(កំពង់ស្ពឺ)៖ ក្រុមការងារកម្មវិធីអភិវឌ្ឍន៍ភាពជាអ្នកដឹកនាំនយោបាយ នៃសហភាពសហព័ន្ធយុវជនកម្ពុជារាជធានីភ្នំពេញបានសហការជាមួយសហភាពសហព័ន្ធយុវជនកម្ពុជា ខេត្តកំពង់ស្ពឺ បានរៀបចំពិធីផ្សព្វផ្សាយកម្មវិធីកម្ពុជាមុននឹងមានថ្ងៃនេះ (Cambodia- before & after) ជូនដល់យុវជនយុវនារី ក្នុងខេត្តកំពង់ស្ពឺជាលើកទីពីរ។
កម្មវិធីនេះបានទទួលការគាំទ្ររបស់លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា និងលោក សាយ សំអាល់ អនុប្រធានសហភាពសហព័ន្ធយុវជនកម្ពុជា និងជាប្រធានសហភាពសហព័ន្ធយុវជនកម្ពុជារាជធានីភ្នំពេញ។
កម្មវិធីនេះ បានប្រារព្ធធ្វើឡើងនៅព្រឹកថ្ងៃទី១៨ ខែកក្កដា ឆ្នាំ២០២៣ នៅសាលមហោស្រពនៃបណ្ណាល័យកំពង់ស្ពឺ ក្នុងក្រុងច្បារមន ខេត្តកំពង់ស្ពឺ ក្រោក្រោមអធិបតីភាពលោក ជា ច័ន្ទបរិបូរណ៍ រដ្ឋលេខាធិការក្រសួងព័ត៌មាន និងជាផលិតករវីដេអូឯកសារ កម្ពុជាមុននឹងមានថ្ងៃនេះ និងលោក សរ សុពុត្រា អភិបាលរងខេត្ត និងជាប្រធានសហភាពសហព័ន្ធយុវជនកម្ពុជាខេត្តកំពង់ស្ពឺ ព្រមទាំងមានការចូលរួមពីយុវជន យុវនារី និងសិស្សានុសិស្សជាង២០០នាក់។
តាមការបញ្ជាក់របស់លោក មាស សុភ័ណ្ឌ នាយករងកម្មវិធី និងជាអ្នកសម្របសម្រួលកម្មវិធី បានបញ្ជាក់ថា កម្មវិធីស្វែងយល់ការពិត៖ កម្ពុជាមុននឹងមានថ្ងៃ (Cambodia- before &after) ធ្វើឡើងក្នុងគោលបំណងបញ្ជ្រាបការយល់ដឹងបន្ថែមជូនដល់យុវជនជំនាន់ក្រោយ និយាយជារួម និងនិយាយដោយឡែកយុវជននៅក្រុងច្បារមន ខេត្តកំពង់ស្ពឺ ឱ្យយល់អំពីប្រវត្តិសាស្ត្រកម្ពុជាពីដំណាក់កាលមួយទៅដំណាក់កាលមួយ ជាពិសេសការរងទុក្ខវេទនារបស់ប្រជាជនកម្ពុជាក្នុងពេលប្រទេសជាតិធ្លាក់ចូលក្នុងភ្លើងសង្គ្រាមស៊ីវិល និងរបបដ៏សាហាវយង់ឃ្នងរបស់ខ្មែរក្រហម (សម័យ ប៉ុល ពត) និងការអភិវឌ្ឍប្រទេសជាតិឡើងវិញ ជាពិសេសការអភិវឌ្ឍរបស់ក្រុងច្បារមន ក្រោមម្លប់តេជោសន្តិភាព ព្រមជាកាពង្រឹងស្មារតីរបស់យុជនជំនាន់ក្រោយ អោយយល់ពីគុណតម្លៃនៃសន្តិភាព ចេះថែរក្សាសុខសន្តិភាព និងតម្កល់ផលប្រយោជន៍ជាតិជាធំ និងការពារសន្តិភាព ដើម្បីកុំឱ្យកម្ពុជាដើរជាន់ដានប្រវត្តិសាស្ត្រដូចពីអតីតកាលជាថ្មីម្តងទៀត។ ក្នុងកម្មវិធីនេះ មានការធ្វើបទបង្ហាញរបស់វាគ្មិន ការបញ្ចាំងវិដេអូឯកសារអំពីក្រុងច្បារមនពេលមានសង្គ្រាម និងពេលបច្ចុប្បន្ន និងការឆ្លើយសំណួររបស់អ្នកចូលរួមផងដែរ។
គួររំលែកផងដែរថា កម្មវិធីស្វែងយល់ការពិត៖កម្ពុជាមុននឹងមានថ្ងៃនេះ (Cambodia- before & after) នឹងចុះទៅរៀបចំកម្មវិធីនេះនៅតាម ឃុំសង្កាត់ ក្រុង ស្រុក ខណ្ឌនានាទូទាំងព្រះរាជាណាចក្រកម្ពុជា ដែលជាមូលដ្ឋានជាក់ស្ដែង ដែលរងគ្រោះដោយសង្គ្រាមស៊ីវិល និងរបបខ្មែរក្រហម ព្រមព្រមទាំងការអភិវឌ្ឍរបស់មូលដ្ឋានទាំងនោះ ក្រោយប្រទេសជាតិមានសុខសន្តិភាពពេញបរិបូរណ៍ ក្រោមការដឹកនាំប្រកបដោយបញ្ញាញាណវៀងវៃរបស់សម្តេចតេជោប្រមុខរាជរដ្ឋាភិបាលកម្ពុជា។
កម្មវិធីនេះបានរៀនចំបានចំនួន៤លេីករួចហើយទាំងលើកនេះរួមមាន៖ នៅអមលាំង ស្រុកថ្ពង និងក្រុងច្បារមន ខេត្តកំពង់ស្ពឺ ស្រុកចន្ទ្រា ខេត្តស្វាយរៀង និងស្រុកក្រឡាញ់ ខេត្តសៀមរាប៕
