(ភ្នំពេញ)៖ លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានបញ្ជាទៅមន្ត្រីពាក់ព័ន្ធរបស់ក្រសួងកសិកម្ម ចាត់វិធានការឱ្យបានតឹងរឹងបំផុត ចំពោះជនខិលខូចដែលឈូសឆាយដីព្រៃលិចទឹក (តំបន់៣) ទំហំជាង ៥០ហិកតា ក្នុងភូមិសាស្ត្រស្រុកកំពង់លែង ខេត្តកំពង់ឆ្នាំង។
បទបញ្ជារបស់លោករដ្ឋមន្ត្រី បានធ្វើឡើងបន្ទាប់ពីទទួលបានព័ត៌មានតាមរយៈ Fresh News ពាក់ព័ន្ធការឈូសឆាយដីព្រៃលិចទឹកដែលជាជម្រកត្រីដ៏សំខាន់។
ពាក់ព័ន្ធករណីខាងលើនេះ លោក ពុំ សុថា ប្រតិភូរាជរដ្ឋាភិបាល ទទួលបន្ទុកជាប្រធានរដ្ឋបាលជលផល និងលោក អ៊ុក វិបុល ប្រធាននាយកដ្ឋានអភិរក្សជលផល បានឱ្យដឹងថា ពិតជាមានការឈូសឆាយទន្ទ្រានយកដីព្រៃលិចទឹកក្នុងតំបន់៣ពិតប្រាកដមែន។
លោក អ៊ុក វិបុល បានឱ្យដឹងថា ដីដែលរងការឈូសឆាយនោះជាតំបន់អភិរក្សជលផល ស្ថិតនៅក្នុងឃុំច្រណូក ស្រុកកំពង់លែង។
លោក ពុំ សុថា បានឱ្យផងដែរថា កាលពីថ្ងៃទី៦ ខែកក្កដា ឆ្នាំ២០២៣កន្លងទៅនេះ មន្ត្រីរដ្ឋបាលជលផលក្នុងខេត្តកំពង់ឆ្នាំង បានចុះទៅបង្ក្រាប និងដកហូតម៉ូតូរបស់អ្នកឈូសឆាយដីព្រៃលិចទឹកនោះ បានចំនួន៣គ្រឿងផងដែរ។
លោក ពុំ សុថា បានបញ្ជាក់ប្រាប់ Fresh News តាមទូរស័ព្ទថា «ឯកឧត្តមរដ្ឋមន្ត្រី យកចិត្តទុកដាក់ខ្លាំងណាស់លើការងារអភិរក្សធនធានជលផល។ ក្រោយទទួលបានព័ត៌មាននេះ ឯកឧត្តមបានចេញបញ្ជាឱ្យស្រាវជ្រាវរកមុខជនទន្ទ្រានដីព្រៃលិចទឹកទាំងនោះ ហើយត្រូវចាត់វិធានការតាមច្បាប់ឱ្យបានម៉ឺងម៉ាត់បំផុត»។
ពាក់ព័ន្ធនឹងដីអភិរក្សនៅតាមបណ្តាខេត្តជុំវិញបឹងទន្លេសាបនេះ រាជរដ្ឋាភិបាល ធ្លាប់បានចាត់កាត់ឆ្វៀលជូនប្រជាពលរដ្ឋរួចរាល់ហើយសម្រាប់កន្លែងដែលអាស្រ័យផលជាក់ស្តែង។ រាជរដ្ឋាភិបាល ក៏បានហាមផ្តាច់មិនឱ្យមានការឈូសឆាយទន្ទ្រានដីព្រៃលិចទឹកនៅក្នុងតំបន់៣ទៀតនោះឡើយ។
ដីព្រៃលិចទឹក គឺជាជម្រកសម្រាប់ត្រីពងកូនដ៏មានសារៈសំខាន់នៅក្នុងរដូវវស្សា។ បើដីព្រៃលិចទឹកនេះ ត្រូវបាត់បង់វាក៏នឹងប៉ះពាល់ដល់ជីវៈចម្រុះក្នុងបឹងទន្លេសាបផងដែរ។
នៅក្នុងកំលុងពេលដែលមន្ត្រីរាជការមមាញឹកនឹងកិច្ចការបោះឆ្នោត ក៏មានក្រុមជនខិលខូចឆ្លៀតឱកាសទៅឈូសឆាយទន្ទ្រានយកដីព្រៃលិចនៅជុំវិញបឹងទន្លេសាប។
បើតាមលោក ពុំ សុថា បានឱ្យដឹងថា ការកាប់ទន្ទ្រានដីព្រៃលិចទឹកក្នុងតំបន់៣ នៅក្នុងខេត្តកំពង់ឆ្នាំង មានទ្រង់ទ្រាយធំជាងគេ។ សម្រាប់ខេត្តដទៃទៀត មានក្នុងទ្រង់ទ្រាយតូច។
កាលពីខែមិថុនាកន្លងទៅនេះ សម្តេចតេជោ ហ៊ុន សែន បានដាក់ចេញបទបញ្ជាឱ្យចាត់វិធានការតឹងរឹងបំផុតចំពោះជន ដែលទន្ទ្រានយកសម្បត្តិធនធានធម្មជាតិដោយខុសច្បាប់ រួមទាំងការឈូសឆាយទន្ទ្រានយកដីព្រៃ ដីព្រៃលិចទឹកជាសម្បត្តិរបស់រដ្ឋផងដែរ៕
