(ភ្នំពេញ)៖ សមាគមមិត្តយើង បានបង្ហាញការគាំទ្រពេញទំហឹងលើដំណើរការបោះឆ្នោតជ្រើសតាំងតំណារាស្ត្រនីតិកាលទី៧ ដែលប្រព្រឹត្តទៅកាលពីថ្ងៃអាទិត្យ ទី២៣ ខែកក្កដា ឆ្នាំ២០២៣កន្លងទៅនេះ។ សមាគមមិត្តយើង បានកត់សម្គាល់ថា ការបោះឆ្នោតនេះ បានប្រព្រឹត្តទៅដោយសេរី ត្រឹមត្រូវ យុត្តិធម៌ និងតម្លាភាព។
យោងតាមសេចក្តីថ្លែងការណ៍របស់សមាគមបានឱ្យដឹងថា ក្នុងព្រឹត្តិការណ៍បោះឆ្នោតដ៏សំខាន់កាលពីថ្ងៃអាទិត្យ កន្លងទៅនេះ សមាគមមិត្តយើង បានពង្រាយសមាជិក សមាជិកា ៥៣រូប ក្នុងនោះមានអ្នកសង្កេតការណ៍ ចល័តចំនួន ៦រូប ចុះសង្កេតការណ៍នៅតាមមណ្ឌលបោះឆ្នោតក្នុង ៦រាជធានីខេត្តរួមមាន៖ រាជធានីភ្នំពេញ ខេត្តតាកែវ ខេត្តកំពង់ចាម ខេត្តសៀមរាប ខេត្តស្វាយរៀង និងខេត្តត្បូងឃ្មុំ ។
សមាគមបានបញ្ជាក់ថា តាមរយៈការបូកសរុបរបាយកាណ៍ និងការវាយតម្លៃរបស់សមាជិក សមាជិកា ជាអ្នកសង្កេតការណ៍ ផ្ទាល់តាមមណ្ឌល និងការិយាល័យបោះឆ្នោត គឺសមាគមអាចធ្វើការសន្និដ្ឋានបានថា ដំណើរការបោះ ឆ្នោតជ្រើសរើសតំណាងរាស្ត្រ នីតិកាលទី៧ ឆ្នាំ២០២៣ នាថ្ងៃ២៣ ខែកក្កដា ឆ្នាំ២០២៣ កន្លងមកនេះ គឺបានប្រព្រឹត្តទៅដោយសេរី ត្រឹមត្រូវ យុត្តិធម៌ និងតម្លាភាពស្របតាមគោលការណ៍ លទ្ធិប្រជាធិបតេយ្យ សេរី ពហុបក្ស និងមានសណ្តាប់ធ្នាប់ល្អ។
សមាគមមិត្តយើង បានបង្ហាញជឿជាក់យ៉ាងមុតមាំថា ការចូលរួមរបស់ប្រជាជនកម្ពុជាដ៏ច្រើនលើសលុបក្នុងការបោះឆ្នោតនេះ ពិតជាបានឆ្លុះបញ្ចាំងពីសិទ្ធិសេរីភាពក្នុងការបញ្ចេញមតិរបស់ប្រជាជនកម្ពុជាយ៉ាងពិតប្រាកដមែន។
សមាគមមិត្តយើង ក៏បានធ្វើការកត់សម្គាល់ និងកោតសរសើរផងដែរចំពោះ៖
* រាជរដ្ឋាភិបាលកម្ពុជា ដែលបានយកចិត្តទុកដាក់ជាពិសេស ដោយបានអនុញ្ញាតឱ្យមន្ដ្រីរាជការ កម្មករ និយោជិត ឈប់សម្រាកពីការងារចំនួនបីថ្ងៃ នៅថ្ងៃទី២២ ថ្ងៃទី២៣ និងថ្ងៃទី២៤ ខែកក្កដា ដើម្បីបង្កលក្ខណៈ ងាយស្រួលដល់ប្រជាពលរដ្ឋក្នុងការចូលរួមបោះឆ្នោតជ្រើសរើសតំណាងរាស្ត្រនីតិកាលទី៧
* បរិយាកាសនៃការឃោសនារបស់គណបក្សនយោបាយ ប្រកបដោយភាពចាស់ទុំខាងនយោបាយ
* ភាពងាយស្រួលក្នុងការស្វែងរកព័ត៌មានបោះឆ្នោតដោយផ្ទាល់តាមរយៈ បច្ចេកវិទ្យាឌីជីថលទំនើប
* ភាពចម្រុះនៃភ្នាក់ងារអង្កេតការណ៍ពីគ្រប់គណបក្សនយោបាយមានលក្ខណៈល្អប្រសើរ ដំណើរការប្រជាធិបតេយ្យនីយកម្មក្នុងព្រះរាជាណាចក្រកម្ពុជា ត្រូវបានពង្រឹង និងអាចទុកចិត្តបាន។
សមាគមមិត្តយើង បានសម្ដែងការសាទរ និងសូមអរគុណដល់ គណៈកម្មាធិការជាតិរៀបចំការបោះឆ្នោត (គ.ជ.ប) ដែលបានខិតខំរៀបចំការបោះឆ្នោតជ្រើសរើសតំណាងរាស្ត្រនីតិកាលទី៧ ដោយជោគជ័យ និង ក្នុងបរិយាកាស ស្ងប់ស្ងាត់មានសន្តិសុខ សុវត្ថិភាព និងសណ្ដាប់ធ្នាប់ល្អ គ្មានអំពើហិង្សា គ្មានការគំរាមកំហែង និងប្រកបដោយភាពត្រឹមត្រូវ និងតម្លាភាព ស្របតាមគោលការណ៍លទ្ធិប្រជាធិបតេយ្យ៕
