(ភ្នំពេញ)៖ និស្សិតខ្មែរក្រោម បានបង្ហាញទស្សនៈថា ខ្មែរក្រោមដែលឡើងមករស់នៅកម្ពុជា មិនគួរប្រឆាំង ឬស្អប់រាជរដ្ឋាភិបាលកំពុងដឹកនាំប្រទេសនោះឡើយ។ ការប្រឆាំងនឹងរាជរដ្ឋាភិបាល មិនមានផលចំណេញសម្រាប់ខ្មែរក្រោមនោះឡើយ ហើយកាន់តែបង្កើនសម្ពាធបញ្ហាដល់ការរស់នៅទៅវិញ។
យុវជន ថាច់ វណ្ណា ជាកូនខ្មែរក្រោមកើតនៅក្នុងខេត្តឃ្លាំង ហើយបានឡើងមកបន្តការសិក្សារៀនសូត្រនៅកម្ពុជាកាលពីឆ្នាំ២០១៣។ បច្ចុប្បន្ននេះ ថាច់ វណ្ណា កំពុងរៀនថ្នាក់បណ្ឌិតផ្នែកវិទ្យាសាស្ត្រនយោបាយនៅទីក្រុងមូស្គូ ប្រទេសរុស្ស៉ី។
វណ្ណា បានឡើងមកប្រទេសកម្ពុជា ព្រោះតែចង់មានឱកាសសិក្សារៀនសូត្រ ជាពិសេសចង់ដឹងឮពីប្រទេសកំណើតរបស់ខ្លួន។ មកដល់កម្ពុជា វណ្ណា បានបួសជាសង្ឃ ដើម្បីរកឱកាសសិក្សា។ លុះបានអាហារូបករណ៍ និងសិក្សានៅប្រទេសរុស្ស៉ីមួយឆ្នាំ ទើប វណ្ណា បានលាចាកសិក្ខាមកវិញ។ រយៈពេលប្រមាណ ១០ឆ្នាំនេះ វណ្ណា បានពុះពារការលំបាកជាច្រើន ដើម្បីស្រវាចាប់យកចំណេះដែលជាបំណងដ៏ធំរបស់ខ្លួនក្នុងការភៀសខ្លួនពីខ្មែរក្រោម មកកម្ពុជា។
រស់នៅកម្ពុជារយៈពេលប្រមាណជា១០ឆ្នាំមកនេះ វណ្ណា បានកត់សម្គាល់ឃើញថា ខ្មែរក្រោមដែលឡើងមករស់នៅកម្ពុជា មានជំហរជំទាស់នឹងរាជរដ្ឋាភិបាល ហើយច្រើនមានសមានចិត្តជាមួយបក្សប្រឆាំងទៅវិញ។ បើតាម វណ្ណា ការជំទាស់របស់ខ្មែរក្រោមចំពោះរាជរដ្ឋាភិបាល ដោយសារតែពួកគេឃើញរាជរដ្ឋាភិបាលមានទំនាក់ទំនងល្អនឹងរដ្ឋាភិបាលវៀតណាម ដែលជាអាណាព្យាបាលរបស់ខ្មែរក្រោមនាពេលបច្ចុប្បន្ន។
យុវជន ថាច់ វណ្ណា មិនចង់ឃើញខ្មែរក្រោមឡើងមកកម្ពុជា ប្រឆាំងរាជរដ្ឋាភិបាលនោះទេ។ វណ្ណា បានផ្តល់ជាទស្សនៈដល់ខ្មែរក្រោមថា ទោះរាជរដ្ឋាភិបាលមកពីគណបក្សនយោបាយណាក៏ដោយ ត្រូវតែមានទំនាក់ទំនងល្អជាមួយរាជរដ្ឋាភិបាល ដើម្បីទទួលបានបរិយាកាសល្អសម្រាប់ការរស់នៅ ក៏ដូចជាការប្រកបរបរចិញ្ចឹមជីវិត។
វណ្ណា បានពន្យល់ថា មានតែរាជរដ្ឋាភិបាលទេ ដែលជាអ្នកចាត់ចែងកិច្ចការទាំងឡាយរបស់រដ្ឋ ដូច្នេះបើមានការប្រាស្រ័យទាក់ទងមិនល្អ គឺមិនមានប្រយោជន៍សម្រាប់ខ្មែរក្រោមនោះឡើយ៕
