(ដាម៉ាស់)៖ ទូរទស្សន៍ស៊ីរី ដែលគាំទ្ររដ្ឋាភិបាលស៊ីរី បានចេញផ្សាយនៅព្រឹកថ្ងៃព្រហស្បតិ៍នេះថា ចំនួន​អ្នក​ស្លាប់ដោយការបំផ្ទុះគ្រាប់បែកផ្ទួនៗ នៅទីក្រុង Qamishli ភាគខាងជើងប្រទេសស៊ីរី បានកើនឡើងដល់ ៥២នាក់ ខណៈមនុស្ស ១៧០នាក់ បានរងរបួស។

យោងតាមការចេញផ្សាយដោយទីភ្នាក់ងារព័ត៌មានចិនស៊ិនហួ នៅថ្ងៃទី ២៨ ខែកក្កដានេះ បានឲ្យដឹងថា ករណីបំផ្ទុះគ្រាប់បែក​អត្តឃាតខាងលើ ត្រូវបានពួកសកម្មប្រយុទ្ធ ISIS បានអះអាងថា ខ្លួនជាអ្នកប្រព្រឹត្ត ដោយ​ពួកក្រុមជ្រុលនិយមមួយនេះ ចង់​កម្ទេចទីក្រុង Qamishli។

ទីភ្នាក់ងារព័ត៌មានក្នុងស្រុក SANA បានចេញផ្សាយថា រហូតមកដល់ពេលនេះ ក្រុមជួយសង្គ្រោះកំពុងតែ​​ប្រមូលសាកសព​ចេញពីគំនបាក់បែក​ ដោយទិដ្ឋភាពនេះ មើលទៅគួរឲ្យរន្ធត់ជាខ្លាំង។

គួរបញ្ជាក់ថា ការផ្ទុះបានកើតឡើងនៅក្បែរទីស្នាក់កងកម្លាំងសន្តិសុខរបស់ពួក Kurds ដែលគាំទ្រដោយសហរដ្ឋអាមេរិក។ ទីក្រុង Qamishli ភាគច្រើនត្រូវបានគ្រប់គ្រងដោយពួក Kurds ហើយក៏ជាគោលដៅវាយប្រហារពីក្រុមសកម្មប្រយុទ្ធរដ្ឋអ៊ីស្លាម ISIS ផងដែរ៕