(ភ្នំពេញ)៖ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា នៅថ្ងៃទី៣០ ខែមិថុនា ឆ្នាំ២០២៣នេះ បន្តអំពាវនាវដល់កម្មករ-កម្មការិនី និងពលរដ្ឋទាំងអស់រួមគ្នាថែរក្សាសុខសន្តិភាព ដើម្បីធានាការអភិវឌ្ឍន៍ប្រទេស មិនត្រូវឱ្យពួកប្រតិកិរិយាបំផ្លាញសន្តិភាពនោះឡើយ ទោះក្នុងតម្លៃណាក៏ដោយ។
ការថ្លែងរបស់សម្តេចតេជោ ហ៊ុន សែន ធ្វើឡើងក្នុងឱកាសសម្តេចអញ្ជើញជួបកម្មករ និយោជិតសរុបប្រមាណជិត៧០០០នាក់ មកពីរោងចក្រ សហគ្រាសចំនួន ១០ក្នុងខេត្តពោធិ៍សាត់ នាព្រឹកថ្ងៃទី៣០ ខែមិថុនា ឆ្នាំ២០២៣នេះ។
សម្តេចតេជោ ហ៊ុន សែន បានគូសបញ្ជាក់ថា ត្រូវតែរួមគ្នាការពារសន្តិភាពឱ្យបាន ដើម្បីធានាការអភិវឌ្ឍន៍របស់ប្រទេស ព្រោះបើគ្មានសុខសន្តិភាពទេ កុំនិយាយដល់រឿងអភិវឌ្ឍន៍ និយាយរឿងតែស្លាប់ និងរឿងរបួសឱ្យហើយទៅ។
សម្តេចតេជោ មានប្រសាសន៍យ៉ាងដូច្នេះថា៖ «សំណូមពរបស់ខ្ញុំមកកាន់ទីនេះ ដែលនៅតែបន្ត នោះគឺរួមគ្នាការពារសន្តិភាព ដើម្បីធានាការអភិវឌ្ឍន៍របស់ប្រទេស មិនទុកឱ្យអនុភាពប្រតិកិរិយាណា ទោះបីជាអសិរពិសយ៉ាងណាក៏ដោយ បំផ្លាញសន្តិភាពនេះ បានទេ ទោះបីដោយតម្លៃណាក៏ដោយ អ្នកណាចង់ថាអីក៏ថាទៅ ក៏ប៉ុន្តែយើងត្រូវតែការពារនូវសន្តិភាពនេះឱ្យបាន បើការពារសន្តិភាពមិនបាន កុំនិយាយទៅដល់ការអភិវឌ្ឍន៍ និយាយពីរឿងត្រៀមស្លាប់ត្រៀមរបួស និងត្រៀមភ្លើងឆេះផ្ទះទៅ។»
សម្តេចបន្តថា ជាក់ស្តែងនៅប្រទេសម៉ាលី និងប្រទេសស៊ូដង់ដែលស្ថិតនៅអាហ្វ្រិកកណ្តាល កំពុងតែកើតមានបញ្ហាអសន្តិសុខ ហើយកម្ពុជាបានផ្តល់ថវិកាបន្ទាន់សម្រាប់កម្លាំងរបស់កម្ពុជាដែលកំពុងឈរជើងនៅទីនោះផងដែរ។
ជាមួយគ្នានេះ សម្តេចតេជោ ហ៊ុន សែន ក៏ចង់ឱ្យតាមបណ្តារោងចក្រនីមួយៗក្លាយជាសហគមន៍សុខសាន្តផងដែរ ដើម្បីជំរុញឱ្យផលិតកម្មកាន់តែរីកចម្រើន៕
