(ភ្នំពេញ)៖ យុវជនខ្មែរក្រោមមួយក្រុមដែលកំពុងរស់នៅ និងសិក្សារៀនសូត្រនៅកម្ពុជា បានលើកទឹកចិត្តឱ្យប្រជាពលរដ្ឋខ្មែរក្រោមកំពុងរស់នៅកម្ពុជាទាំងអស់ ទៅចូលរួមបោះឆ្នោតជ្រើសរើសតំណាងរាស្ត្រនៅថ្ងៃទី២៣ ខែកក្កដា ហើយបានអំពាវនាវដល់ខ្មែរក្រោមនៅកម្ពុជា មិនគួរយករាជរដ្ឋាភិបាលដឹកនាំដោយបក្សប្រជាជនកម្ពុជាធ្វើជាសត្រូវនោះឡើយ។
រាល់ខ្មែរក្រោមដែលឡើងមករស់នៅក្នុងប្រទេសកម្ពុជា ត្រូវបានគេមើលឃើញថា ពួកគេមិនសូវជាមានក្តីសោមនស្សជាមួយរាជរដ្ឋាភិបាលដឹកនាំដោយគណបក្សប្រជាជនកម្ពុជានោះឡើយ។ ពួកគេមានទស្សនៈថា រាជរដ្ឋាភិបាលដឹកនាំដោយបក្សប្រជាជនកម្ពុជាមានទំនាក់ទំនងល្អជាមួយរដ្ឋាភិបាលវៀតណាម ដែលគ្រប់គ្រងទឹកដីកម្ពុជាក្រោម។ ទស្សនៈនេះហើយ ដែលធ្វើឱ្យខ្មែរក្រោមដែលឡើងមករស់នៅកម្ពុជា ច្រើនមានក្តីសោមនស្ស ឬមនោសញ្ចេតនាជាមួយគណបក្សប្រឆាំង ហើយមិនសូវជាស៊ីខ្សែជាមួយបក្សប្រជាជនដែលដឹកនាំរាជរដ្ឋាភិបាលនោះឡើយ។
ប៉ុន្តែបច្ចុប្បន្នក៏មានខ្មែរក្រោមមួយចំនួនបានផ្លាស់ប្តូរទស្សនៈរបស់ខ្លួន ដោយងាកមកគាំទ្រគណបក្សប្រជាជនកម្ពុជា។ ការផ្លាស់ប្តូរក៏ដោយសារតែពួកគេបានមើលឃើញថា អ្វីដែលពួកគេធ្លាប់គិត ធ្លាប់វាយតម្លៃលើបក្សប្រជាជនកម្ពុជានោះ គឺមិនត្រឹមត្រូវនោះឡើយ។
លោក សឿង សុធានី ប្រធានសមាគមសប្បុរសធម៌ខ្មែរកម្ពុជាក្រោម គឺជាខ្មែរក្រោមមួយរូបមានស្រុកកំណើតក្នុងខេត្តព្រះត្រពាំង។ លោក សុធានី បានឡើងមកកម្ពុជា ដើម្បីសិក្សារៀនសូត្រកាលពីឆ្នាំ២០០១។ បច្ចុប្បន្នលោក សុធានី មានភរិយា មានកូនសាងទ្រនំគ្រួសារយ៉ាងរឹងមាំក្នុងរាជធានីភ្នំពេញ។
លោក សឿង សុធានី កាលពីឆ្នាំ២០១៣ ក៏ជាអ្នកដែលគាំទ្រអតីតគណបក្សសង្គ្រោះជាតិ ជាមួយមិត្តភក្តិជាខ្មែរក្រោមមួយចំនួនទៀត។ តែបច្ចុប្បន្នលោក សុធានី បានមានទស្សនៈផ្សេងចំពោះគណបក្សប្រជាជនកម្ពុជា។
លោក សុធានី បានចាត់ទុកអ្វីដែលលោកគិតចំពោះគណបក្សប្រជាជនកម្ពុជា កាលពីពេលមុន គឺជាការគិតមិនបានគ្រប់ជ្រុងជ្រោយ ឬមើលមិនច្បាស់ពីទស្សនៈដឹកនាំរបស់បក្សប្រជាជនកម្ពុជា។
ពេលនេះយុវជនខ្មែរក្រោមម្នាក់នេះ បានមើលឃើញច្បាស់ពីនយោបាយដឹកនាំរបស់គណបក្សប្រជាជនកម្ពុជាលើកិច្ចការអធិបតេយ្យជាតិ ដោយមិនរណបប្រទេសណាមួយ ដូចការគិតរបស់ខ្លួនពីមុននោះឡើយ។
ក្រៅពីអធិបតេយ្យជាតិហើយនោះ លោក សុធានី ក៏បានផ្តល់តម្លៃខ្ពស់ចំពោះ ការដឹកនាំរបស់បក្សប្រជាជនកម្ពុជា បានធ្វើឱ្យសង្គមកម្ពុជាមានការរីកចម្រើន និងសាងកិត្តិនាមខ្ទរខ្ទារនៅលើឆាកអន្តរជាតិ។ អ្វីដែលធ្វើឱ្យលោក សុធានី កាន់តែពេញចិត្តចំពោះនយោបាយដឹកនាំរបស់បក្សប្រជាជនកម្ពុជា កាន់តែខ្លាំងថែមទៀតនោះ គឺនយោបាយកសាងហេដ្ឋារចនាសម្ព័ន្ធបម្រើដល់ការដឹកជញ្ជូន ជាពិសេសគម្រោង «ព្រែកជីហ្វូនណន-តេជោ» តភ្ជាប់ការដឹកជញ្ជូនពីទន្លេ ទៅកាន់សមុទ្ររបស់កម្ពុជា។
លោក សុធានី ក៏ចាប់អារម្មណ៍ចំពោះគោលនយោបាយរបស់គណបក្សប្រជាជនកម្ពុជា ដែលបានដាក់ចេញសម្រាប់ការដឹកនាំប្រទេសក្នុងអាណត្តិថ្មី។ ជាពិសេសនោះ គឺការធ្វើសកម្មភាពជាក់ស្តែង នាំមកនូវសមិទ្ធផលជាក់ស្តែង ពោលមិនមែនជាការសន្យាឱ្យរួចតែពីមាត់នោះឡើយ។
យុវជនខ្មែរក្រោមម្នាក់ទៀត ដែលកំពុងសិក្សាថ្នាក់បណ្ឌិតផ្នែកវិទ្យាសាស្ត្រនយោបាយនៅប្រទេសរុស្ស៉ី ក៏បានបង្ហាញការពេញចិត្តចំពោះការដឹកនាំរបស់រាជរដ្ឋាភិបាល កើតចេញពីគណបក្សប្រជាជនកម្ពុជានាអាណត្តិទី៦កន្លងទៅផងដែរ។
យុវជន ថាច់ វណ្ណា ជាកូនខ្មែរក្រោមកើតនៅក្នុងខេត្តឃ្លាំង ហើយបានឡើងមកបន្តការសិក្សារៀនសូត្រនៅកម្ពុជាកាលពីឆ្នាំ២០១៣។ វណ្ណា មិនបានបង្ហាញថា ខ្លួនជាអ្នកគាំទ្រគណបក្សប្រជាជនកម្ពុជានោះឡើយ ប៉ុន្តែយុវជនខ្មែរក្រោមរូបនេះ បានបង្ហាញការពេញចិត្តចំពោះការដឹកនាំរបស់រាជរដ្ឋាភិបាលក្នុងអាណត្តិទី៦លើកិច្ចការសំខាន់ៗចំនួន៣ រួមមានការប្រយុទ្ធប្រឆាំងនឹងជំងឺកូវីដ១៩ ការធ្វើជាប្រធានអាស៊ាន និងការរៀបចំព្រឹត្តិការណ៍ប្រកួតកីឡាស៊ីហ្គេម និងអាស៊ានប៉ារ៉ាហ្គេម ដែលជាព្រឹត្តិការណ៍ជាប្រវត្តិសាស្ត្រមួយសម្រាប់កម្ពុជា។
យុវជនខ្មែរក្រោម ថាច់ វណ្ណា បានចាត់ទុកសមិទ្ធផលទាំង៣នេះ បានបង្ហាញឱ្យឃើញយ៉ាងច្បាស់ពីសមត្ថភាពដឹកនាំរបស់រាជរដ្ឋាភិបាលដែលប្រសូត្រចេញពីបក្សប្រជាជនកម្ពុជា ក្រោមការបោះឆ្នោតគាំទ្រពីប្រជាពលរដ្ឋកាលពីឆ្នាំ២០១៨នោះ។
ទន្ទឹមនឹងការបង្ហាញមនោសញ្ចេតនា ក៏ដូចជាសមានចិត្តល្អជាមួយគណបក្សប្រជាជនកម្ពុជាហើយនោះ យុវជនខ្មែរក្រោមទាំងពីររូបនេះ ក៏បានបង្ហាញពីបំណងចង់ឃើញរាជរដ្ឋាភិបាលអាណត្តិថ្មីយកចិត្តទុកដាក់ចំពោះសហគមន៍ខ្មែរក្រោម ដែលកំពុងរស់នៅកម្ពុជាផងដែរ។ បំណងរបស់យុវជនទាំងពីរនេះ គឺមិនខុសគ្នានោះទេ គឺចង់ឃើញការជួយសម្រួលនូវលិខិតស្នាមផ្សេងៗ ដើម្បីឱ្យខ្មែរក្រោមអាចរស់នៅដោយស្របច្បាប់ និងអាចយកលិខិតស្នាមគតិយុត្តិផ្សេងៗនោះ ទៅបម្រើដល់ការសិក្សារៀនសូត្រ៕
