(ហាណូយ)៖ នាយករដ្ឋមន្ត្រីវៀតណាម លោក Nguyen Xuan Phuc ទើបតែ​បានអនុម័ត​សំណើ​ ស្ដីអំពី​ការ​ដោះលែង​អ្នកទោសចំនួន​ ២០.០០០នាក់ ចាប់ពីពេលនេះរហូតដល់​ ឆ្នាំ២០១៨។ នេះបើយោងតាមការចេញ​ផ្សាយ របស់ទីភ្នាក់ងារព័ត៌មាន ចិនស៊ិនហួ ចេញផ្សាយនៅថ្ងៃទី២៨ ខែកក្កដា។

យោងតាមសំណើរបស់ក្រសួង សន្ដិសុខសាធារណៈវៀតណាមបានឲ្យដឹងថា ​សេចក្ដីអនុម័តរបស់​​លោក​នាយករដ្ឋមន្ត្រី ត្រូវបានដាក់ទៅកាន់តុលាការ កំពូលវៀតណាម ដើម្បីសម្របសម្រួល ទៅតាមលក្ខខណ្ឌ​មួយ​ចំនួន ដើម្បីដោះលែងអ្នកទោស ដោយផ្នែកទៅលើមូលដ្ឋាននៃទម្ងន់ទោស។

អ្នកទោសដែលត្រូវដោះលែង ឬមានអាទិភាពមុនគេនោះ មានដូចជាអ្នកទោសមានជំងឺធ្ងន់ធ្ងរ, ស្ត្រីមានផ្ទៃពោះ, អ្នកទោសដែលមានក្មេងអាយុតិចជាង ៣៦ខែ, អ្នកទោសដែលគ្មានគ្រួសារ, និងអ្នកទោស​ដែល​ត្រូវផ្តន្ទាទោសពីបទឧក្រិដ្ឋ​កម្រិតតិចតូច។

មន្ត្រីជាន់ខ្ពស់របស់រដ្ឋាភិបាលវៀតណាម បានអះអាងថា ការដោះលែងអ្នកទោសនេះ នឹងជួយកាន់បន្ថយការចំណាយ​ របស់រដ្ឋាភិបាល​វៀតណាមរហូតដល់ ៨,៩លានដុល្លារអាមេរិក​​​ ក្នុងមួយឆ្នាំ៕