(ក្រចេះ)៖ ក្មេងជំទង់ចំនួន៣នាក់ បានស្លាប់យ៉ាងអណោចអធម ក្នុងហេតុការគ្រោះថ្នាក់ចរាចរណ៍ រវាងម៉ូតូបុកជាមួយរថយន្ដកែច្នៃ។

ហេតុការណ៍នេះបានកើតឡើង នៅវេលាម៉ោង១២និង១០នាទីរសៀល ថ្ងៃទី៨ ខែកក្កដា ឆ្នាំ២០២៣ នៅលើផ្លូវក្រាលកៅស៊ូ ឆ្លូង-ដំរីផុង ត្រង់ចំណុចខ្សាច់ស ភូមិព្រៃគោ ឃុំដំរីផុង ស្រុកឆ្លូង ខេត្តក្រចេះ។ លើផ្លូវក្រាលកៅស៊ូ ឆ្លូង-ដំរីផុង។

យោងតាមរបាយការណ៍នគរបាលស្រុកឆ្លូង បានបញ្ជាក់ថា ករណីគ្រោះថ្នាក់ចរាចរណ៍នេះ កើតឡើងរវាងម៉ូតូបុករថយន្តកែច្នៃក្នុងទិសដៅបញ្រ្ចាសទិសគ្នា។

ម៉ូតូម៉ាកឌ្រីម C125 ពណ៌ខ្មៅ ស៊េរី២០២២ ពាក់ស្លាកលេខ ត្បូងឃ្មុំ 1J-6050 អ្នកបើកបរដោយឈ្មោះ ហឿន សុខចាន់ ភេទប្រុស អាយុ១៧ឆ្នាំ មានទីលំនៅភូមិស្រែទ្រៀក ឃុំដំរីផុង ស្រុកឆ្លូង ខេត្តក្រចេះ (ស្លាប់នៅកន្លែងកើតហេតុ)មិនពាក់មួកសុវត្ថិភាព។

អ្នករួមដំណើរទី០១៖ ឈ្មោះ យេត រតនា ភេទប្រុស អាយុ១៣ឆ្នាំ មានទីលំនៅជាមួយគ្នា(ស្លាប់នៅកន្លែងកើតហេតុ) មិនពាក់មួកសុវត្ថិភាព និងអ្នករួមដំណើរម្នាក់ទៀតឈ្មោះ សាក់ សិទ្ធ ភេទប្រុស អាយុ១៤ឆ្នាំ មានទីលំនៅជាមួយគ្នា (ស្លាប់នៅកន្លែងកើតហេតុ) មិនពាក់មួកសិវត្ថិភាព។

តាមរបាយការណ៍បញ្ជាក់ទៀតថា ម៉ូតូជនរងគ្រោះ បើកបរក្នុងទិសទិសដៅ ពីត្បូងទៅជើង មកដល់ចំណុចកើតហេតុខាងលើ ផ្លូវកោង បានវ៉ាជែងម៉ូតូ០១គ្រឿងទៀត បណ្តាលឱ្យរេចង្កូតទៅបុករថយន្តកែច្នៃគ្មានស្លាក់លេខកំពុងធ្វើដំណើរលើដងផ្លូវជាមួយគ្នា។

រថយន្ដនោះធ្វើដំណើរ ក្នុងទិសដៅពីជើងទៅត្បូងអ្នកបើកបរដោយជនមិនស្គាល់អត្តសញ្ញាណ ក្រោយពេលកើតហេតុ ទុករថយន្តចោលរត់គេចខ្លួនបាត់។

បច្ចប្បន្នវត្ថុតាងរថយន្ត និងម៉ូតូ ត្រូវបានកម្លាំងនគរបាលយកមករក្សាទុកបណ្តោះអាសន្ននៅអធិការដ្ឋាននគរបាលស្រុកឆ្លូង៕