(កំពង់ចាម)៖ សមិទ្ធផលនានានៅទេវស្ថានលោកតាបង់បត់ ភូមិដើមស្តៅ ជាប់ព្រំប្រទល់ ភូមិប៉ាក់ណាម ឃុំពង្រ ស្រុកកោះសូទិន ខេត្តកំពង់ចាម ដែលទើបកសាងហើយរួចរាល់ ត្រូវបានប្រារព្ធពិធីបុណ្យឆ្លង និងកាត់ខ្សែបូរណ៍សម្ពោធ នៅព្រឹកថ្ងៃទី១២ ខែកក្កដា ឆ្នាំ២០២៣នេះ ក្រោមអធិបតីភាពលោក ខៀវ កាញារីទ្ធ រដ្ឋមន្រ្តីក្រសួងព័ត៌មាន និងជាប្រធានក្រុមការងាររាជរដ្ឋាភិបាលកម្ពុជា ចុះមូលដ្ឋានស្រុកកោះសូទិន ខេត្តកំពង់ចាម និងលោកស្រី ខៀវ ទេព រង្សុី កាញារីទ្ធ ព្រមទាំងវត្តមានលោក ងួន សុីមអាន តំណាងរាស្ដ្រមណ្ឌលកំពង់ចាម។

តាមការលើកឡើងរបស់លោក ខឹម ប៉ោទាង មេឃុំពង្រ ស្រុកកោះសូទិន បានជម្រាបជូនឲ្យដឹងខ្លះៗពីប្រវត្តិ នៃទេវស្ថានលោកតាបង់បត់ នេះមានមកតាំងពីយូរលង់ណាស់មកហើយ ដែល មិនអាចស្រាវជ្រាវប្រវត្តិដើមបានច្បាស់លាស់ឡើយ ដោយចាស់ទុំដែលដឹងរឿងច្បាស់នោះគាត់បានលាចាក លោកនេះអស់ទៅហើយ។ តាមរយៈការស្រាវជ្រាវបានត្រឹមការចងចាំរបស់អ្នកភូមិជុំវិញរមណីដ្ឋាន នេះប៉ុណ្ណោះ ហើយអ្នកភូមិតែងហៅថា លោកតាបង់បត់ដើមស្លែង ព្រោះមានដើមស្លែងធំៗនៅរហូតមកដល់សព្វថ្ងៃនេះ មានអាយុកាលជាងរយឆ្នាំមកហើយ។

នៅក្នុងរមណីដ្ឋាននេះមានអាស្រមចំនួន៤ គឺ៖

* អាស្រមទី១ ស្ថិតនៅក្រោមដើមស្លែងដ៏ធំមួយ ហើយអ្នកស្រុកតែងហៅអាស្រមនោះថាអាស្រម លោកតាបង់បត់ឬលោកតា នាយល្វេទ ឬលោកតាចៅហ្វាយស្រុក ព្រោះព្រះទេវស្ថាននេះជាទី តាំងស្រុកនៃទេវស្ថានទាំងឡាយក្នុងស្រុកកោះសូទិន។ ក្នុងអាស្រមក៏មានលោក តាល្មូលចុក លោកតាស្មៀនម៉ុក និងលោកតាស្មៀនម៉ែន គង់នៅរួមគ្នាចំនួន៤អង្គ។

* អាស្រមទី២ នៅជាប់អាស្រមទី១ លោកតាបង់បត់ឬលោកតា នាយល្វេទ ឬលោកតា ចៅហ្វាយស្រុក ជាអាស្រមលោកជំទាវកន្ទោងខៀវ និងលោកជំទាវតី។
* អាស្រមទី៣ កាលដើមឡើយស្ថិតនៅទិសខាង លិច ជាប់មាត់ទន្លេក្រោមដើមពោធិ៍ គឺ អាស្រម លោកតាខ្នងគីរី ឬលោកតាចិន (នៅពេលរៀបអាពាហ៍ពិពាហ៍ អ្នកស្រុកតែងយកដង្វាយ ទៅថ្វាយ និងថ្វាយបង្គំសុំសេចក្តីសុខ)។
* អាស្រមទី៤ កាលដើមឡើយនៅជាប់អាស្រម លោកតាគីរី ឬលោកតាចិន គឺអាស្រម លោកតាក្រុងសំរិត។

ក្រោយមកដើមពោធិ៍នោះចាស់ ដល់អាយុកាល ក៏បានបាក់ ហើយលោកតាឧបាសក ខៀវ បេ ក៏បានលើកយកមកដាក់នៅខាងកើតផ្លូវវិញ ហើយឥឡូវលោក ខៀវ កាញារីទ្ធ និងភរិយា ក៏បានប្តូរទីតាំងមកសាងសង់អាស្រមទាំងពីរនេះ ទៅដាក់ជាប់និងអាស្រមលោកជំទាវតី និងលោកជំទាវ កន្ទោងខៀវវិញ។ លោកតាបង់បត់ទាំងបួនអាស្រមនេះ អ្នកស្រុកមានជំនឿយ៉ាងមុតមាំណាស់រាល់ពេល ស្រុកកើតកលយុគផ្សេងៗ មានជំងឺដំកាត់ រាតត្បាតឬមានទុក ភ័យផ្សេងៗ អ្នកស្រុកតែងតែមកបន់ស្រន់សុំសេចក្តីសុខ។

ជារៀងរាល់ឆ្នាំប្រជាពលរដ្ឋនៅភូមិដើមស្តៅ ភូមិប៉ាក់ណាម តែងធ្វើបុណ្យកម្សាន្ដភូមិ សុំទឹកភ្លៀង សុំសេចក្តីសុខពីលោកតា ហើយតែងបានដូចបំណងអ្នកស្រុកប្រាកដមែន។ ឥលូវអាស្រមទាំងបួននេះ លោក ខៀវ កាញារិទ្ធ និងលោកស្រី បានយកមកសាងសង់ទន្ទឹមគ្នាទាំងបួនហើយ។

ទេវស្ថានបត់បត់នេះ តាមការចង់ចាំរបស់អ្នកភូមិ រយៈកាលកន្លងមកមានលោកតា ឧបាសក ខៀវ លោកយាយឧបាសិកា សែត ដែលត្រូវជាជីតាទូត ជីដូនទួត របស់លោក ខៀវ កាញារីទ្ធ ជាអ្នកគ្រប់គ្រងថែរក្សាឧបត្ថម្ភគាំពារ លុះបន្ទាប់មកលោកតាឧបាសក ខៀវ បេ និងលោកយាយឧបាសិកា សេង ជាអ្នកថែរក្សា និងឧបត្ថម្ភគាំទ្របន្តទៀត បន្ទាប់មកទៀតគឺ លោកតាមហាឧបាសក ខៀវ ថន និងលោកយាយមហាឧបាសិកា ឡោ លាងហ៊ន់ ជាមាតាបិតា លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន និងលោកស្រី បានគាំទ្រ និងជួយឧបត្ថម្ភបន្តទៀត។

នៅតាំងពីឆ្នាំ២០១៩ លោក ខៀវ កាញារីទ្ធ និងលោកស្រី បានរៀបចំរមណីដ្ឋាន ឲ្យកាន់តែល្អប្រសើរឡើងដោយបានចាក់ដីពង្រាបទីតាំង ចាក់ សាប និងរៀបខឿនដើមពោធិ៍, សាងអាស្រមថ្មីចំនួន២ គឺអាស្រមលោកតាខ្នងគីរី ឬលោកតាចិន និងអាស្រមលោកតាក្រុងសំរិទ្ធ ដែលស្ថិតនៅទិសខាងលិចយកមកដាក់ទន្ទឹមនិងអាស្រមលោកតា បង់បត់ឬលោកតានាយល្វ ឬលោកតាចៅហ្វាយស្រុក, អាស្រមលោកជំទាវ កន្ទោងខៀវ និងលោកជំទាវ តី ធ្វើការជួសជុលអាស្រមលោកតាបង់បត់ អាស្រមលោកជំទាវ កន្ទោងខៀវ ឲ្យបានថ្មីល្អឡើងវិញ ចាក់សាបបន្ថែម រៀបចំការ៉ូ ធ្វើរបង ក្លោងទ្វារថ្មី ដាក់បង្គោលភ្លើងសូឡា លើកដំបូលថែមដែក ធ្វើថ្មម៉ាបដាក់សរចក្តីជូនដំណឹង សរុបជារួមក្នុងការកសាងសមិទ្ធផលទាំងនេះអស់ចំនួន ជាង២មុឺន៧ពាន់ដុល្លារ។

លោករដ្ឋមន្រ្តី ខៀវ កាញារីទ្ធ បានលើកឡើង ការរៀបចំកសាង ទេវស្ថានលោកតាបង់បត់ ឲ្យមានសោភណ្ឌភាពស្រស់ស្អាតឡើងវិញនេះ គឺដោយសារជាទីកន្លែងសក្តិស័ទ្ធ សម្រាប់បងប្អូនប្រជាពលរដ្ឋដែលរស់នៅតំបន់នេះ តាំងពីយូរណាស់មកហើយ ពិសេសនៅពេលបន់ស្រន់លេងភ្លេងខ្មែរ គឺដឹងតែមានភ្លៀងធ្លាក់មក។ ទីកន្លែងនេះក៏ជាកន្លែងសម្រាប់ ប្រជាពុទ្ធបរិស័ទរៀបចំពិធីបុណ្យទាន ជួបជុំគ្នា ប្រកបដោយភាពសប្បាយរីករាយ និងមានសេចក្តីសុខគ្រប់ក្រុមគ្រួសារ។

លោករដ្ឋមន្រ្តី បានធ្វើការរំលឹកឡើងវិញដល់ប្រជាពលរដ្ឋ ក្នុងស្រុកកោះសូទិន ដែលត្រូវបានក្រុមគ្រូពេទ្យ មូនិធិចក្ខុខ្មែរ ចុះមកធ្វើការពិនិត្យ និងព្យាបាលជំងឺភ្នែកឡើងបាយ និងដុះកន្ទុយថ្លែនដោយឥតគិតថ្លៃ កាលពីថ្ងៃទី២៣ ខែមិថុនា ឆ្នាំ២០២៣កន្លងមកនេះ សរុបជាង៣០០នាក់ ត្រូវត្រៀមខ្លួន ដើម្បីឡើងធ្វើការបកភ្នែក និងកាត់កន្ទុយថ្លែននៅភ្នំពេញ ក្នុងកំឡុងខែសីហាខាងមុខនេះ ហើយការចំណាយស្នាក់នៅ និងធ្វើដំណើរលោក ខៀវ កាញារីទ្ធ និងភរិយា ជួយចេញចំណាយទាំងអស់។

លោករដ្ឋមន្រ្តី ខៀវ កាញារីទ្ធ បានផ្តល់ជូន Router 4G ចំនួន៩គ្រឿង ដោយក្នុងនោះជូនដល់ សាលាស្រុកកោះសូទិន ១គ្រឿង បណ្តាឃុំ ទាំង៨ ដោយក្នុង១ឃុំ ១គ្រឿង ហើយដុំRouter នេះ ទុកសម្រាប់ប្រើប្រាស់ភ្ជាប់ Wi-Fi ប្រព័ន្ធ Internet៕