(ពោធិ៍សាត់)៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា និងសម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ប្រធានកាកបាទក្រហមកម្ពុជា បានប្រគេនទៀនព្រះវស្សា និងទេយ្យទានមួយចំនួនដល់វត្តចំនួន១៨ នៅក្នុងខេត្តពោធិ៍សាត់។
ពិធីប្រគេនទៀនព្រះវស្សា និងទេយ្យទានសម្រាប់ព្រះសង្ឃត្រៀមចូលព្រះវស្សានាពេលខាងមុខនេះ ត្រូវបានអញ្ជើញរៀបចំឡើងដោយអ្នកឧកញ៉ា ទ្រី ភាព ទីប្រឹក្សាផ្ទាល់សម្តេចតេជោ ហ៊ុន សែន ប្រធានបក្សប្រជាជនកម្ពុជា និងអ្នកឧកញ៉ា គៀន ស្រីនាង នៅឯគេហដ្ឋានក្នុងស្រុកភ្នំក្រវាញ ខេត្តពោធិ៍សាត់ នាព្រឹកថ្ងៃចន្ទ ៨រោច ខែបឋមាសាឍ ឆ្នាំថោះ បញ្ចស័ក ព.ស ២៥៦៧ ត្រូវនឹងថ្ងៃទី១០ ខែកក្កដា ឆ្នាំ២០២៣។ ក្នុងពិធីនោះ ក៏មានការអញ្ជើញចូលរួមពីលោកឪពុក អ្នកម្តាយរបស់អ្នកឧកញ៉ា មន្ត្រីរាជការ កងកម្លាំងប្រដាប់អាវុធ ថ្នាក់ដឹកនាំ និងបុគ្គលិកក្រុម ព្រមទាំងញាតិមិត្តជិតឆ្ងាយយ៉ាងច្រើនកុះករ។
ក្នុងពិធីដ៏សែនរីករាយ និងប្រកបដោយសទ្ធាជ្រះថ្លានោះ អ្នកឧកញ៉ា ទ្រី ភាព និងអ្នកឧកញ៉ា គៀន ស្រីនាង បានបូជាទៀនធូបផ្កាភ្ញី ដល់ព្រះរតនត្រ័យ។ បន្ទាប់មកតាអាចារ្យក៏បានដឹកនាំធ្វើកិច្ចតាមពិធីសាសនា រួមមានការធ្វើបទនមសការព្រះរតនត្រ័យ សមាទានសីលជាដើម និងការប្រគេនទៀនព្រះវស្សា និងទេយ្យទានទៅដល់វត្តទាំង១៨។
បន្ទាប់ពីការវេរប្រគេននូវទៀនព្រះវស្សា និងទេយ្យទានហើយនោះ ព្រះសង្ឃក៏បានសូត្រមន្តប្រោសព្រំប្រសិទ្ធពរជ័យសិរីសួស្តីទាំងឡាយកើតមានទៅដល់សម្តេចតេជោ និងសម្តេចកិត្តិព្រឹទ្ធបណ្ឌិត ព្រមទាំងអ្នកឧកញ៉ា និងម្ចាស់ទៀន ហើយក៏សូមឧទ្ទិសកុសលផលបុណ្យទាំងឡាយបានដល់ញាតិការដែលបានចែកឋាន។
ការប្រគេទៀនព្រះវស្សា ជាប្រពៃណី និងជាទំនៀមទម្លាប់មួយរបស់ប្រជាពុទ្ធបរិស័ទខ្មែរ តែងតែធ្វើឡើងនៅមុនការចូលមកដល់នៃបុណ្យចូលព្រះវស្សា។ បុណ្យចូលព្រះវស្សានៅឆ្នាំនេះ នឹងចាប់ផ្តើមនៅថ្ងៃពុធ ១រោច ខែទុតិយាសាឍ ឆ្នាំថោះ បញ្ចស័ក ព.ស២៥៦៧ ត្រូវនឹងថ្ងៃទី២ ខែសីហា ឆ្នាំ២០២៣។ បុណ្យចូលព្រះវស្សាដែលមានរយៈពេលប្រមាណជា៣ខែនេះ ជាពេលវេលាមួយដែលព្រះសង្ឃពិបាកនិមន្តបិណ្ឌបាត្រព្រោះជារដូវភ្លៀង។ អាស្រ័យហេតុនេះហើយ ទើបប្រជាពុទ្ធបរិស័ទខ្មែរ តែងមានការរៀបចំពិធីប្រគេនទៀនព្រះវស្សាសម្រាប់អុជបំភ្លឺក្នុងទីអារាម ព្រមទាំងមានការប្រគេននូវទេយ្យទានផ្សេងៗសម្រាប់ជាចង្ហាន់ព្រះសង្ឃក្នុងកំលុងរដូវវស្សា ដែលពិបាកនិមន្តបិណ្ឌបាត្រនេះ។
ជារៀងរាល់ឆ្នាំមុនការចូលមកដល់ថ្ងៃបុណ្យចូលព្រះវស្សា សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត តែងបានរៀបចំប្រគេនទៀនព្រះវស្សា និងទេយ្យទានគ្រប់ទីអារាមនៅទូទាំងប្រទេស និយាយដោយឡែកសម្រាប់ខេត្តពោធិ៍សាត់ តាមរយៈអ្នកឧកញ៉ា ទ្រី ភាព ក៏តែងតែបានប្រគេនទៀនព្រះវស្សា និងទេយ្យទានដល់វត្តនានាមិនដែលខាននោះឡើយ។
វត្តទាំង១៨ ដែលត្រូវបានរៀបចំប្រគេនទៀនព្រះវស្សា និងទេយ្យទាននាព្រឹកមិញនេះ មកពីក្រុងពោធិ៍សាត់ ស្រុកបាកាន ស្រុកភ្នំក្រវាញ និងស្រុកវាលវែង។
ក្នុងពិធីនោះ ក្រៅតែពីប្រគេនទៀនព្រះវស្សាក្នុងមួយវត្តមួយគូហើយ អ្នកឧកញ៉ា ទ្រី ភាព និងអ្នកឧកញ៉ា គៀន ស្រីនាង ក៏មានសទ្ធា ទេយ្យទានផ្សេងៗទៀតរួមមាន៖ បច្ច័យបួនសម្រាប់ព្រះសង្ឃ ១៨អង្គ ក្នុងមួយអង្គ ១,៧៦០,០០០រៀល បច្ច័យសម្រាប់ចង្ហាន់ព្រះសង្ឃក្នុងមួយវត្ត ១,០០,០០០រៀល លាង ១៨កញ្ចប់ សម្ភារៈសិក្សា ១៨កញ្ចប់ អង្ករក្នុងមួយវត្ត ១០០គីឡូក្រាម មី ទឹកដោះគោខាប់ ត្រីខកំប៉ុង សាច់ជ្រូកផាត់ ទឹកត្រី ទឹកស៊ីអ៉ីវ ទឹកផ្លែឈើ ទឹកបរិសុទ្ធ។
ក្រៅតែពីការប្រគេនទៀនព្រះវស្សា និងទេយ្យទានទៅតាមទីអារាម និងព្រះសង្ឃហើយនោះ ក្នុងពិធីនាព្រឹកមិញនេះ ក៏មានការរៀបចំចែកទានដល់លោកយាយលោកតា ៣៤០នាក់ ក្នុង ១នាក់ទទួលបានថវិកា ១០ម៉ឺនរៀល និងក្រម៉ា២ផងដែរ។
បន្ថែមពីលើនោះ អ្នកឧកញ៉ា ទ្រី ភាព និងអ្នកឧកញ៉ា គៀន ស្រីនាង ក៏បានរៀបចំចង្ហាន់ថ្ងៃត្រង់ប្រគេនព្រះសង្ឃទាំង១៨អង្គ និងជូនដល់លោកយាយលោកតា ដែលបានអញ្ជើញចូលរួមក្នុងពិធីនោះផងដែរ។
ពិធីប្រគេនទៀនព្រះវស្សា និងទេយ្យទានត្រូវបានប្រព្រឹត្តទៅក្រោមបរិយាកាសដ៏សែនសប្បាយរីករាយ និងប្រកបដោយសទ្ធាជ្រះថ្លា។ លោកយាយលោកតា ក៏បានសម្តែងក្តីត្រេកអរចំពោះការទទួលបាននូវទានកើតចេញពីទឹកចិត្តដែលជាសទ្ធាដ៏ជ្រះថ្លានោះ៕
