(ភ្នំពេញ)៖ នាល្ងាចថ្ងៃទី១៨ ខែកក្កដា ឆ្នាំ២០២៣ លោក ស្មាន ម៉ាណាន អនុប្រធានអង្គការមូនិធិអភិវឌ្ឍន៍មុស្លិមកម្ពុជា តំណាងលោកបណ្ឌិត អូស្មាន ហាស្សាន់ ទេសរដ្ឋមន្ត្រីទទួលបន្ទុកបេសកកម្មពិសេស បានអញ្ជើញទទួលដំណើរនិវត្តន៍ និងអបអរសាទរចំពោះក្រុមហាជ្ជីកម្ពុជា ចំនួន៩៦នាក់ ដែលបានបំពេញកាតព្វកិច្ចហាជ្ជី ដោយជោគជ័យ ហើយវិលត្រឡប់មកដល់កម្ពុជាដោយសុវត្ថិភាព នៅអាកាសយានដ្ឋានអន្តរជាតិភ្នំពេញ សម្រាប់ជើងទី៣។
នាឱកាសនោះ លោក ស្មាន ម៉ាណាន បានថ្លែងថា សាសនិកឥស្លាមកម្ពុជា ដែលបានអញ្ជើញទៅបំពេញកាតព្វកិច្ចបុណ្យហាជ្ជីទទួលបានជោគជ័យ ហើយវិលត្រឡប់មកវិញ នាពេលនេះ ភាគច្រើនអ្នកមកពីខេត្តពោធិ៍សាត់ កំពត កំពង់ឆ្នាំង កំពង់ចាម ក្រចេះ និងបាត់ដំបង។
លោកបានបន្តថា ក្នុងនាមថ្នាក់ដឹកនាំឥស្លាម ពិតជាមានការសប្បាយរីករាយជាខ្លាំង នៅពេលដែលសាសនិកឥស្លាមកម្ពុជា មានលទ្ធភាពទៅបំពេញកាតព្វកិច្ចហាជ្ជី ដោយក្នុងម្នាក់ៗចំណាយថវិកាប្រមាណ ៧,៥០០ដុល្លារ មិនដូចសម័យមុននោះទេ។
លោកបានបន្ថែមថា នេះក៏ដោយសារតែគោលនយោបាយរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិតរបស់ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានយកចិត្តទុកដាក់ខ្ពស់ ចំពោះប្រជាពលរដ្ឋទូទាំងប្រទេស ក៏ដូចជាសាសនិកឥស្លាម ធ្វើឲ្យប្រជាពលរដ្ឋជីវភាពធូរធារ និងការវិវត្តស្ថានភាពរស់នៅរបស់ខ្លួន ឆ្ពោះទៅមុខជាបន្តបន្ទាប់ ដែលជាចំណែកមួយ នៃការកើនឡើង នៃសេដ្ឋកិច្ចជាតិ។
សម្រាប់ឆ្នាំ ២០២៣នេះ មានសាសនិកឥស្លាមកម្ពុជា ចេញទៅធ្វើបុណ្យហាជ្ជី ចំនួន ជិត១ពាន់នាក់ ក្នុងម្នាក់ៗចំណាយប្រមាណ៧,៥០០ដុល្លារ ដោយក្នុងនោះទៅតាមរយៈសមាគមអង្គការនានា ចំនួន៣០នាក់ ក្រោមព្រះរាជឧបត្ថម្ភពីព្រះចៅ សាល់ ម៉ាន់ ២០នាក់ និងទៅតាមរយៈឯកជន ចំនួន៩២៧នាក់។
គួរបញ្ជាក់ថា ការទៅចូលរួមប្រតិបត្តិបុណ្យធម្មយាត្រាហាជ្ជី គឺជាកាតព្វកិច្ចទី៥ ក្នុងចំណោមកាតព្វកិច្ចទាំង៥ របស់សាសនាឥស្លាម ដែលជារៀងរាល់ឆ្នាំ សាសនិកឥស្លាម នៅទូទាំងពិភពលោក ពីគ្រប់ទិសទី អញ្ជើញទៅប្រារព្វបុណ្យនេះនៅឯទីក្រុងម៉ាក្កះ ប្រទេសអារ៉ាប៊ីសាអូឌីត៕
