(កណ្ដាល)៖ លោកបណ្ឌិត ម៉ៅ ភិរុណ សមាជិកគណៈកម្មាធិការកណ្ដាលគណបក្សប្រជាជនកម្ពុជា និងជាប្រធានគណៈកម្មាធិការគណបក្សខេត្តកណ្ដាល នៅថ្ងៃទី២៤ ខែកក្កដា ឆ្នាំ២០២៣ បានថ្លែងអំណរគុណប្រជាពលរដ្ឋ ច្រើនលើសលុបដែលបានអញ្ជើញទៅបោះឆ្នោតជ្រើសតាំងតំណាងរាស្ដ្រ នីតិកាលទី៧ មានជិត៩០ភាគរយ។
ថ្លែងមកកាន់អ្នកយកព័ត៌មាន Fresh News ប្រចាំខេត្ត លោកបណ្ឌិត ម៉ៅ ភិរុណ បានអះអាងថា ប្រជាពលរដ្ឋខេត្តកណ្ដាលទាំងអស់ ដែលបាននាំគ្នាចេញទៅបោះឆ្នោតនៅយ៉ាងច្រើនកុះករមានរហូតដល់ ៨៩.១៥% និងបានបោះឆ្នោតជូនគណបក្សប្រជាជនកម្ពុជាឈ្នះយ៉ាងច្រើនសន្ធឹកសន្ធាប់ស្ទើរទាំងស្រុង (លទ្ធផលបឋម)។
លោកបណ្ឌិបានរៀបរាប់យ៉ាងដូច្នេះថា៖ «ក្នុងនាមខ្លួនខ្ញុំបាទផ្ទាល់សូមគោរពកោតសរសើរ និងថ្លែងអំណរគុណយ៉ាងជ្រាលជ្រៅបំផុតចំពោះថ្នាក់ដឹកនាំមន្ត្រីគណបក្ស ក្រុមការងារគណបក្សចុះមូលដ្ឋានគ្រប់ថ្នាក់ សមាជិក សមាជិកាគណបក្ស សកម្មជនគណបក្ស និងសមាជិកសមាជិកាខេត្តកណ្ដាល ក្រុមការងារគ្រប់លំដាប់ថ្នាក់ និងបងប្អូនប្រជាពលរដ្ឋខេត្តកណ្ដាលទាំងអស់ ដែលបាននាំគ្នាចេញទៅបោះឆ្នោតនៅថ្ងៃទី២៣ ខែកក្កដា ឆ្នាំ២០២៣ នេះយ៉ាងច្រើនកុះករមានរហូតដល់៨៩.១៥% នៃអ្នកដែលមានឈ្មោះបោះឆ្នោត ស្មើនឹងចំនួនមនុស្ស ៧២៩,៦៨៦នាក់ ក្នុងនោះអ្នកបោះឆ្នោតជូនគណបក្សប្រជាជនកម្ពុជាមានចំនួន ៨៣,៥៦ភាគរយ នៃសន្លឹកឆ្នោតបានការ ដែលចំនួននេះ ជាចំនួនអ្នកបោះឆ្នោតជូនគណបក្សប្រជាជនកម្ពុជាឈ្នះយ៉ាងច្រើនស្ទើរទាំងស្រុង (លទ្ធផលបឋម) ស្មើនឹងចំនួនមនុស្ស ៥៦៧,៩២៦នាក់ បើទោះបីជាមានភ្លៀងធ្លាក់រលឹមស្រិចៗយ៉ាងណាក៏ដោយ»។
ការអញ្ជើញទៅបោះឆ្នោតដ៏ច្រើនលើសលុបនេះ ឆ្លុះបញ្ចាំងពីការបំពេញកាតព្វកិច្ច និងការអនុវត្តសិទ្ធិជាពលរដ្ឋតាមបែបលទ្ធិប្រជាធិបតេយ្យ ក្នុងការបោះឆ្នោតជ្រើសរើសគណបក្សដែលខ្លួនស្រឡាញ់ពេញចិត្ត ជឿទុកចិត្តបាន ដើម្បីដឹកនាំប្រទេសឲ្យមានសន្តិភាព និងការអភិវឌ្ឍឲ្យកាន់តែរុងរឿងសម្បូរសប្បាយថែមទៀត។
លោកបណ្ឌិត បានថ្លែងថា «ខ្ញុំសូមគោរពជូនពរ លោកតា លោកយាយ អ៊ំ ពូ មីង បងប្អូនប្រជាពលរដ្ឋខេត្តកណ្ដាលទាំងអស់ សូមប្រកបដោយពុទ្ធពរ និងពរទាំង៥ប្រការ គឺអាយុ វណ្ណៈ សុខៈ ពលៈ និងបដិភាណៈ កុំបីឃ្លៀងឃ្លាតឡើយ។ សូមលោកតា លោកយាយ អ៊ំ ពូ មីង បងប្អូនទាំងអស់ទទួលនូវការគោរពស្រឡាញ់ដ៏ជ្រាលជ្រៅនិងស្មោះស្ម័គ្របំផុតពីខ្ញុំបាទ»៕
