(ភ្នំពេញ)៖ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា នៅថ្ងៃទី ១៧ ខែកក្កដា ឆ្នាំ២០២៣នេះ បានទូលថ្វាយនូវសារលិខិតថ្លែងអំណរព្រះរាជគុណថ្វាយចំពោះ សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល ព្រះប្រធានកិត្តិយសកាកបាទក្រហមកម្ពុជា ជាទីគោរពសក្ការៈដ៏ខ្ពង់ខ្ពស់បំផុត ដែលព្រះអង្គបានសព្វព្រះរាជហឫទ័យប្រោសព្រះរាជទានសៀវភៅ «សាក្សីប្រវត្តិសាស្ត្រ» ជាភាសាខ្មែរ ដែលជាកំណត់ហេតុសំណេរដើម ស្តីពីតថភាពនៃព្រះរាជបូជនីយកិច្ច ដើម្បីជាតិ មាតុភូមិ និងប្រជានុរាស្ត្រកម្ពុជារបស់ ព្រះករុណា ព្រះបរមរតនកោដ្ឋ និងសម្តេចព្រះមហាក្សត្រី ព្រះវររាជមាតាជាតិខ្មែរ ក្នុងព្រះរាជដំណើរពីទីក្រុងប៉េកាំងឆ្លងកាត់ការលំបាកនៅឆ្នាំ១៩៧៣ រយៈពេលមួយខែ ចូលមកកម្ពុជាដែលប្រទេសជាតិកំពុងស្ថិតក្នុងស្ថានភាពវឹកវរ។
ក្នុងសារលិខិតរបស់សម្តេចកិត្តិព្រឹទ្ធបណ្ឌិត បានគូសបញ្ជាក់ថា ៖ សៀវភៅ «សាក្សីប្រវត្តិសាស្ត្រ» នេះ គឺជាមរតកមិនអាចកាត់ថ្លៃបានសម្រាប់អ្នកនយោបាយ បញ្ញវន្ត និងប្រជានុរាស្ត្រកម្ពុជាគ្រប់ៗជំនាន់ ជាពិសេសភាពទន់ភ្លន់តែរឹងមាំនៅក្នុងព្រះរាជតម្រិះ ព្រះរាជយោបល់ និងព្រះរាជទស្សនៈគ្រប់ជ្រុងជ្រោយនៃព័ត៌មានក្នុងគ្រប់ស្ថានភាព និងកាលៈទេសៈនៃ សម្តេចព្រះមហាក្សត្រី ព្រះវររាជមាតាជាតិខ្មែរ គឺពិតជាបានរួមវិភាគទានយ៉ាងធំធេងដល់ការតស៊ូរំដោះជាតិ មាតុ ភូមិ ដើម្បីឯករាជ្យភាព អធិបតេយ្យភាព បូរណភាពទឹកដី និងក្តីសុខក្សេមក្សាន្តរបស់ប្រជានុរាស្ត្រកម្ពុជា ក្រោមម្លប់សន្តិភា ព។ ខ្ញុំម្ចាស់ សូមប្តេជ្ញាដង្ហែតាមព្រះរាជតម្រិះ និងព្រះរាជវីរៈគំរូនៃ សម្តេចព្រះមហាក្សត្រី ព្រះវររាជមាតាជាតិខ្មែរ ជារៀងដរាបតទៅ។
«ខ្ញុំម្ចាស់ សូមលំឱនកាយលើកហត្ថប្រណម ឧទ្ទិសបួងសួង ដល់គុណបុណ្យព្រះរតនត្រ័យ តេជះបារមីនៃវត្ថុស័ក្តិសិទ្ធិនានាក្នុងលោក ដួងព្រះវិញ្ញាណក្ខន្ធអតីតព្រះមហាក្សត្រ ព្រះមហាក្សត្រិយានីខ្មែរ គ្រប់ព្រះអង្គ ពិសេស ដួងព្រះវិញ្ញា ណក្ខន្ធ ព្រះមហាវីរក្សត្រ ព្រះបរមរតនកោដ្ឋ សូមជួយអភិបាល ប្រោះព្រំគ្រងរក្សា សម្តេចព្រះមហាក្សត្រី ព្រះវររាជមាតាជាតិខ្មែរ ជាទីគោរពសក្ការៈ ដ៏ខ្ពង់ខ្ពស់បំផុត សូមស្តេចទ្រង់ព្រះប្រកបដោយព្រះពុទ្ធពរទាំង ៤ប្រការ គឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ។ សូម សម្តេចព្រះមហាក្សត្រី ព្រះវររាជមាតាជាតិខ្មែរ ប្រោសព្រះរាជមេត្តាទទួលនូវអភិវន្ទនកិច្ច និងកតញ្ញូកតវេទិតាធម៌ដ៏ខ្ពង់ខ្ពស់បំផុត អំពីខ្ញុំម្ចាស់»។
ខាងក្រោមនេះជាសារលិខិតរបស់ សម្តេចកិត្តិព្រឹទ្ធបណ្ឌិត ទូលថ្វាយថ្លែងអំណរព្រះរាជគុណ សម្តេចព្រះមហាក្សត្រី ព្រះវររាជមាតាជាតិខ្មែរ៖
