(ភ្នំពេញ)៖ លោក ម៉ក់ ហឺន អ្នកវិភាគជនជាតិអាមេរិកាំង ដើមកំណើតខ្មែរ បានអំពាវនាវឱ្យប្រជាពលរដ្ឋកម្ពុជាទាំងអស់ ដែលមានឈ្មោះក្នុងបញ្ជីបោះឆ្នោត ទៅបោះឆ្នោតជ្រើសតាំង តំណាងរាស្ត្រ អាណត្តិទី៧ នាថ្ងៃទី២៣ ខែកក្កដា ឆ្នាំ២០២៣ ដ៏ខ្លីខាងមុខនេះ ឱ្យបានគ្រប់ៗគ្នា។
លោកថ្លែងបែបនេះ ក្នុងជំនួបជាមួយ លោក ឃួង ស្រេង សមាជិកគណៈកម្មាធិការកណ្តាលគណបក្សប្រជាជនកម្ពុជា និងជាប្រធានគណៈកម្មាធិការគណបក្សរាជធានីភ្នំពេញ នាព្រឹកថ្ងៃទី១៩ ខែកក្កដា ឆ្នាំ២០២៣នេះ។
លោក ម៉ក់ ហឺន ក៏បានលើកឡើងដែរថា ក្នុងរបប ប៉ុល ពត លោកក៏ជាប្រជាពលរដ្ឋម្នាក់ដែលបានរងគ្រោះ ក្នុងរបបនេះដែរ ដោយត្រូវពួកប៉ុលពតធ្វើទុក្ខបុកម្និញ ឲ្យធ្វើជាគោអូសរទេះថែមទៀតផង។ លោកពិតជាកោតសរសើរ ចំពោះភាពរីកចំរើនយ៉ាងឆាប់រហ័សរបស់ប្រទេសកម្ពុជា ពិសេសនៅរាជធានីភ្នំពេញតែម្តង ពិតជាមានការអភិវឌ្ឍរីកចម្រើននឹកស្មានមិនដល់មែន។
លោក ឃួង ស្រេង បានលើកឡើងថា ដោយសារប្រទេសកម្ពុជា មានសន្តិភាពពេញលេញ ធ្វើឲ្យប្រជាពលរដ្ឋកម្ពុជា មានឱកាសគ្រប់គ្រាន់ ក្នុងការប្រកបមុខរបររកស៊ី មិនថាពលរដ្ឋនៅក្នុងក្រុង ឬនៅតាមបណ្តាខេត្តនោះទេ គឺពួកគាត់មានជីវភាពធូធាររហូតដល់អ្នកស្រែ ចំការ មានលទ្ធភាពទិញផ្ទះស្វែង ឬបុរីឲ្យកូនស្នាក់នៅ ដើម្បីរៀនសូត្រ នៅភ្នំពេញថែមទៀត។
លោកបន្តថា ការជួបសំណេះសំណាលជាមួយលោក ម៉ក់ ហឺន និងភរិយាព្រមទាំងសហការី នាពេលនេះ គឺចង់បង្ហាញឲ្យដឹងច្បាស់ពី មហាគ្រួសារគណបក្សប្រជាជនកម្ពុជា ដោយសម្តេចតេជោ ហ៊ុន សែន ក្នុងនាមប្រធានគណបក្សប្រជាជនកម្ពុជា បានលះបង់ដ៏ធំធេងក្នុងបុព្វហេតុស្វែងរកសន្តិភាពនិង ការអភិវឌ្ឍប្រទេសជាតិឲ្យរីកចំរើនជឿនលឿន ឥតឈប់ឈរ ដូចពេលសព្វថ្ងៃនេះ។ លោកបញ្ជាក់ថា សន្តិភាពនេះហើយ ដែលបានធ្វើឲ្យប្រជាពលរដ្ឋកម្ពុជាមានឱកាសគ្រប់គ្រាន់ ក្នុងការប្រកបមុខរបររកស៊ី ទទួលទាន មិនថាប្រជាពលរដ្ឋរស់នៅក្នុងក្រុងឬនៅតាមបណ្តាខេត្តនោះទេ គឺពួកគាត់ មានជីវភាពធូធា រហូតដល់អ្នកស្រែ ចំការ មានលទ្ធភាពទិញផ្ទះស្វែង ឬបុរីឲ្យកូនស្នាក់នៅ ដើម្បីរៀនសូត្រនៅភ្នំពេញ ដោយមិនបាច់ពឹងពាក់ផ្ទះបងប្អូនឡើយ ។
លោក ឃួង ស្រេង ក៏បានលើកឡើងផងដែរ ពីទុក្ខវេទនាក្នុងរបប ប៉ុល ពត និងការរំដោះប្រទេសជាតិ ចេញពីរបបនេះ និងការស្តារប្រទេសជាតិឡើងវិញចេញពីចំណុចសូន្យ រហូតមានការអភិវឌ្ឍរីកចំរើន គឺជាស្នាដៃរបស់សម្តេចតេជោ ហ៊ុន សែន។
ក្រោយបញ្ចប់ពិធីសំណេះសំណាលនេះ លោកឃួង ស្រេង បានបន្តនាំលោក ម៉ក់ ហឺន មកធ្វើទស្សនកិច្ចនៅមន្ទីរពេទ្យជាតិ តេជោសន្ដិភាព ដែលមានទីតាំងលើមហាវិថីឈ្នះ ឈ្នះ ស្ថិតនៅភូមិកប់ស្រូវធំ សង្កាត់គោករកា ខណ្ឌព្រែកព្នៅបន្តទៀត ដោយក្នុងកម្មវិធីទស្សនកិច្ចនោះ លោក ម៉ម ប៊ុនហេង រដ្ឋមន្ត្រីក្រសួងសុខាភិបាលក៏បានចូលរួមផងដែរ។
ក្រោមការដើរពិនិត្យ មន្ទីរពេទ្យនេះរួច លោក ម៉ក់ ហឺន បានលើកឡើងថា លោកមិនបានដឹងថា នៅរាជធានីភ្នំពេញ មានមន្ទីរពេទ្យជាតិ តេជោសន្ដិភាព ដ៏ធំរហូតដល់១ម៉ឺនគ្រែដូចនេះទេ លោកដឹងត្រឹមតែ មន្ទីរពេទ្យកាល់ម៉ែត ដែលទើបសាងសង់ថ្មីនិងពហុកីឡដ្ឋានជាតិមរតកតេជោប៉ុណ្ណោះ ហើយមន្ទីរពេទ្យនេះ មិនត្រឹមតែធំទូលាយប៉ុណ្ណោះទេ នៅបានបំពាក់គ្រឿងបរិក្ខាមិនចាញ់មន្ទីរនៅក្រៅប្រទេសថែមទៀតផង៕
