(បាភ្នំ-ព្រៃវែង)៖ នាព្រឹកថ្ងៃទី២០ ខែកក្កដា ឆ្នាំ២០២៣ លោក ព្រុំ សុខា ប្រធានក្រុមការងារស្រុកបាភ្នំ រួមជាមួយសហការីក្នុងក្រុមការងារ និងគណបក្សស្រុក ឃុំ ព្រមទាំង មន្រ្តី សកម្មជនគណបក្សមកពីភូមិទាំង១០៨ ក្នុងឃុំទាំង៩ នៃស្រុកបាភ្នំដែលមានអ្នកចូលរួមប្រមាណ៦០០០នាក់ បានដឹកនាំក្បួនដង្ហែទ្រង់ទ្រាយធំឈានទៅបិទបញ្ចប់យុទ្ធនាការឃោសនាបោះឆ្នោតជាតិជ្រើសតាំងតំណាងរាស្រ្តនៃរដ្ឋសភាអាណត្តិទី៧ ថ្ងៃទី២៣ ខែកក្កដា ឆ្នាំ២០២៣ នាពេលដ៏ខ្លីខាងមុខនេះ។

ចាប់ផ្តើមតាំងពីព្រឹកព្រលឹម ក្បួនដង្ហែទាំងឡាយដែលមានក្បួនរថយន្តនាំមុខ លំអរំលេចពណ៌ដោយទង់ជាតិ ទង់បក្ស បដា ពាក្យស្លោក បន្លឺដោយឧឃោសនស័ព្ទ និងឧបករណ៍បន្លឺសំឡេងភ្លេងជ័យឃោសចម្រុះតាមពីក្រោយដោយក្បួនម៉ូតូរាប់រយគ្រឿងបើកបរ និងជិះជាមួយដោយសកម្មជន និងអ្នកគាំទ្រគណបក្សប្រជាជនកម្ពុជារាប់ពាន់នាក់។

ក្បួនដង្ហែនៃហ្វូងមនុស្សយ៉ាងច្រើនកុះករ ដែលពាក់អាវបក្សនិងមួកសមានរូបសញ្ញាទេវតាបាចផ្កាមើលទៅហាក់បីដូចជាផ្ទាំងសំឡីកប្បាសសល្អគន់ បានធ្វើដំណើរយ៉ាងសស្រាក់សស្រាំដង្ហែចេញពីមូលដ្ឋាន ភូមិ ឃុំនានា គ្រប់ច្រកល្ហក់ នៅជនបទស្រែចំការ នៃតំបន់វាលរាបព័ទ្ធភ្នំឈើកាច់ ដែលជាអតីតទឹកដីរាជធានីបុរាណនៃនគរភ្នំរបស់អាណាចក្រកម្ពុជា មកកាន់កន្លែងប្រារព្ធមិទិ្ទញប្រមូលផ្តុំនៅទីលានបាល់ទាត់ស្រុកបាភ្នំ។

ថ្លែងទៅកាន់អង្គមិទ្ទិញដ៏ធំនៃយុទ្ធនាកាឃោសនាបោះឆ្នោតជាតិលើកនេះ លោក ព្រុំ សុខា ប្រធានក្រុមការងារស្រុកបាភ្នំ និងជាបេក្ខជនតំណាងរាស្រ្តផងដែរនោះ បានថ្លែងគូសបញ្ជាក់ថា « រូបភាពបង្ហាញកម្លាំងសាមគ្គីភាពរបស់ប្រជាជនដ៏ច្រើនកុះករនៅក្នុងស្រុកបាភ្នំនាពេលនេះ សបញ្ជាក់យ៉ាងប្រត្យ័ក្សពីឧត្តមភាពនយោបាយគ្មានគូប្រៀបរបស់គណបក្សប្រជាជនកម្ពុជា ដែលពិតជាធានាដល់ជោគជ័យមហិមាសម្រាប់ការបោះឆ្នោតជាតិថ្ងៃទី២៣ ខែកក្កដា ឆ្នាំ២០២៣ ជាក់ជាមិនខាន»។

បន្ទាប់ពីពិធីបានរំសាយ ក្បួនដង្ហែរបស់ឃុំនីមួយៗក៏បានបន្តយុទ្ធនាការត្រលប់ទៅកាន់មូលដ្ឋានភូមិ ឃុំ រៀងៗខ្លួន ដើម្បីបញ្ចប់កិច្ចនាំសារនយោបាយ និងមតិណែនាំដ៏ខ្ពង់ខ្ពស់របស់ សម្តេចតេជោ ហ៊ុន សែន ប្រធានគណបក្សប្រជាជនកម្ពុជា ឲ្យទៅដល់អ្នកបោះឆ្នោតម្នាក់ៗតាមខ្នងផ្ទះ ដោយយកចិត្តទុកដាក់ពិសេសការបោះឆ្នោត និងគូសក្នុងប្រអប់លេខរៀងទី១៨លើសន្លឹកឆ្នោតបានត្រឹមត្រូវ៕

http://image.freshnewsasia.com/2021/id-025/fn-2023-07-20-18-02-38-0.JPG http://image.freshnewsasia.com/2021/id-025/fn-2023-07-20-18-02-39-1.JPG http://image.freshnewsasia.com/2021/id-025/fn-2023-07-20-18-02-39-2.JPG http://image.freshnewsasia.com/2021/id-025/fn-2023-07-20-18-02-40-3.JPG http://image.freshnewsasia.com/2021/id-025/fn-2023-07-20-18-02-40-4.JPG http://image.freshnewsasia.com/2021/id-025/fn-2023-07-20-18-02-40-5.JPG http://image.freshnewsasia.com/2021/id-025/fn-2023-07-20-18-02-43-6.JPG