(ស្វាយរៀង)៖ នាយរងប៉ុស្តិ៍រដ្ឋបាលឃុំថ្នាធ្នង់ ស្រុករំដួល ខេត្តស្វាយរៀង ជិះម៉ូតូដឹកស្មៅគោរអិលធ្លាក់ចូលប្រឡាបង្ហូទឹកស្លាប់យ៉ាងអាណោចអាធ័ម កាលពីវេលាម៉ោង ១៣៖៥៦នាទីល្ងាចថ្ងៃអាទិត្យទី១៦ ខែកក្កដា ឆ្នាំ២០២៣ ស្ថិតក្នុងចំណុចចំការអំពៅ ក្នុងភូមិកំពោតទូក ឃុំគគីសោម ស្រុកស្វាយទាប ខេត្តស្វាយរៀង។
សមត្ថកិច្ចនគរបាលស្រុកស្វាយទាប បានឲ្យដឹងថា មានករណីគ្រោះថ្នាក់ចរាចរណ៍ ដែលបង្កឡើងដោយខ្លួនឯងបានបណ្ដាលឱ្យស្លាប់ នៅចំណុចចំការអំពៅក្នុងភូមិកំពោតទូក ឃុំគគីសោម។ ជនរងគ្រោះឈ្មោះ ឡុង សុខា អាយុ ៣៦ឆ្នាំ មុខរបរជានាយរងប៉ុស្ដិ៍រដ្ឋបាលឃុំថ្នាធ្នង់ មានទីលំនៅសព្វថ្ងៃ ភូមិបុសតូច ឃុំពងទឹក ស្រុករំដូល ខេត្តស្វាយរៀង។
សមត្ថកិច្ចបានបន្តថា ក្រោយមានគ្រោះថ្នាក់ចរាចរណ៍រួចមក កម្លាំងបានចុះទៅដល់គោលដៅ រួចបានពិនិត្យទៅលើជនរងគ្រោះឃើញថា ជិះម៉ូតូដឹកស្មៅរអិលធ្លាក់ប្រឡាយបង្ហូទឹកដោយខ្លួនឯងមែន។ បច្ចុប្បន្នសព និងមធ្យោបាយត្រូវបានប្រគល់ទៅឲ្យ ក្រុមគ្រួសារយកទៅធ្វើបុណ្យតាមប្រពៃណី។
ប្រជាពលរដ្ឋនៅឃុំថ្នាធ្នង់ បានឲ្យដឹងថា នាយរងប៉ុស្តិ៍ ទ្បុង សុខា ជាមន្ត្រីប៉ូលីសដ៏ល្អមួយរូបនៅក្នុងមូលដ្ឋានឃុំដែល តែងតែចុះការពារសន្តិសុខជូនប្រជាពលរដ្ឋបានល្អប្រសើរ ហើយការបាត់បង់ជីវិតលោកនាពេលនេះ ពលរដ្ឋមានការសោកស្តាយជាពន់ពេក ដែលបាត់បង់ធនធានមន្ត្រីប៉ូលីសដ៏ល្អបែបនេះ៕
