(ភ្នំពេញ)៖ លោកឧកញ៉ា ស្រី ចាន់ថន អគ្គនាយក ក្រុមហ៊ុន Jes’t Group & 7NG បានផ្ដល់ជូនយ៉ាងពិសេសដល់ប្រជាពលរដ្ឋ ដែលបានទៅបោះឆ្នោតកាលពីថ្ងៃអាទិត្យកន្លងទៅ ដោយគ្រាន់តែបង្ហាញចង្អុលដៃប្រលាក់ទឹកខ្មៅ នឹងទទួលបានសំបុត្រចូលកម្សាន្ដនៅសួន Jet Garden Park នៅតំបន់ 7NG ដោយមិនគិតថ្លៃ។

លោកឧកញ៉ា ស្រី ចាន់ថន បានប្រាប់ Fresh News ថា ការផ្ដល់យ៉ាងពិសេសសម្រាប់ប្រជាពលរដ្ឋនេះ អនុវត្តចាប់ពីថ្ងៃទី២៥ ដល់ថ្ងៃទី២៨ ខែកក្កដា ឆ្នាំ២០២៣ ដើម្បីលើកទឹកចិត្តដល់ប្រជាពលរដ្ឋដែលបានអញ្ជើញទៅបោះឆ្នោត ជ្រើសតាំងតំណាងរាស្ដ្រ នីតិកាលទី៧។

លោកបានបញ្ជាក់យ៉ាងដូច្នេះថា ​«ដើម្បីចូលរួមលើកទឹកចិត្តដល់ពលរដ្ឋល្អ ដែលបានបំពេញកាតព្វកិច្ចទៅបោះឆ្នោតរួចរាល់ (មានស្នាមជ្រលក់ម្រាមចង្អុលដៃដែលមានពណ៌ខៀវក្រម៉ៅ) នោះ សួនកម្សាន្ត Jet Garden Park យើងខ្ញុំ ដែលមានទីតាំងនៅតំបន់ 7NG នឹង Free សំបុត្រចូលទស្សនាជូនដល់បងប្អូន ចាប់ពីថ្ងៃអង្គារ ទី២៥ ដល់ថ្ងៃសុក្រ ទី២៨ ខែកក្កដា ឆ្នាំ២០២៣​»៕