(កំពង់ស្ពឺ)៖ លោក សុខ ភា ប្រធានក្រុមការងារគណបក្សប្រជាជនកម្ពុជា ចុះមូលដ្ឋានស្រុកឱរ៉ាល់ បានក្រើនរំលឹកប្រជាពលរដ្ឋនៅស្រុកឱរ៉ាល់ កុំឱ្យបោះបង់ ឱកាសបោះឆ្នោតនាថ្ងៃទី២៣ ខែកក្កដា ឆ្នាំ២០២៣។ លោក សុខ ភា បានណែនាំពលរដ្ឋថា ការបោះឆ្នោតនាពេលខាងមុខជាឱកាសដ៏ពិសិដ្ឋក្នុងការជ្រើសរើសមេដឹកនាំប្រទេសដែលមានសមត្ថភាពរក្សាសុខសន្តិភាព និងនាំមកនូវការអភិវឌ្ឍន៍ថ្មីៗបន្តទៀត។
លោក សុខ ភា បានក្រើនរំលឹកបែបនេះ ក្នុងឱកាសចុះធ្វើយុទ្ធនាការរកសំឡេងឆ្នោតនៅឃុំត្រពាំងជោ ស្រុកឱរ៉ាល់នាព្រឹកថ្ងៃពុធ ទី១២ ខែកក្កដា ឆ្នាំ២០២៣នេះ។ ក្នុងពិធីនាព្រឹកមិញនេះ ក៏មានការអញ្ជើញចូលរួមពីលោក សេង ញ៉ក់ បេក្ខជនតំរាងរាស្ត្រមណ្ឌលខេត្តកំពង់ស្ពឺ, លោក លេង ផាលី អនុប្រធានទី១ ក្រុមការងារចុះមូលដ្ឋានស្រុកឱរ៉ាល់, លោកតូច យ៉ាន ប្រធានក្រុមការងារគណបក្សចុះមូលដ្ឋានឃុំត្រពាំងជោ និងលោក ចែម សារឹម ប្រធានគណៈកម្មាធិការបក្សស្រុក។
ក្នុងពិធីនោះក្រៅតែពីលើកបង្ហាញពីការរីកចម្រើនរបស់ប្រទេសជាតិ ក៏ដូចជាក្របខណ្ឌស្រុកឱរ៉ាល់ ក្រោមការដឹកនាំរបស់សម្តេចតេជោ ហ៊ុន សែន ប្រធានគណបក្សប្រជាជនកម្ពុជាហើយនោះ លោក សុខ ភា ក៏បានរំលឹកពីទុក្ខលំបាក របស់ប្រជាពលរដ្ឋស្រុកឱរ៉ាល់ដោយសារតែភ្លើងសង្គ្រាមផងដែរ។
ប្រធានក្រុមការងារចុះមូលដ្ឋានស្រុកឱរ៉ាល់មកពីគណបក្សប្រជាជនកម្ពុជារូបនេះ បានលើកឡើងថា ស្រុកឱរ៉ាល់ គឺជាស្រុកមួយដែលទើបបញ្ចប់ភ្លើងសង្គ្រាម តាមរយៈនយោបាយឈ្នះ-ឈ្នះ របស់សម្តេចតេជោក្នុងឆ្នាំ១៩៩៦ប៉ុណ្ណោះ។ ក្រោយបញ្ចប់ភ្លើងសង្គ្រាមហើយនោះ សម្តេចតេជោ ក៏បានដាក់ចេញគោលនយោបាយធ្វើសមាហរណកម្មតភ្ជាប់ស្រុកឱរ៉ាល់ទៅកាន់តំបន់ដទៃទៀត តាមរយៈការសាងសង់សង់ផ្លូវ ស្ពាន ការដោះមីន ជំរុញការវិនិយោគជាដើម។ តាមរយៈនយោបាយនេះហើយ ដែលធ្វើឱ្យស្រុកឱរ៉ាល់មានការអភិវឌ្ឍន៍ និងរីកចម្រើនដូចពេលបច្ចុប្បន្ន។
«នេះជាស្នាដៃ និងគុណតម្លៃនៃការដឹកនាំរបស់សម្តេចតេជោ ហ៊ុន សែន របស់បក្សប្រជាជនកម្ពុជា ដែលមិនអាចកាត់ថ្លៃបាននោះឡើយ។ ដូច្នេះត្រូវបន្តរួមគ្នាគាំទ្រការដឹកនាំរបស់សម្តេចតេជោ តាមរយៈការបោះឆ្នោតជូនសម្តេចតេជោ ដើម្បីបន្តទទួលបាននូវសុខសន្តិភាព និងជំរុញការអភិវឌ្ឍន៍បន្ថែមទៀតនៅក្នុងស្រុកឱរ៉ាល់»។ នេះជាការថ្លែងអំពាវនាវរបស់លោក សុខ ភា ទៅកាន់ប្រជាពលរដ្ឋ។
លោក សុខ ភា បានលើកទឹកចិត្តប្រជាពលរដ្ឋស្រុកឱរ៉ាល់ ទៅចូលរួមបោះឆ្នោតឱ្យបានគ្រប់គ្នានៅថ្ងៃទី២៣ ខែកក្កដា ឆ្នាំ២០២៣។ ជាពិសេសបោះជូនគណបក្សប្រជាជនកម្ពុជាលេខរៀងទី១៨ ដើម្បីផ្តល់ឱកាសជូនសម្តេចតេជោ ដឹកនាំ និងកសាងសង្គមកម្ពុជា រកនូវសេចក្តីសុខ និងសុភមង្គលជូនជាតិ និងប្រជាជន៕
