(បារាំង)៖ សុរាខ្មែរគឺជាឈ្មោះប្រេនស្រា របស់ក្រុមហ៊ុន ខ្មែរ យ៉ូរីយូ ខូលអិលធីឌី ដែលមានដើមកំណើតនៅខេត្តបាត់ដំបង និងបានចុះបញ្ជីជាផ្លូវការក្នុងឆ្នាំ២០១៣។

សុរាខ្មែរត្រូវបានបង្កើតឡើងក្នុងសហគមន៍មួយ ដែលសំបូរដោយគ្រាប់មីនច្រើនជាងគេ នៃភាគពាយ័ព្យប្រទេសកម្ពុជា ដែលបានយកធនធានដ៏សំបូរបែបក្នុងសហគមន៍ក្រោយការបោសំអាតមីនមកកែច្នៃធ្វើជាស្រាតាមបច្ចេកទេសបិតស្រាជប៉ុន រួមជាមួយបច្ចេកទេសបិតស្រាខ្មែរបុរាណ្យ ដោយធ្វើស្រាជាច្រើនប្រភេទដូចជា ស្រាអង្ករផ្កាម្លិះ ស្រាដំឡូង ស្រាចេក ស្រាស្វាយ ស្រាអំពៅ ស្រាខ្នុរជាដើម។

គួររំឭកផងដែរថា ឈ្មោះសុរាខ្មែរត្រូវបានស្ថាបនិកក្រុមហ៊ុន លោក តាកាយ៉ាម៉ា រីយ៉ូយិ ស្នើសុំអោយ លោក ប្រាជ្ញ ចន្ទ ជាអ្នកដាក់ឈ្មោះគ្រាដែលលោកធ្វើជាអភិបាលខេត្តបាត់ដំបង។

ក្រោមកិច្ចសម្របសម្រួលពី ក្រសួងការបរទេស និងសហប្រតិបត្តិការអន្តរជាតិកម្ពុជា សុរាខ្មែរបានទៅចូលរួមពិពរណ៍នៅក្រុងលីយ៉ុង ប្រទេសបារាំង (Sirha-Lyon expo 2023) កាលពីថ្ងៃ១៩-២៣ ខែមករា ឆ្នាំ២០២៣ ហើយមានការគាំទ្រយ៉ាងខ្លាំងក្លាក្នុងរយះពេល៥ថ្ងៃនេះពីសំណាក់ជនជាតិបារាំង និងជនបរទេសជាច្រើនទៀត ជាពិសេសជាជាតិខ្មែររស់នៅបារាំង។ កំឡុងពេលនោះ មានអ្នកជំនាញផ្នែកស្រា និងផ្នែកបាមែនជាច្រើនបានមកកាន់ស្តង់សុរាខ្មែរដើម្បីភ្លក់ និងកោតសរសើររសជាតិផ្លែកពីគេរបស់សុរាខ្មែរពីប្រទេសកម្ពុជា និងបានជំរុញអោយចូលរួមការប្រកួត Kura Master Competition 2023 នៅប្រទេសបារាំង នាគ្រានោះ។

សុរាខ្មែរបានរៀបចំ និងដាក់ពាក្យចូលរួមដោយចុះឈ្មោះស្រា៥ប្រភេទរួមមាន ស្រាអង្ករផ្កាម្លិះ ស្រាស្វាយ ស្រាចេក ស្រាដំឡូងពណ៌ស និងស្រាដំឡូងពណ៌ក្រហម កាលពីខែកុម្ភះ ឆ្នាំ២០២៣នេះ ហើយសុរាខ្មែរបានជ្រើសរើសប្រកួតក្នុងប្រភេទស្រាបិត Honkaku Shochu and Awamori ដែលមាន 8 Categories ដោយឡែក សុរាខ្មែរបានរើសតែ 3 Categories ក្នុងការប្រកួត មានដូចជា Rice Categories, Prestige Spirit Categoriesនិង Varieties Categories។ ការប្រកួតស្រារបស់ Kura Master ឆ្នាំ២០២៣នេះ មានស្រាចូលរូមប្រកួតសរុប 1379ដប មកពីក្រុមហ៊ុនបិតស្រាចំនួន503 ក្រុមហ៊ុន និងអ្នកដាក់ពិន្ទុ១៤៤នាក់។

រហូតមកដល់ថ្ងៃទី១២ ខែមិថុនា ឆ្នាំ២០២៣ Kura Master បានប្រកាសលទ្ធផលយ៉ាងភ្ញាក់់ផ្អើលបំផុតមួយនោះ គឺសុរាខ្មែរបានជាប់ចំណាត់ថ្នាក់ល្អ ៤ប្រភេទស្រា ដូចជា ចំណាត់ថ្នាក់កំពូល Jury Prize (Prix du Jury)និង មេដាយ Platinum ពីរប្រភេទស្រា គឺស្រាដំឡូងពណ៌ស និងស្រាចេក រីឯស្រាស្វាយទទួលបានមេដាយមាស ឯស្រាអង្ករទទួលបានមេដាយ Platinum ផងដែរ។ ជាសង្ខេប គឺសុរាខ្មែរទទួលបានមេដាយ TRIPLE PLATINUM MEDALS និង Gold Medal។

គួរបញ្ចាក់ផងដែរថា ពិន្ទុ មេដាយ Platinum ពី៩៣ដល់ ១០០ និងមេដាយមាស ពិន្ទុពី ៨០ដល់៩២។ ចំពោះកម្មវិធីប្រគល់មេដាយនឹងប្រព្រឹត្តទៅនៅថ្ងៃទី២៨ សីហា ២០២៣ នៅទីក្រុងបារីស ប្រទេសបារាំងខាងមុខ៕