(ភ្នំពេញ)៖ គ្រាដែលការបោះឆ្នោតកាន់តែខិតជិតមកដល់ជនក្បត់ជាតិ សម រង្ស៉ី និងបក្ខពួក ក៏កំពុងធ្វើចលនាញុះញង់ខ្លាំងណាស់ដែរ ឱ្យប្រជាពលរដ្ឋគូសបំផ្លាញសន្លឹកឆ្នោត។ ប៉ុន្តែចលនាខុសច្បាប់នេះ មិនត្រូវបានស្វាគមន៍ដោយប្រជាពលរដ្ឋជាម្ចាស់ឆ្នោតនោះឡើយ។
លោក កាន់ គីម ប្រជាពលរដ្ឋរស់នៅឃុំមាន ស្រុកអូរាំងឪ ខេត្តត្បូងឃ្មុំ បានយល់ច្បាស់ពីតម្លៃសន្លឹកឆ្នោត ហើយក៏បានបង្ហាញការពេញចិត្តចំពោះការដឹកនាំរបស់គណបក្សប្រជាជនកម្ពុជា ដែលនាំមកនូវសុខសន្តិភាព ការរីកចម្រើន និងការអភិវឌ្ឍន៍។ ដូច្នេះលោក គីម ដែលមានវ័យ ៦៨ឆ្នាំហើយនោះ បានប្រកាសប្រឆាំងដាច់អហង្ការចំពោះចេតនាទុច្ចរិតរបស់ជនក្បត់ជាតិ សម រង្ស៉ី និងបក្ខពួក។
«យើងគូសបំផ្លាញឥតប្រយោជន៍ហ្នឹង។ ចុះបើបោះឱ្យបក្សប្រជាជនកម្ពុជាឃើញជាក់ស្តែង ធ្វើអីកើតហ្នឹង ធ្វើអីកើតហ្នឹង។ ទៅបោះឱ្យនរណាទៀត? ទៅគូសបំផ្លាញធ្វើអី? មិនបោះឱ្យគណបក្សប្រជាជនទៅ គណបក្សប្រជាជនដឹកនាំសុខសប្បាយរហូតមកហើយហ្នឹង»។ នេះជាការគូសបញ្ជាក់របស់លោក កាន់ គីម។
ប្រជាពលរដ្ឋម្នាក់ទៀតនៅឃុំត្បែង ស្រុកកណ្តាលស្ទឹង ខេត្តកណ្តាល លោក ធូ ខុន ក៏បានប្រកាសប្រឆាំងនឹងការអំពាវនាវរបស់ជនក្បត់ជាតិ សម រង្ស៉ី ក៏ដូចជាបក្ខពួកផងដែរ។ លោក ធូ ខុន អាយុ ៦៨ឆ្នាំដែរនោះ បានលើកឡើងថា លោកមិនគូសខ្វែងសន្លឹកឆ្នោតឡើយ។ មិនខ្វែងដោយសារតែលោកពេញចិត្តចំពោះគណបក្សប្រជាជនកម្ពុជា ដែលបានដឹកនាំប្រទេសឱ្យមានការរីកចម្រើន ប្រជាពលរដ្ឋមានជីវភាពល្អប្រសើរ។
លោក ធូ ខុន បានចាត់ទុកអ្វីដែលជនក្បត់ជាតិ សម រង្ស៉ី និងបក្ខពួកញុះញង់នោះ គ្រាន់តែជាចលនារុញច្រានឱ្យសង្គមហ្វឹកវរតែប៉ុណ្ណោះ។
សូមបញ្ជាក់ថា ការញុះញង់ឱ្យប្រជាពលរដ្ឋគូសបំផ្លាញសន្លឹកឆ្នោតជាទង្វើខុសនឹងច្បាប់ស្តីពីការបោះឆ្នោត។ នៅពេលនេះមានក្រុមប្រឆាំង៤នាក់ហើយ ត្រូវបានសមត្ថកិច្ចឃាត់ខ្លួន ព្រោះតែធ្វើសកម្មភាពញុះញង់ប្រជាពលរដ្ឋឱ្យបំផ្លាញសន្លឹកឆ្នោត។ ជាមួយគ្នានេះជនក្បត់ជាតិ សម រង្ស៉ី និងបក្ខពួកជាច្រើននាក់ទៀត ក៏ត្រូវបានតុលាការផ្តន្ទាទោសពាក់ព័ន្ធសកម្មភាពញុះញង់ពលរដ្ឋគូសបំផ្លាញសន្លឹកឆ្នោតនេះ។
សម្តេចតេជោ ហ៊ុន សែន នាយករដ្ឋមន្ត្រីកម្ពុជា និងជាប្រធានគណបក្សប្រជាជនកម្ពុជា បានគូសរំលេចថា ការបោះឆ្នោតជ្រើសតាំងតំណាងរាស្ត្រឆ្នាំ២០២៣នេះ ក្រៅពីការប្រកួតប្រជែងរវាងគណបក្សនយោបាយចំនួន១៨ហើយនោះ ក៏នៅមានការប្រកួតប្រជែងរវាងគណបក្សនយោបាយទាំង ១៨ ជាមួយពួកជ្រុលនិយម ដែលចង់បំផ្លាញចោលការបោះឆ្នោតផងដែរ។
សម្តេចតេជោ បានបញ្ជាក់ថា «ពួកជ្រុលនិយមដែលបញ្ជាដោយទណ្ឌិតរត់ចោលគុកពីក្រៅប្រទេសមកបក្សនយោបាយមួយនៅក្នុងប្រទេស បានរកគ្រប់វិធីដើម្បីបំផ្លាញចោលដំណើរការប្រជាធិបតេយ្យ តាមរយៈការខិតខំបំផ្លាញចោលការបោះឆ្នោត ដូចជាយុទ្ធនាការមិនឱ្យប្រជាជនទៅបោះឆ្នោត និងបំផ្លាញចោលសន្លឹកឆ្នោត។ល។»។
សម្តេចតេជោ បានទន្ទឹងរង់ចាំមើលថា ថ្ងៃទី២៣ ខែកក្កដា ឆ្នាំ២០២៣ខាងមុខនេះ តើកម្លាំងប្រជាធិបតេយ្យចូលរួមការបោះឆ្នោត មានច្រើនជាង ឬមានតិចជាងកម្លាំងបំផ្លាញប្រជាធិបតេយ្យ បំផ្លាញការបោះឆ្នោត?៕
