(ភ្នំពេញ)៖ បាំងតែពីរថ្ងៃទៀតនោះ ការបោះឆ្នោតជ្រើសតាំងតំណាងរាស្ត្រនីតិកាលទី៧ ពេលវេលាប្រជាពលរដ្ឋបញ្ចេញសិទ្ធិជ្រើសរើសមេដឹកនាំដែលខ្លួនពេញចិត្តនឹងឈានចូលមកដល់ហើយ។
ការបោះឆ្នោតជ្រើសរើសតំណាងរាស្ត្រដែលមានរយៈពេល៥ឆ្នាំម្តង ជាពេលវេលាដ៏សំខាន់សម្រាប់ប្រជាពលរដ្ឋផ្តល់ការសម្រេចចិត្ត និងផ្តល់ក្តីសង្ឃឹមលើគណបក្សនយោបាយមានសមត្ថភាពបន្តដឹកនាំប្រទេសឱ្យមានសុខសន្តិភាព និងការរីកចម្រើនទៅមុខជាបន្តទៀត។
គណបក្សប្រជាជនកម្ពុជា ដែលជាគណបក្សបានដឹកនាំប្រទេសកម្ពុជាអស់រយៈពេលជាង៤០ឆ្នាំមកហើយនោះ បានក្លាយទៅជាគណបក្សនយោបាយមួយទទួលបានការពេញចិត្តខ្ពស់ពីប្រជាពលរដ្ឋជាម្ចាស់ឆ្នោត។ ប្រជាពលរដ្ឋពេញចិត្ត ក៏ដោយសារពួកគេបានមើលឃើញជាក់ស្តែងចំពោះការដឹកនាំប្រទេសពីសំណាក់គណបក្សប្រជាជនកម្ពុជា បានធ្វើឱ្យប្រទេសជាតិមានសុខសន្តិភាព មានការរីកចម្រើន ហើយជីវភាពរបស់ប្រជាពលរដ្ឋក៏មានភាពល្អប្រសើរជាលំដាប់។
ដើម្បីទទួលបានគណបក្សនយោបាយណាមួយមកដឹកនាំប្រទេសតាមបំណងរបស់ខ្លួននោះ ការបោះឆ្នោតនាថ្ងៃទី២៣ ខែកក្កដា ឆ្នាំ២០២៣ខាងមុខនេះ គឺជារឿងមួយដ៏ចាំបាច់មិនអាចរំលងចោលបាននោះឡើយ។
ប្រជាពលរដ្ឋដែលស្រឡាញ់គណបក្សប្រជាជនកម្ពុជា ហើយចង់ឱ្យបក្សប្រជាជនកម្ពុជាដឹកនាំប្រទេសជាបន្តទៀតនោះ បានត្រៀមខ្លួនរួចរាល់ហើយក្នុងការទៅបោះឆ្នោត។ ប្រជាពលរដ្ឋដែលស្រឡាញ់បក្សប្រជាជនកម្ពុជា បានបង្ហាញការជឿជាក់ថា បក្សប្រជាជននៅតែមានសមត្ថភាព និងឆន្ទៈកសាងសង្គមកម្ពុជាឱ្យរីកចម្រើន រក្សាបាននូវសុខភាព ជួយឱ្យពលរដ្ឋរស់នៅដោយសុខសុភមង្គល៕
