(ភ្នំពេញ)៖ ក្រោមការដឹកនាំរបស់រាជរដ្ឋាភិបាល កម្ពុជាអភិវឌ្ឍន៍ រីកចម្រើនស្ទើរគ្រប់វិស័យ ដែលវិស័យទាំងនោះកំពុងមានវឌ្ឍនភាពរីកចម្រើន ស្មើមុខស្មើមាត់ លើឆាកអន្តរជាតិ។ ក្នុងនោះវិស័យអប់រំរបស់កម្ពុជា បាននិងកំពុងវិវឌ្ឍន៍ទៅមុខយ៉ាងលឿន មិនចាញ់ប្រទេសនានា លើពិភពលោកឡើយ។

តាមរយៈការប្រកួតប្រជែងថ្នាក់អន្តរជាតិជាច្រើន ដែលមានសិស្ស និស្សិតកម្ពុជាចូលរួមនោះ ពួកគេតែងតែនាំមកវិញ នូវកិត្តិយសជូនជាតិ។

ជាក់ស្តែង យុវសិស្សរបស់កម្ពុជា ២រូបទៀតហើយ ដែលលើកមុខមាត់កម្ពុជា តាមរយៈការទទួលបានមេដាយប្រាក់ និងសំរិទ្ធ ពីការប្រកួតគណិតវិទ្យាអន្តរជាតិ នៅសហរដ្ឋអាមេរិក។

សិស្សឆ្នើមរបស់ ScienceEdu យុវតី ហេង បញ្ញាវត្តី (Heng Panha Votey) និងយុវជន ហេង បញ្ញាវឌ្ឍនៈ (Heng Panha Vathanak) ទើបទទួលបានជ័យលាភីមេដាយប្រាក់ និងមេដាយសំរិទ្ធិ ក្នុងការប្រឡងគណិតវិទ្យាអន្តរជាតិ Copernicus Olympiad 2023 ដែលប្រព្រឹត្តឡើងនៅទីក្រុង New York សហរដ្ឋអាមេរិក។

ការប្រកួតគណិតវិទ្យាអន្តរជាតិ Copernicus Olympiad 2023 នេះធ្វើឡើងរយៈពេល៥ថ្ងៃចាប់ពីថ្ងៃទី៩-១៣ ខែកក្កដា ឆ្នាំ២០២៣ ដោយមានការចូលរួមពីបេក្ខជនមកពីប្រទេសចំនួន២៣ប្រទេស៕