(ភ្នំពេញ)៖ បុរសជនជាតិចិនម្នាក់ស្រវឹងស្រាដើរតាមផ្លូវ ហើយពុំដឹងជាមួរម៉ៅរឿងអ្វីមួយនោះទេ បានដកកាំភ្លើងខ្លីពីក្នុងកាបូបស្ពាយមួយចេញបាញ់មេឃជាច្រើនគ្រាប់ បង្កជាសម្លេងផ្ទុះលាន់កក្រើកទាំងយប់កណ្ដាលអាធ្រាត្រ បង្កឲ្យមានការភ្ញាក់ផ្អើល និងភ័យខ្លាចដល់ប្រជាពលរដ្ឋនៅក្បែរនោះ។ ហេតុការណ៍បានកើតឡើង នៅវេលាម៉ោង២យប់រំលងអាធ្រាត្រឈានចូលថ្ងៃទី០៥ ខែកក្កដា ឆ្នាំ២០២៣នេះ តាមផ្លូវបេតុងក្នុងភូមិក្បាលដំរី២ សង្កាត់កាកាបទី២ ខណ្ឌពោធិ៍សែនជ័យ។
ក្រោយកើតហេតុ លោកវរសេនីយ៍ឯក ម៉ន វុធី អធិការនគរបាលខណ្ឌពោធិ៍សែនជ័យ បានដឹកនាំកម្លាំងនគរបាលខណ្ឌ និងប៉ុស្តិ៍មួយចំនួន រួមសហការជាមួយកម្លាំងកងរាជអាវុធហត្ថខណ្ឌពោធិ៍សែនជ័យ បានចេញអន្តរាគមន៍ភ្លាមៗ។ បន្ទាប់មកបានធ្វើការឡោមព័ទ្ធទាំងយប់ ប៉ុន្តែពុំអាចចូលចាប់ខ្លួនជនបង្កបានភ្លាមៗនោះទេ ព្រោះជនដៃដល់បាញ់គំរាមមិនឲ្យចូលទៅជិតឡើង រហូតដល់ភ្លឺទើបចាប់បាន និងដកហូតអាវុធខ្លីម៉ាកកា៥៤មួយដើម រួមជាមួយគ្រាប់ជាង២០គ្រាប់ថែមទៀត។
ជនសង្ស័យបាញ់មេឃខាងលើឈ្មោះ LIU XIANRUI អាយុ៤២ឆ្នាំ ពុំទាន់ដឹងថាស្នាក់នៅកន្លែងណានោះទេ ហើយនគរបាលបានប្រាប់ឲ្យដឹងជំហ៊ានដំបូងមកថា បុរសនេះប្រើប្រាស់អាវុធគ្មានច្បាប់អនុញ្ញាត។ ម្យ៉ាងទៀតដោយសារតែស្រវឹងស្រាស ទើបបាញ់បោះសេរីបែបនេះ ប៉ុន្តែនៅពុំទាន់ដឹងថាតើនៅក្នុងខ្លួនមានផ្ទុកសារធាតុញៀន ឬអត់នៅឡើយទេ ខណៈនេះកម្លាំងនគរបាលកំពុងត្រៀមធ្វើតេស្តទឹកនោមរកសារធាតុញៀន ហើយកំពុងត្រូវបានឃុំខ្លួនបណ្ដោះអាសន្ន នៅអធិការដ្ឋាននគរបាលខណ្ឌពោធិ៍សែនជ័យ៕
