(ក្រចេះ)៖ គម្រោង LASED III ថ្នាក់ជាតិ សហការជាមួយក្រុមការងារគម្រោង LASED III ថ្នាក់ខេត្ត ដឹកនាំដោយលោកបណ្ឌិត កៅ ម៉ាឌីឡែន ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តក្រចេះ នៅថ្ងៃទី៤ ខែកក្កដា ឆ្នាំ២០២៣នេះ បានជួបប្រជុំជាមួយអាជ្ញាធរភូមិ ឃុំ ព្រមទាំងប្រជាពលរដ្ឋប្រមាណ ២០០នាក់ នៅស្ថិតក្នុងឃុំក្បាលដំរី ស្រុកអូរគ្រៀង សែនជ័យ ខេត្តក្រចេះ ដេីម្បីគម្រោងបែងចែកដីដើម្បីសង្គមកិច្ច និងការអភិវឌ្ឍ។
សេដ្ឋកិច្ចដំណាក់កាលទី៣ គឺជាគម្រោងគាំទ្រទី១៖ ការងារសម្បទានដីសង្គមកិច្ច របស់រាជរដ្ឋាភិបាលកម្ពុជាផ្ដល់ជូនគ្រួសារក្រីក្រគ្មានដី នូវដីសម្រាប់សង់លំនៅឋាន និងធ្វើកសិកម្ម, ទី២៖ ការរៀបចំផែនការប្រើប្រាស់ដី នៅក្នុងឃុំ, ទី៣៖ ការចុះបញ្ជីដីសហគមន៍ជនជាតិ ដើមភាគតិច និងទី៤៖ ការអភិវឌ្ឍកសិកម្ម និងជីវភាព។
ជាក់ស្ដែងនារសៀលថ្ងៃទី០៤ ខែកក្កដា ឆ្នាំ២០២៣ ក្រុមការងារជូនដំណឹង និងលើកកម្ពស់ការយល់ដឹងពីកម្មវិធីសម្បទានដីសង្គមកិច្ច និងកំណត់លក្ខណៈវិនិច្ឆ័យជ្រើសរើសមុខសញ្ញអ្នកទទួលដីសម្បទានសង្គកិច្ចថ្នាក់មូលដ្ឋានក្នុងឃុំក្បាលដំរី ស្រុកអូរគ្រៀងសែនជ័យ ខេត្តក្រចេះ របស់គម្រោងបែងចែកដីដេីម្បីសង្គកិច្ច និងការអភិវឌ្ឍសេដ្ឋកិច្ចដំណាក់ទី៣ LASED III។
កញ្ញា ប៊ិន សុខលាភ មន្ត្រីទទួលបន្ទុកការងារមុខសញ្ញាអ្នកទទួលដីសម្បទានសង្គមកិច្ច នៃគម្រោង LASED III បានឡេីងធ្វេីការពន្យល់ដល់បងប្អនប្រជាពលរដ្ឋអំពីលក្ខណៈនៃការវិនិច្ឆ័យ និងនីតិវិធីជ្រេីសរេីសមុខសញ្ញាអ្នកទទួលដី ដែលត្រូវអនុវត្តន៍ក្នុងការវាយតម្លៃ និងដាក់ពិន្ទុអោយបានព្រឹមត្រូវ យុត្តិធម៌ មិនលំអៀង។
កញ្ញាបានបង្ហាញពីផែនការទាំង ១០ជំហាន នៃគម្រោង LASED III ជូនដលបងប្អនប្រជាពលរដ្ឋឱ្យកាន់តែយល់ច្បាស់ពីគម្រោងជាពិសេសទាក់ទងទៅនឹងការវិនិច្ឆ័យជ្រើសរើសមុខសញ្ញអ្នកទទួលដី។
កញ្ញា ប៊ិន សុខលាភ បានបញ្ជាក់បន្ថែមទៀតថា ចំពោះលក្ខខណ្ឌដើម្បីដាក់ពាក្យស្នើសុំដីសម្បទាន សង្គមកិច្ចថ្នាក់មូលដ្ឋាននេះ បងប្អូនត្រូវមានទី១៖ មានសញ្ជាតិខ្មែរ, ទី២៖ ជាមេគ្រួសារ ដែលមានអ្នកក្នុងបន្ទុកចាប់ពី ៣ (បី)នាក់ ឡើងទៅ និងរស់នៅផ្ទះតែ១, ទី៣៖ មានបណ្ណសមធម៌ (កម្រិតភាពក្រីក្រ ១ ឬ២), ទី៤៖ មិនមែនជាកម្មសិទ្ធិករនៃដីផ្សេង ជាជនមានពិការភាព អតីតយុទ្ធជន ឬយោធិនរំសាយ និងទី៥៖ ត្រៀមខ្លួនជាស្រេច សុខចិត្ត និងអាចចូលរួមជាមួយកម្មវិធីសម្បទានដីសង្គមកិច្ច។
ក្នុងឱកាសនោះ លោកបណ្ឌិត កៅ ម៉ាឌីឡែន ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តក្រចេះ និងជាប្រធានគម្រោង LASED III ថ្នាក់ខេត្ត បានបន្តថា ការផ្ដល់ដីឯកជនរបស់រដ្ឋ ដែលបានចុះបញ្ជីរួចហើយ ដល់ជនក្រីក្រដែលគ្មានដី ឬខ្វះខាតដីសម្រាប់សាងសង់លំនៅឋាន ឬធ្វើកសិកម្មជាលក្ខណៈគ្រួសារ ដែលអាចបង្កើតឱកាសការងារ និងទទួលបានប្រាក់ចំណូល។
ក្នុងនោះដែរ រាជរដ្ឋាភិបាលកម្ពុជាតែផ្ដោតសំខាន់លេីការយកចិត្តទុកដាក់ នៅតែដាក់ចេញនូវកម្មវិធីនយោបាយបែងចែក និងប្រើប្រាស់ដីរដ្ឋសម្រាប់គោលបំណងឯកជន និងសាធារណៈប្រកបដោយតម្លាភាព និងសមធម៌ ឆ្លើយតបទៅនឹងតម្រូវការរបស់ប្រជាពលរដ្ឋទូទៅ ជាពិសេសប្រជាជនក្រីក្រ ដែលគ្មានដី ខ្វះដីហើយត្រូវការដីពិតប្រាកដតាមរយៈកម្មវិធីសម្បទានដីសង្គមកិច្ច និងការធ្វើប្រទានកម្ម ដោយធានាឱ្យបាននូវសមធម៌ ស្ថិរភាពសង្គម សន្ដិសុខស្បៀង និងការសម្រួលដល់ការវិនិយោគ៕
