(ភ្នំពេញ)៖ លោកបណ្ឌិតស្ថាបត្យករ លី រស្មី រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ មានបំណងចង់ចូលរួមរៀបចំប្រព័ន្ធនគរូបនីយកម្មក៏ដូចជាហេដ្ឋារចនាសម្ព័ន្ធនានាក្នុងរាជធានីភ្នំពេញ ដើម្បីបង្កើនសោភណភាព និងមេត្រីភាពនៃការរស់នៅរបស់ប្រជាពលរដ្ឋ។
លោកបណ្ឌិត លី រស្មី ជាស្ថាបត្យករវ័យក្មេងមួយរូប ដែលកំពុងល្បីឈ្មោះតាមរយៈការសាងសង់អគារធំៗរបស់ស្ថាប័នរដ្ឋដូចជាក្រសួងរៀបចំដែនដី នគរូបនីយកម្ម និងសំណង់ ក៏ដូចជាវិមាន «៧មករា» ដែលជាទីស្នាក់ការកណ្តាលរបស់គណបក្សប្រជាជនកម្ពុជា រួមនិងសំណង់អគារជាច្រើនទៀត។ លោក លី រស្មី ក៏ជាអ្នកដែលបានចូលរួមចំណែកក្នុងការរៀបចំហេដ្ឋារចនាសម្ព័ន្ធ និងរូបសំណាកនានានៅខេត្តព្រះសីហនុ។ បន្ថែមពីលើនោះ លោកក៏បានចូលរួមកែលំអប្រឡាយទឹកស្អុយនៅខេត្តសៀមរាប ទៅជាកន្លែងកម្សាន្តរបស់ប្រជាពលរដ្ឋផងដែរ។
តាមរយៈស្នាដៃទាំងអស់នេះ បាននាំឱ្យលោកទទួលបានការកោតសរសើរច្រើនពីមហាជន។
ក្នុងបទសម្ភាសន៍ជាមួយ Fresh News លោក លី រស្មី ក៏បានបង្ហាញបំណងចូលរួមរៀបចំនគរូបនីយកម្មក្នុងរាជធានីភ្នំពេញឱ្យកាន់តែល្អប្រសើរផងដែរ។ ក្នុងនោះលោក លី រស្មី ចង់ឃើញរាជធានីភ្នំពេញបង្កើតភាពបៃតងឱ្យបានកាន់តែច្រើន ដើម្បីលើកកម្ពស់បរិស្ថាន និងបង្កើតមេត្រីភាពជាមួយប្រជាពលរដ្ឋ ក៏ដូចជាអ្នកទេសចរ។
បន្ថែមពីការចង់ឃើញរាជធានីភ្នំពេញ បង្កើនភាពបៃតងហើយនោះ ស្ថាបត្យករល្បីឈ្មោះបោះសំឡេងរូបនេះ ក៏មានបំណងចង់កែលំអប្រឡាយទឹកស្អុយក្នុងរាជធានីភ្នំពេញ ទៅជាកន្លែងកម្សាន្តសម្រាប់ប្រជាពលរដ្ឋ ដូចប្រឡាយទឹកក្នុងខេត្តសៀមរាប ដែលលោកបានកែប្រែនោះ៕
