(ភ្នំពេញ)៖ កម្លាំងនគរបាលនៃអធិដ្ឋានខណ្ឌកំបូល បានធ្វើការល្បាតពួនស្ទាក់ក៏ប្រទះឃើញជនសង្ស័យម្នាក់ជិះម៉ូតូគួរឱ្យសង្ស័យក៏ហៅសួរនាំប៉ុន្តែជននោះមិនបានឈប់ឡើយហើយបន្ថែមល្បឿនយ៉ាងលឿនទើបសមត្ថកិច្ចដេញតាមឃាត់សួរនាំ ស្រាប់តែបែកធ្លាយពួកគេទើបលួចម៉ូតូរបស់អ្នកស្រុករួចរត់។
ភ្លាមៗនោះសមត្ថកិច្ចបានឃាត់ខ្លួន និងសួរនាំយកបក្ខពួកបន្ថែម៣នាក់ទៀតជាបន្តបន្ទាប់។
សមត្ថកិច្ចបានឱ្យដឹងនៅថ្ងៃទី៤ ខែកក្កដា ឆ្នាំ២០២៣នេះ ថាហេតុការណ៍ខាងលើបានកើតឡើងនៅចំណុចមុខតូបលក់ដូរ ផ្លូវបេតុង ភូមិស្ងួនពេជ្រ សង្កាត់កន្ទោក ខណ្ឌកំបូល រាជធានីភ្នំពេញ កាលពីថ្ងៃទី០១ ខែកក្កដា ឆ្នាំ២០២៣ វេលាម៉ោងប្រហែល ១៣៖២០នាទី។
សមត្ថកិច្ចបានបន្តថា ជនសង្ស័យចំនួន០៤នាក់ រួមមានឈ្មោះ៖
ទី១៖ ឈ្មោះ ធឿន ថុន ហៅ ធន ភេទប្រុស អាយុ២៤ឆ្នាំ មុខរបរជាងផ្សារដែក ស្នាក់នៅបន្ទប់ជួល ភូមិត្រពាំងឈូក សង្កាត់កន្ទោក ខណ្ឌកំបូល រាជធានីភ្នំពេញ។ (ឃាត់ខ្លួន មានសារធាតុញៀន)។
ទី២៖ ឈ្មោះ ប៊ន កែវមុន្នី ភេទប្រុស អាយុ ៣៧ឆ្នាំ មុខរបរ ជាងភ្លើង ស្នាក់នៅបន្ទប់ជួល ភូមិត្រពាំងឈូក សង្កាត់កន្ទោក ខណ្ឌកំបូល រាជធានីភ្នំពេញ (ឃាត់ខ្លួនមានសារធាតុញៀន)។
ទី៣៖ ឈ្មោះ លីម ឧត្តម ភេទប្រុស អាយុ ២៩ឆ្នាំ មុខរបរ មិនពិតប្រាកដ ស្នាក់នៅបន្ទប់ជួល ភូមិព្រៃជីសាក់ សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ (ឃាត់ខ្លួនមានសារធាតុញៀន)។
និងទី៤៖ ឈ្មោះ សុង ធិ ហៅ ក្រហុប ភេទប្រុស អាយុ២៦ឆ្នាំ មុខរបរ ជាងផ្សារដែក ស្នាក់នៅបន្ទប់ជួល ភូមិត្រពាំងឈូក សង្កាត់កន្ទោក ខណ្ឌកំបូល រាជធានីភ្នំពេញ (ឃាត់ខ្លួនមានសារធាតុញៀន) ដកហូតម៉ូតូជិះធ្វើសកម្មភាព ម៉ាកវ៉េវ ១១០ ពណ៌ខ្មៅ ពាក់ផ្លាកលេខ ភ្នំពេញ 1FT-0455 ដែកកែច្នៃសំប៉ែតចុងស្រួច ចំនួន ០១, គ្រឿងសម្រាប់ដោះខ្ចៅម៉ូតូ មួយចំនួន និងផ្លាកលេខ ចំនួន ០១សន្លឹក តាកែវ 1W-4966។
ចំណែកជនរងគ្រោះឈ្មោះ ឆន រស្មី ភេទប្រុស អាយុ២៥ឆ្នាំ មុខរបរលក់ដូរ ស្នាក់នៅផ្ទះគ្មានលេខ ផ្លូវបេតុង ភូមិស្ងួនពេជ្រ សង្កាត់កន្ទោក ខណ្ឌកំបូល រាជធានីភ្នំពេញ ម៉ូតូចោរលួចយកម៉ាកហុងដា សេ១២៥ សេរី០២០ ពណ៌ខ្មៅ ពាក់ផ្លាកលេខ តាកែវ 1W-4966 ។
សមត្ថកិច្ចបានបន្តថា ដំណើររឿងមុនពេលកើតហេតុ នៅថ្ងៃទី០២ ខែកក្កដា ឆ្នាំ២០២៣ វេលាម៉ោងប្រហែល ១១ និង ៣០នាទី សមត្ថកិច្ចរបស់អធិការដ្ឋាននគរបាលខណ្ឌកំបូល បានល្បាតក្នុងមូលដ្ឋាន ដល់ចំណុចផ្លូវចូលក្លោងទ្វារវត្តស្ងួនពេជ្រ (ផ្លូវបេតុង) ភូមិស្ងួនពេជ្រ (សង្កាត់កន្ទោក) ក៏ឃើញជនសង្ស័យឈ្មោះ សុង ធិ ហៅ ក្រហុប កំពុងបើកម៉ូតូម៉ាកហុងដាសេ១២៥ សេរី០២០ ឡើងតែម០២១ ពណ៌ខ្មៅ ពាក់ផ្លាកលេខ តាកែវ 1W-4966 (ជ្រុះផ្លាកលេខមួយចំហៀង) មានការសង្ស័យសមត្ថកិច្ចយើងបានហៅឲ្យឈប់ ភ្លាមនោះ ជនសង្ស័យឈ្មោះ សុង ធិ បានបន្ថែមល្បឿនម៉ូតូទៅមុខគេចខ្លួន។
រហូតដល់ចំណុច ដីវាលស្រែ ផ្លូវប្រឡាយ ភូមិព្រៃរមាសទី១ (សង្កាត់បឹងធំ) ក៏ឃាត់ខ្លួនជនសង្ស័យឈ្មោះ សុង ធិ បាន ឆែកឆែរ នៅក្នុងកាបូបស្ពាយ ឃើញមាន ស្លាកលេខម៉ូតូ ចំនួន ០២សន្លឹក (តាកែវ 1W-4966 និង ភ្នំពេញ 1JA-9571) រួចនាំយកមកសាកសួរបន្ត និងឈានទៅឃាត់ខ្លួនជនសង្ស័យបាន ចំនួន០៣នាក់ ឈ្មោះ ធឿន ថុន ហៅ ធន ភេទប្រុស អាយុ ២៤ឆ្នាំ, ឈ្មោះ ប៊ន កែវមុន្នី ភេទប្រុស អាយុ ៣៧ឆ្នាំ, ឈ្មោះ លីម ឧត្តម ភេទប្រុស អាយុ ២៩ឆ្នាំ រួមទាំងវត្ថុតាង ដែកកែច្នៃសំប៉ែតចុងស្រួច ចំនួន ០១ គ្រឿងសម្រាប់ដោះខ្ចៅម៉ូតូ មួយចំនួន ដែលកំពុងនៅក្នុងបន្ទប់របស់ឈ្មោះ សុង ធិ ភូមិទួលសាម៉(សង្កាត់កំបូល) ។
បច្ចុប្បន្នសមត្ថកិច្ចកំពុងកសាងសំណុំរឿងបញ្ជូនក្រុមជនសង្ស័យទៅកាន់តុលាការចាត់ការតាមផ្លូវច្បាប់៕
