(តាកែវ)៖ នៅថ្ងៃទី៥នៃយុទ្ធនាការឃោសនារកសំឡេងឆ្នោត លោក យឹម ណុលឡា សមាជិកគណៈកម្មាធិការកណ្ដាលគណបក្សប្រជាជនកម្ពុជា អនុប្រធានក្រុមការងារគណបក្សចុះមូលដ្ឋានខេត្តតាកែវ និងជាសហប្រធានក្រុមការងារគណបក្សចុះមូលដ្ឋានស្រុកព្រៃកប្បាស បានដឹកនាំសមាជិក សមាជិកបក្សប្រជាជនកម្ពុជា ចុះតាមខ្នងផ្ទះរបស់ប្រជាពលរដ្ឋបង្រៀនរបៀបគូសសន្លឹកឆ្នោត និងលើកបង្ហាញគុណសម្បត្តិរបស់បក្សប្រជាជនកម្ពុជា ដែលប្រជាពលរដ្ឋមិនត្រូវមើលរំលង។
លោក យឹម ណុលឡា បានចុះទៅតាមខ្នងផ្ទះរបស់ប្រជាពលរដ្ឋនៅក្នុងឃុំក្តាញ់ និងឃុំព្រៃល្វា ស្ថិតក្នុងស្រុកព្រៃកប្បាស។ ក្នុងដំណើរចុះតាមខ្នងផ្ទះនោះ លោក យឹម ណុលឡា និងក្រុមការងារ បានបង្រៀនប្រជាពលរដ្ឋពីរបៀបគូសសន្លឹកឆ្នោត និងក្រើនរំលឹកពលរដ្ឋកុំឱ្យជឿតាមការញុះញង់របស់ក្រុមជ្រុលនិយមគូសបំផ្លាញសន្លឹកឆ្នោត។
លោក យឹម ណុលឡា បានរំលឹកពីច្បាប់បោះឆ្នោតទើបកែប្រែថ្មីលើមាត្រាមួយចំនួន ដែលបានកំណត់ពីការផ្តន្ទាទោសចំពោះជនទាំងឡាយ ដែលបំផ្លាញដល់ដំណើរការបោះឆ្នោត។
បន្ថែមពីលើនោះ លោក យឹម ណុលឡា បានលើកបង្ហាញពីគុណសម្បត្តិជាច្រើនរបស់គណបក្សប្រជាជនកម្ពុជា ដែលប្រជាពលរដ្ឋត្រូវពិចារណា ហើយមិនត្រូវមើលរំលងនោះឡើយ។ លោកបានលើកឡើងថា គណបក្សប្រជាជន ជាគ្រឹះដ៏រឹងមាំក្នុងការរក្សាសុខសន្តិភាព ការពារសន្តិភាព ស្ថិរភាពនយោបាយ ការពារជាតិ ការពារសន្តិសុខសណ្ដាប់ធ្នាប់ សុវត្ថិភាពសង្គម។
ជាពិសេសគណបក្សប្រជាជនកម្ពុជា ការពាររាល់សមិទ្ធផលសង្គមជាតិ ដែលបក្សបានកសាងយ៉ាងលំបាករយៈពេលជាង៤០ឆ្នាំមកនេះឱ្យរឹងមាំស្ថិតស្ថេរគង់វង្ស ហើយបន្តជំរុញការអភិវឌ្ឍសង្គម-សេដ្ឋកិច្ច ឱ្យមានការរីកចម្រើនប្រកបដោយចីរភាព សមធម៌ និងបរិយាបន្ន ដូចក្នុងកម្មវិធីនយោបាយដែលបក្សបានដាក់ចេញ និងប្រកាសដោយសម្តេចតេជោ ហ៊ុន សែន ប្រធានបក្សប្រជាជនកម្ពុជាកាលពីថ្ងៃទី១ ខែកក្កដា កន្លងទៅ។
ក្នុងជំនួបជាមួយប្រជាពលរដ្ឋតាមខ្នងផ្ទះនោះ លោក យឹម ណុលឡា បានសង្កត់ធ្ងន់ពីតម្លៃនៃសុខសន្តិភាព។ លោកបានអះអាងថា មានសន្តិភាពទើបមានការអភិវឌ្ឍ និងលទ្ធិប្រជាធិបតេយ្យ។
លោក យឹម ណុលឡា ក៏បានគូសបញ្ជាក់នូវស្មារតីរបស់បក្សប្រជាជនកម្ពុជា ក្នុងការគាំទ្រសម្តេចតេជោជាបេក្ខភាពនាយករដ្ឋមន្ត្រី និងលោកបណ្ឌិត ហ៊ុន ម៉ាណែត ជាបេក្ខភាពនាយករដ្ឋមន្ត្រីបន្តវេន។
លោក យឹម ណុលឡា ក៏មិនភ្លេចដែរក្នុងការក្រើនរំលឹកពលរដ្ឋ អញ្ជើញទៅបោះឆ្នោតនៅថ្ងៃទី២៣ ខែកក្កដា ហើយបោះជូនគណបក្សប្រជាជនកម្ពុជាលេខរៀងទី១៨ ដើម្បីសុខសន្តិភាព វឌ្ឍនភាព និងវិបុលភាព៕
