(កណ្ដាល)៖ លោកបណ្ឌិត គុណ ញឹម អនុប្រធានទី១ គណៈអចិន្ត្រៃយ៍ក្រុមការងារគណបក្សចុះមូលដ្ឋានស្រុកកៀនស្វាយ និងគ្រួសារ នាព្រឹកថ្ងៃទី១៦ ខែកក្កដា ឆ្នាំ២០២៣នេះ បានអញ្ជើញជាអធិបតីក្នុងយុទ្ធនាការឃោសនារកសំឡេងឆ្នោតលើកទី៣ នៅតាមបណ្តាឃុំនានា ក្នុងស្រុកកៀនស្វាយ ខេត្តកណ្តាល។
ដំណើរអញ្ជើញមកដល់ឃុំបន្ទាយដែក របស់លោកបណ្ឌិត គុណ ញឹម ត្រូវបានទទួលស្វាគមន៍ដោយលោក ផា អេងវ៉េង អនុប្រធានទី៣ ក្រុមការងារគណបក្សចុះមូលដ្ឋានស្រុកកៀនស្វាយ និងជាប្រធានក្រុមការងារគណបក្សចុះមូលដ្ឋានឃុំបន្ទាយដែក ព្រមទាំងសមាជិក សមាជិកាគណបក្សប្រមាណ ៤០០នាក់។
លោកបណ្ឌិត គុណ ញឹម និងគ្រួសារ រួមដំណើរដោយសមាជិក សមាជិកាក្រុមការងារបក្សចុះជួយឃុំបន្ទាយដែក និងគណបក្ស ស្រុក ឃុំ និងភូមិ បានចុះតាមមណ្ឌល និងខ្នងផ្ទះប្រជាពលរដ្ឋ ដោយបានបង្រៀនពួកគាត់ពីការគូសសន្លឹកឆ្នោតឲ្យបានត្រឹមត្រូវនូវលេខរៀងទី១៨ ព្រមទាំងបានក្រើនរំលឹកដល់សមាជិក សមាជិកាបក្សទាំងអស់ឲ្យត្រៀមឯកសារសម្រាប់បោះឆ្នោត បង្កើនការផ្សព្វផ្សាយគោលនយោបាយបក្ស និងបង្រៀនគូសសន្លឹកឆ្នោតឲ្យបានត្រឹមត្រូវដល់ប្រជាពលរដ្ឋ អាជីវករលក់ដូរតាមផ្សារ បុគ្គលិកក្រុមហ៊ុននានានៅមូលដ្ឋានឃុំបន្ទាយដែក។
សូមជម្រាបថា គណៈកម្មាធិការជាតិរៀបចំការបោះឆ្នោត (គ.ជ.ប) បានកំណត់ ការឃោសនាបោះឆ្នោតត្រូវប្រព្រឹត្តទៅចាប់ពីថ្ងៃទី១ រហូតដល់ថ្ងៃទី២១ ខែកក្កដា ឆ្នាំ២០២៣ សរុបមានរយៈពេល២១ថ្ងៃ៕
