(ខ្សាច់កណ្តាល-ខេត្តកណ្តាល)៖ បន្ទាប់ពីបើកយុទ្ធនាការបោះឆ្នោតនៅខ្សាច់កណ្តាល ខេត្តកណ្តាល លោកបណ្ឌិត កៅ ថាច ប្រធានក្រុមការងារតំបន់៥ នៃប្រទេសញ៉ូហ្សឺឡែន នៅរសៀលថ្ងៃទី០១ ខែកក្កដា ឆ្នាំ២០២៣នេះ បានអញ្ជើញប្រារព្ធពិធីអបអរសាទរខួបទី៧២ ថ្ងៃបង្កើតគណបក្សប្រជាជនកម្ពុជា ជាមួយបងប្អូនគណកម្មការសាខាបក្សប្រចាំទីក្រុងអូក្លិន នៃប្រទេសណូវែលហ្សេឡង់។
ក្នុងឱកាសប្រារព្ធពិធីអបអរសាទរខួបទី៧២ ថ្ងៃបង្កើតគណបក្សប្រជាជនកម្ពុជា ខាងលើនេះ លោកបណ្ឌិត កៅ ថាច បានជម្រាបជូន នូវព្រឹត្តិការណ៍ថ្មីៗ និងការអភិវឌ្ឍរបស់ប្រទេស ក្រោមការដឹកនាំ របស់សម្ដេចតេជោ ហ៊ុន សែន ដែលធ្វើប្រទេសជាតិ មានការរីកចម្រើន ព្រមទាំងគ្រប់គ្រងកូវីដ-១៩ បានល្អប្រសើរ និងម្ចាស់ផ្ទះអាស៊ាន និងស៊ីហ្គេម បានជោគជ័យ លើកតម្កើនកត្ដិនាមជាតិ និងអន្ដរជាតិ។
សមាជិក-សមាជិកា ដែលចូលរួមក្នុងកម្មវិធីនេះ ក៏បានលើកឡើងអំពីការប្ដេជ្ញាចិត្ដ និងប្រកាសគាំទ្រសម្ដេចតេជោ ហ៊ុន សែន ជាបេក្ខភាពនាយករដ្ឋមន្ដ្រី អាណត្ដិទី៧ និងប្រកាសគាំទ្របណ្ឌិត ហ៊ុន ម៉ាណែត ជាបេក្ខជនបន្ដវេន ជានាយករដ្ឋមន្ដ្រី នៅថ្ងៃអនាគត។
ក្នុងពិធីនេះ មានការចូលរួមពីលោក លឹម វ៉ាន់ ប្រធានគណៈកម្មាធិការសាខាបក្សប្រចាំទីក្រុងអូក្លិន និងលោកបណ្ឌិត គឹម សន្ដិភាព ប្រធានក្រុមការងាររៀបចំអង្គការចាត់តាំង យុវជនគណបក្សប្រជាជនកម្ពុជាប្រចាំប្រទេសអូស្ដ្រាលី និងនូវ៉ែលហ្សេឡង់ និងប្រជាពលរដ្ឋខ្មែរ ដែលរស់នៅទីនោះផងដែរ។
ជាមួយគ្នានេះ ប្រជាពលរដ្ឋ និងយុវជនគណបក្សប្រជាជនកម្ពុជា រស់នៅប្រទេសញ៉ូហ្សឺឡែន ក៏បានអំពាវនាវឲ្យបងប្អូនប្រជាពលរដ្ឋអញ្ជើញទៅបោះឆ្នោតទាំងអស់គ្នា នៅថ្ងៃទី២៣ ខែកក្កដា ឆ្នាំ២០២៣ ខាងមុខនេះ ផងដែរ៕
