(ស្វាយរៀង)៖ នៅថ្ងៃទី១៦ ខែកក្កដា ឆ្នាំ២០២៣ ក្នុងនាមសម្តេចកិត្តិសង្គហបណ្ឌិត ម៉ែន សំអន គណបក្សប្រជាជនកម្ពុជា និងជាប្រធានក្រុមការងារគណបក្សចុះមូលដ្ឋានខេត្តស្វាយរៀង លោក លី ធុជ ប្រធានក្រុមការងារគណបក្ស ចុះមូលដ្ឋានក្រុងបាវិត ខេត្តស្វាយរៀង បានជួបសំណេះសំណាលជាមួយសកម្មជន សមាជិក សមាជិកាបក្សប្រមាណជា៥០០នាក់ ស្ថិតក្នុងសង្កាត់ប្រាសាទ ក្រុងបាវិត ខេត្តស្វាយរៀង។
ក្នុងឱកាសនោះ លោក លី ធុជ បានគូសបញ្ជាក់ថា «សន្លឹកឆ្នោតរបស់យើងម្នាក់មានតម្លៃណាស់ ហើយសន្តិភាពត្រូវការសន្លឹកឆ្នោតទាំងនោះពីយើង សូមឲ្យយើងទាំងអស់គ្នាទៅបោះឆ្នោតឲ្យបានគ្រប់ៗគ្នាដើម្បីសន្តិភាព។ ភូមិកម្ពុជាត្រូវការស្តាប់នូវសម្លេងសន្លឹកឆ្នោតពីបងប្អូនប្រជាពលរដ្ឋ នាថ្ងៃទី២៣ ខែកក្កដា ឆ្នាំ២០២៣ ដែលជាថ្ងៃបោះឆ្នោតនឹងមកដល់ក្នុងពេលឆាប់ៗនេះ»។
លោក លី ធុជ បានបន្តទៀតថា «យើងបោះឆ្នោតជូនសន្តិភាព យើងពិតជាបានគិតអំពីខ្លួនឯង ដើម្បីខ្លួនឯង គ្រួសារយើង និងសង្គមជាតិរបស់យើងទាំងមូល។ ក្មួយៗកម្មករ កម្មការិនី សិស្សានុសិស្ស និងប្រជាពលរដ្ឋ ត្រូវការសន្លឹកឆ្នោតគាំទ្រពីយើង ដើម្បីការងារ សាលារៀន ជីវភាពរស់នៅ និងអនាគតភ្លឺស្វាងរបស់ពួកគាត់»។
លោកថា «កង់សន្តិភាពរបស់យើង បានវិលទៅមុខជានិច្ច មិនអាចបញ្ឈប់បានទេ សូមឲ្យថ្ងៃទី២៣ ខែកក្កដា ឆ្នាំ២០២៣ យើងទាំងអស់គ្នា ត្រូវបញ្ចេញសិទ្ធិ និងអំណាចដើម្បីជាតិមាតុភូមិ និងជនរួមជាតិរបស់យើង។ បើយើងមិនទៅបោះឆ្នោតវិញនោះ មានន័យថាយើងចង់ ឲ្យដំណើរនៃកង់សន្តិភាពឈប់វិល និងដួលរលំ។
លោក លី ធុជ បានបញ្ជាក់ទៀតថា សម្តេចតេជោ ហ៊ុន សែន បានបង្កើតនូវសុខសន្តិភាពពេញលេញជូនប្រទេសកម្ពុជា និងប្រជាជនកម្ពុជា មកយ៉ាងលំបាក ដូចនេះយើងទាំងអស់មិនត្រូវជនណាម្នាក់មកបំផ្លាញសន្តិភាពនោះទេ។
ជាមួយគ្នានេះ លោក លី ធុជ បានបន្តអំពាវនាវឲ្យប្រជាពលរដ្ឋទាំងអស់បោះឆ្នោតសម្តេចតេជោ និងគណបក្សប្រជាជនកម្ពុជា ក៏ដូចជាគាំទ្រ លោក ហ៊ុន ម៉ាណែត ជានាយករដ្ឋមន្រ្តីសម្រាប់ពេលអនាគត ដើម្បីបន្តថែរក្សាសន្តិភាព និងការអភិវឌ្ឍន៍ឲ្យកាន់តែរីកចម្រើន៕
