(បាត់ដំបង)៖ អគារសិក្សាមួយខ្នងដែលជាជំនួយរបស់សប្បុរសជនកូរ៉េខាងត្បូង បានសាងសង់ជិតរួចរាល់ជាស្ថាពរហើយ។ អគារសិក្សានេះ ស្ថិតនៅភូមិចុងប្រឡាយ ឃុំតាលាស់ ស្រុកមោងឫស្សី ខេត្តបាត់ដំបង។
អគារសិក្សានេះ ត្រូវបានក្រុងពាលីសាងសង់កាលពីនៅថ្ងៃសុក្រ ទី៣១ ខែមីនា ឆ្នាំ២០២៣។ អគារសិក្សានេះ មានចំនួន ៣បន្ទប់ ទំហំទទឹង ៩ម៉ែត្រ និងបណ្តោយ ២៤ម៉ែត្រ ចំណាយថវិកាប្រមាណ ៥ម៉ឺនដុល្លារអាមេរិក។
នៅរសៀលថ្ងៃ១៣ ខែកក្កដា ឆ្នាំ២០២៣ លោក កែវ ផុង ជំនួយការសម្តេចតេជោ ហ៊ុន សែន នាយករដ្ឋមន្ត្រីកម្ពុជា និងជាអ្នកផ្តួចផ្តើមគំនិត និងស្វែងរកថវិកាសម្រាប់សាងសង់អគារសិក្សាខាងលើ ព្រមទាំងជនជានកូរ៉េខាងត្បូង ដែលជាម្ចាស់ថវិកា បានអញ្ជើញចុះពិនិត្យអគារសិក្សា និងបានសំណេះសំណាលជាមួយលោកគ្រូ អ្នកគ្រូ អាណាព្យាបាល និងសិស្សានុសិស្សនៅទីតាំងអគារសិក្សាដោយផ្ទាល់។
នៅក្នុងពិធីនោះ ជនជាតិកូរ៉េជាម្ចាស់ជំនួយ បានបង្ហាញអារម្មណ៍រីករាយជាខ្លាំង ដែលបានចូលរួមចំណែកលើកកម្ពស់ការអប់រំនៅតាមទីជនបទក្នុងប្រទេសកម្ពុជា តាមរយៈការជួយសាងសង់អគារសិក្សាខាងលើនេះ។
ជនជាតិកូរ៉េជាម្ចាស់ជំនួយ បង្ហាញក្តីរំពឹងថា អគារសិក្សានេះ នឹងធ្វើឱ្យលោកគ្រូ អ្នកគ្រូ ព្រមទាំងសិស្សានុសិស្សទាំងអស់រីករាយក្នុងការសិក្សា ហើយជួយលើកទឹកចិត្តឱ្យសិស្សទៅសិក្សាផងដែរ។
លោក កែវ ផុង បានរំលឹកពីទំនាក់ទំនងរវាងកម្ពុជា និងកូរ៉េខាងត្បូង ដែលជាការផ្តួចផ្តើមឡើងដោយសម្តេចតេជោ ហ៊ុន សែន កាលពីឆ្នាំ១៩៩៧។ លោក បានគូសរំលេចថា ទំនាក់ទំនងកម្ពុជា និងកូរ៉េខាងត្បូង ក៏បានវិវឌ្ឍន៍កាន់តែល្អប្រសើរជាលំដាប់ពីមួយឆ្នាំទៅមួយឆ្នាំ។ តាមរយៈទំនាក់ទំនងល្អនេះ ក៏បានធ្វើ ឱ្យទំនាក់ទំនងរវាងប្រជាពលរដ្ឋ និងប្រជាពលរដ្ឋនៃប្រទេសទាំងពីរកាន់តែល្អប្រសើរផងដែរ។
សម្រាប់លោក កែវ ផុង ការដែលជនជាតិកូរ៉េខាងត្បូងមកជួយសាងសង់អគារសិក្សាខាងលើនេះ ផ្តើមចេញពីទំនាក់ទំនងល្អរវាងប្រជាពលរដ្ឋ និងប្រជាពលរដ្ឋ។ ជួសមុខឱ្យលោកគ្រូ អ្នកគ្រូ អាណាព្យាបាល និងសិស្សានុសិស្ស លោក កែវ ផុង បានថ្លែងអំណរគុណយ៉ាងជ្រាលជ្រៅដល់សប្បុរសជនកូរ៉េខាងត្បូង ដែលបានជួយសាងសង់អគារសិក្សាខាងលើនេះ។
នៅក្នុងពិធីនោះលោក កែវ ផុង ក៏បានរំលឹកប្រជាពលរដ្ឋឱ្យទៅចូលរួមបោះឆ្នោតនៅថ្ងៃទី២៣ ខែកក្កដា ឆ្នាំ២០២៣ផងដែរ៕
