្ឋ ដែលមានក្នុងបញ្ជីបោះឆ្នោត និងធ្វើឱ្យមានភាពជឿជាក់លើគ្រប់មជ្ឈដ្ឋានចំពោះដំណើរការប្រជាធិបតេយ្យនៅក្នុងព្រះរាជាណាចក្រកម្ពុជា៕
