(ភ្នំពេញ)៖ នៅលើបណ្តាញសង្គម Twitter នៅល្ងាចថ្ងៃចន្ទ ទី១០ ខែកក្កដា ឆ្នាំ២០២៣នេះ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានអំពាវនាវប្រជាពលរដ្ឋខ្មែរឱ្យរួមគ្នាដាំដើមឈើ។

លើគណនី Twitter ដែលជាមធ្យោបាយថ្មីសម្រាប់ការផ្តល់សារនានានោះ សម្តេចតេជោ បានសរសេរអំពាវនាវបែបនេះ «ខ្ញុំសូមអំពាវនាវដល់ជនរួមជាតិ​ទាំង​អស់។ សូមនាំគ្នាដាំដើមឈើរៀងរាល់ថ្ងៃ ដោយកុំយកតែថ្ងៃទី០៩ កក្កដា រុក្ខទិវា នោះទេ ហើយត្រូវនាំគ្នាជួយដាំដើមឈើគ្រប់ទីកន្លែង ពេញផ្ទៃប្រទេស នៅតាមសាលារៀន វត្តអារាម និងទីកន្លែងផ្សេងៗ និងជាពិសេសនាំគ្នាជួយទប់ស្កាត់នូវការកាប់បំផ្លាញព្រៃឈើឲ្យខានតែបាន»។

មិនត្រឹមតែជាខេមរភាសានោះទេ ក្នុងសាររបស់សម្តេចតេជោ ក៏បានរំលេចជាភាសាអង់គ្លេសផងដែរ «I would like to call on all compatriots to plant trees every day, not only on 9 July as Arbor Day. We shall plant trees everywhere in the country, in schools, pagodas and other places. Particularly, we must join hands to prevent deforestation»។

សូមបញ្ជាក់ថា រាជរដ្ឋាភិបាលកម្ពុជា បានយកចិត្តទុកដាក់ខ្ពស់លើការដាំ​ដើម​ឈើ ដើម្បីផ្តល់នូវគម្របបៃតង និងទ្រទ្រង់ដល់បរិស្ថាន។ កម្ពុជាតែងបានរៀបចំនូវ «រុក្ខទិវា» នាថ្ងៃទី៩ ខែកក្កដា ជារៀងរាល់ឆ្នាំ ដើម្បីបំផុសស្មារតីដាំដើមឈើ និងការពារការកាប់បំផ្លាញព្រៃឈើ។ «រុក្ខទិវា» តែងប្រារព្ធធ្វើឡើងក្រោមព្រះរាជាធិបតីភាពរបស់ព្រះមហាក្សត្រ។

របាយការណ៍បានបង្ហាញថា គិតចាប់ពីឆ្នាំ១៩៩២ មកដល់ឆ្នាំ២០២៣ តាមរយៈ «រុក្ខទិវា» បង្កើតបានសួនរុក្ខទិវា ៤៦២ហិកតា ហើយបង្កើតជាចម្ការឈើជាង ៨ម៉ឺនហិកតា៕