(កណ្តាល)៖ នៅព្រឹកថ្ងៃទី២ ខែកក្កដា ២០២៣ លោកបណ្ឌិត កៅ ថាច ប្រធានក្រុមចលនាយុវជនគណបក្សប្រជាជនកម្ពុជា ប្រចាំស្រុកខ្សាច់កណ្តាល បានបន្តអញ្ជើញចុះសំណេះសំណាល សួរសុខទុក្ខ និងណែនាំការងារមួយចំនួនដល់សមាជិកសមាជិកា ដែលប្រចាំការនៅតាមមណ្ឌលសកម្មភាពមួយចំនួននៅក្នុងឃុំព្រះប្រសប់ ស្វាយរមៀត កោះចូរ៉ាម និងឃុំតាឯក ក្នុងស្រុកខ្សាច់កណ្ដាល ខេត្តកណ្តាល។

ឆ្លៀតក្នុងឱកាសនោះដែរ លោកបណ្ឌិត បានណែនាំ និងធ្វើការពន្យល់បន្ថែមដល់សមាជិក សមាជិកា និងសកម្មជនយុវជនបក្សនៅមូលដ្ឋានអោយបានជ្រួតជ្រាបអំពីគោលការណ៍សំខាន់ៗពាក់ព័ន្ធនឹងខ្លឹមសារនយោបាយដែលបានដាក់ចេញដោយគណបក្សប្រជាជន និងបានណែនាំអោយបងប្អូនធ្វើការពន្យល់បន្ថែមដល់បងប្អូនប្រជាពលរដ្ឋនៅតាមខ្នងផ្ទះ អំពីខ្លឹមសារសំខាន់ៗជាអាទិភាពដែលមានចែងនៅក្នុងកម្មវិធីនយោបាយនេះសម្រាប់អនុវត្តនៅអាណត្តិថ្មីដែលដឹកនាំដោយគណបក្សប្រជាជន។

កម្មវិធីនយោបាយនេះសម្រាប់អនុវត្តនៅអាណត្តិថ្មីដែលដឹកនាំដោយគណបក្សប្រជាជន មានដូចជា៖

* ផ្តល់សេវាថែទាំសុខភាព
* បណ្តុះបណ្តាលជំនាញបច្ចេកទេសដល់យុវជន ដើម្បីមានការងារធ្វើ
* កម្មវិធីជំនួយសង្គមសម្រាប់គ្រួសារក្រីក្រ
* អភិវឌ្ឍន៍សេដ្ឋកិច្ចក្រៅប្រព័ន្ធ
* កម្មវិធីផ្តល់ហិរញ្ញប្បទាន លើកស្ទួយផលិតកម្ម រកទីផ្សារកសិផល រក្សាស្ថិរភាពថ្លៃកសិផល មានស្រូវ មៀន ស្វាយចន្ទី ដំឡូង ពោត។ល។
* ការបញ្ជូនមន្រ្តីបច្ចេកទេសកសិកម្មទៅតាមឃុំ ដើម្បីជួយបច្ចេកទេសដល់កសិករ លើកកម្ពស់ផលិតភាពកសិកម្មរបស់កសិករ។

ជាមួយគ្នានោះ លោកបណ្ឌិត បានធ្វើការឧបត្ថម្ភភេសជ្ជៈ ទឹកសុទ្ធ មី តែ ជូនដល់បងប្អូនយុវជន នៅតាមមណ្ឌលសកម្មភាពឃោសនា នៅឃុំទាំង៤ផងដែរ៕