(ភ្នំពេញ)៖ លោក ឈាង វុន ប្រធានគណៈកម្មការកិច្ចការបរទេស និងសហប្រតិបត្តិការ អន្តរជាតិ ឃោសនាការ និងព័ត៌មាន នៃរដ្ឋសភាកម្ពុជា បានស្នើដល់អគ្គនាយកដ្ឋានទេសចរណ៍ចិន ជួយជំរុញអ្នកទេសចរចិន ឲ្យមកទស្សនានៅកម្ពុជាឲ្យបានច្រើន ព្រមទាំងស្នើដល់ភាគីចិន ជួយបណ្តុះបណ្តាលធនធានមនុស្ស ខាងមគ្គុទេសក៍ទេសចរណ៍ភាសាចិនផងដែរ។
ការស្នើរបស់ លោក ឈាង វុន បានធ្វើឡើងនៅរសៀលថ្ងៃទី២៦ ខែកក្កដា ឆ្នាំ២០១៦ ក្នុងជំនួបពិភាក្សាការងាររវាងលោក និងលោក វ៉ាន សាវហ្វាង អគ្គនាយករង អគ្គនាយកដ្ឋានទេសចរណ៍ នៃក្រសួងទេសចរណ៍ចិន ប្រទេសចិន ក្នុងទីក្រុងប៉េកាំង ។
លោក ប្រធានគណៈកម្មាការកិច្ចការបរទេស បានលើកឡើងថា ជាការពិត ប្រជាពលរដ្ឋចិនជាច្រើនលាននាក់ បានធ្វើដំណើរទៅទស្សនានៅក្រៅប្រទេស ក្នុងមួយឆ្នាំៗ ក្នុងនោះ មានប្រទេសកម្ពុជាដែរ ប៉ុន្តែចំនួនអ្នកទេសចរចិនទៅកម្ពុជា នៅមានចំនួនតិចនៅឡើយ បើប្រៀបធៀបនឹងចំនួនប្រជាពលរដ្ឋចិន ដែលបានចេញទៅកម្សាន្ត នៅក្រៅប្រទេសនោះ។
លោក ឈាង វុន បានលើកឡើងពីសក្តានុពលវិស័យទេសចរណ៍ ដែលកម្ពុជា មានជម្រាបជូន ភាគីចិនថា កម្ពុជាជាប្រទេសដែលមានវប្បធម៌រុងរឿង ហើយស្នាដៃបុព្វបុរសខ្មែរ បានបន្សល់ទុកឲ្យកូនខ្មែរជំនាន់ក្រោយ នូវប្រាសាទបុរាណរាប់ពាន់ប្រាសាទ ពិសេសប្រាសាទអង្គវត្ត ដែលជាសក្តានុពលទេចរណ៍វប្បធម៌ ដ៏វិសេសវិសាល ក្រៅពីនេះទៀត កម្ពុជាមានទេសចរណ៍ធម្មជាតិ ដូចតំបន់ឆ្នេរសមុទ្រ តំបន់ភ្នំ ដែលសុទ្ធសឹងជាតំបន់ ដែលអ្នកទេសចរចង់ដឹងចង់ឃើញ។ ជាមួយគ្នានេះ តាមរយៈលោកផ្ទាល់ ក្រសួងទេសចរណ៍កម្ពុជា សូមស្នើដល់ភាគីចិនជួយបណ្តុះបណ្តាលធនធានមនុស្ស ដល់កម្ពុជា គឺការបណ្តុះបណ្តាលមគ្គុទេសក៍ទេសចរណ៍ ភាសាចិន ។
លោក វ៉ាន សាវហ្វាង បានទទួលយកនូវសំណើដែលបានលើកឡើងរបស់លោក ឈាង វុន ព្រមទំាងបានបានសន្យាថា នឹងដាក់សំណើទំាងនេះ ទៅកាន់ថ្នាក់ដឹកនាំនៃក្រសួងទេសចរណ៍ចិន ដើម្បីពិនិត្យជួយដល់ភាគីកម្ពុជា ។
លោក អគ្គនាយករង អគ្គនាយកដ្ឋានទេសចរណ៍ នៃក្រសួងទេសចរណ៍ប្រទេសចិន បានលើកឡើងថា ជារៀងរាល់ឆ្នាំនេះ មានអ្នកទេសចរចិន ប្រមាណ១២០លាននាក់ បានចេញទៅដើរកម្សាន្ត នៅតាមបណ្តាប្រទេសនានានៅលើពិភពលោក ក្នុងនោះ សម្រាប់កម្ពុជាបើតាមតួលេខដែលលោកទទួលបាន គឺមានប្រមាណ ៨០ម៉ឺននាក់ កាលពីឆ្នាំ២០១៥។
លោក វ៉ាន សាវហ្វាង បានថ្លែងថា ដើម្បីទាក់ទាញភ្ញៀវទេសចរចិន កម្ពុជាគួរតែមានមគ្គុទេសក៍ទេសចរណ៍ភាសាចិនឲ្យបានច្រើន ហើយដាក់ស្លាកសញ្ញា និងឯកសារនានាជាភាសាចិន នៅតាមសណ្ឋាគារ ភោជនីយដ្ឋាន និងរមណីយដ្ឋាន ដើម្បីងាយស្រួលដល់ជនជាតិចិន ។ លោកបន្តថា បញ្ហាសន្តិសុខ និងសុវត្ថិភាព ក៏ជាកត្តាសំខាន់ផងដែរ។
លោក វ៉ាន សាវហ្វាង បានគូសបញ្ជាក់ថា អគ្គនាយកដ្ឋានទេសចរណ៍ចិន ស្វាគមន៍ក្នុងការបង្កើនកិច្ចសហប្រតិបត្តិការជាមួយនឹងក្រសួងទេសចរណ៍កម្ពុជា។ លោកបានឲ្យដឹងថា អគ្គនាយកទេសចរណ៍ចិន បានបង្កើតនូវទីភ្នាក់ងារទេសចរណ៍ចិន ក្នុងទីក្រុងបាងកក ប្រទេសថៃ ដើម្បីជំរុញវិស័យទេសចរណ៍ចិន ក្នុងតំបន់អាស៊ីអាគ្នេយ៍ ហើយលោកសង្ឃឹមថា កម្ពុជានឹងជួយគាំទ្រដល់ទីភ្នាក់ងារនេះ។
សូមបញ្ជាក់ថា ក្នុងជំនួបរវាងសម្តេចអគ្គមហាពញាចក្រី ហេង សំរិន ជាមួយនឹងថ្នាក់ដឹកនាំកំពូលនៃប្រទេសចិន ភាគីចិនក៏បានសន្យាថា នឹងជួយជំរុញឲ្យភ្ញៀវទេសចរចិន យ៉ាងហោចណាស់ ១លាននាក់ បានមកកម្សាន្តនៅប្រទេសកម្ពុជាក្នុងមួយឆ្នាំៗ៕
