(ភ្នំពេញ)៖ ក្រុមហ៊ុន «អាយអិនជី ហូលឌីង (ING Holdings)» សង់ផ្លូវថ្មីមួយខ្សែទៀតក្នុងគម្រោងអភិវឌ្ឍន៍ទីក្រុង ING City តភ្ជាប់រវាងផ្លូវជាតិលេខ២ ទៅកាន់ផ្លូវជើងឯក ដោយកាត់បឹងទំពន់ និងបឹងជើងឯក ដើម្បីសម្រួលការធ្វើដំណើររបស់ប្រជាពលរដ្ឋ។
ពិធីបើកការដ្ឋានសាងសង់ផ្លូវដ៏មានសារៈសំខាន់មួយខ្សែនេះ ត្រូវបានធ្វើឡើងនៅថ្ងៃទី២៩ ខែមិថុនា ឆ្នាំ២០២៣នេះ ក្រោមអធិបតីភាពលោកបណ្ឌិត ហ៊ុន ម៉ាណែត តំណាងសម្តេចតេជោ ហ៊ុន សែន នាយករដ្ឋមន្ត្រីកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន។
ពិធីនេះ ក៏មានការការអញ្ជើញចូលរួមពី លោក ឃួង ស្រេង អភិបាលរាជធានីភ្នំពេញ, ឧកញ៉ា អ៉ឹង ប៊ុនហ៊ូវ ប្រធានអគ្គនាយកក្រុមហ៊ុន អាយអិនជី ហូលឌីង និងលោកស្រី ហេង សុខា ព្រមទាំងរដ្ឋបាលខណ្ឌ កងកម្លាំង មន្ត្រីរាជការ សមាគមយុវជន និងប្រជាពលរដ្ឋសរុបប្រមាណ ៣,៤០០នាក់។
ផ្លូវដែលបើកការដ្ឋានសាងសង់នាព្រឹកមិញនេះ ជាផ្លូវមេទី៣ ក្នុងគម្រោងអភិវឌ្ឍន៍ទីក្រុង ING City នៅក្នុងចំណោមបណ្តាញផ្លូវសរុបចំនួន ៦១ខ្សែក្នុងគម្រោង។ ផ្លូវមេទី១ គឺមហាវិថីសម្តេច ហ៊ុន សែន និងផ្លូវមេទី២ គឺមហាវិថីអ្នកឧកញ៉ាមហាភក្តីសប្បុរិសភោគាធិបតី ហ៊ុន នាង។
ផ្លូវ១ខ្សែនេះ ត្រូវបានរាជរដ្ឋាភិបាលប្រសិទ្ធនាមថា មហាវិថី «ឈុន គង់»។ មហាវិថី «ឈុន គង់» ជាមហាវិថីមួយខ្សែស្ថិតនៅចំកណ្ដាលទទឹង នៃតំបន់អភិវឌ្ឍន៍ទីក្រុងរណប ING City តភ្ជាប់ពីផ្លូវជាតិលេខ២ ក្នុងសង្កាត់ចាក់អង្រែក្រោម ឆ្ពោះទៅកាន់ផ្លូវជើងឯក មានប្រវែង ៤,០០០ម៉ែត្រ គិតត្រឹមព្រំប្រទល់នៃតំបន់អភិវឌ្ឍន៍ និងមានលំហផ្លូវប្រវែង ៥០ម៉ែត្រ ក្នុងនោះទំហំ ៣០ម៉ែត្រ ជាតួផ្លូវសម្រាប់យានជំនិះ និងចិញ្ចើមផ្លូវទំហំ ១០ម៉ែត្រសងខាង។
មហាវិថីមួយនេះ នឹងដើរតួនាទីយ៉ាងសំខាន់ជួយដោះស្រាយភាពកកស្ទះចរាចរណ៍ សម្រួលដល់ការដឹកជញ្ជូនទំនិញ។ ពិសេសជួយឱ្យប្រជាពលរដ្ឋចំណេញពេលវេលា និងថវិកាជាច្រើន។ល។ គួរបញ្ជាក់ថា ផ្សារទំនើបអ៉ីអនមានជ័យ (AEON) ស្ថិតនៅចំណុចប្រសព្វនៃមហាវិថីសម្តេច ហ៊ុន សែន និងមហាវិថី «ឈុន គង់» នេះ។
លោកបណ្ឌិត ហ៊ុន ម៉ាណែត បានសម្ដែងការកោតសរសើរ និងវាយតម្លៃខ្ពស់ចំពោះក្រុមហ៊ុន អាយអិនជី ហូលឌីង (ING Holdings) លើសមិទ្ធផលទាំងអស់ ដែលសម្រេចបាន។ ជាពិសេសសមិទ្ធផលនៅក្នុងវិស័យផ្លូវគមនាគមន៍ និងហេដ្ឋារចនាសម្ព័ន្ធជាច្រើន ដែលកើតជារូបរាងឡើង ក្នុងគម្រោងអភិវឌ្ឍន៍ទីក្រុងរណបតំបន់បឹងទំពន់-ជើងឯក ដោយធានា បាននូវលក្ខណៈគ្រប់ជ្រុងជ្រោយទៅតាមរបៀប និងក្បួនខ្នាតនៃការរៀបចំទីក្រុងមានស្តង់ដារទំនើប និងការរួមបញ្ចូលនូវចលនានៃទីក្រុងបៃតង និងលក្ខណៈនៃទីក្រុងវៃឆ្លាត (Smart City) ស្របតាមនិន្នាការនៃការអភិវឌ្ឍរីកចម្រើនឥតឈប់ឈរផ្នែកសកម្មភាពសង្គម-សេដ្ឋកិច្ច និងការកើនឡើងនៃចំនួនប្រជាពលរដ្ឋ ក្នុងភូមិសាស្ត្ររាជធានីភ្នំពេញ។
លោកបណ្ឌិត ហ៊ុន ម៉ាណែត បានបន្ដថា «ការលេចចេញជារូបរាង នៃសមិទ្ធផលនីមួយៗ គឺទាមទារឱ្យមានចក្ខុវិស័យ និងការរួមសហការពីគ្រប់ផ្នែក-គ្រប់ជំនាញពាក់ព័ន្ធ ហើយកត្តាសុខសន្តិភាព បានបង្កលក្ខណៈឱ្យរាជរដ្ឋាភិបាល មានលទ្ធភាពគ្រប់គ្រាន់ក្នុងការដាក់ចេញនូវគោលនយោបាយអាទិភាពទាំង ៤ គឺមនុស្ស ផ្លូវ ទឹក និងភ្លើង»។
ក្រោមទិសស្លោក «មានផ្លូវ មានស្ពាន មានសង្ឃឹម», រាជរដ្ឋាភិបាល តែងបានចាត់ទុកផ្លូវ និងស្ពាន គឺជាសរសៃឈាមសេដ្ឋកិច្ចយ៉ាងសំខាន់បំផុត ហើយក៏ជាកាតាលីករនៃជីវភាពរបស់ប្រជាពលរដ្ឋ និងសេដ្ឋកិច្ចជាតិ។
លោក អ៉ឹង ស៊ីវម៉េង តំណាងក្រុមហ៊ុន «អាយអិនជី ហូលឌីង» បានបញ្ជាក់ថា បច្ចុប្បន្នក្រុមហ៊ុនបានចាក់បំពេញដី លើកជាតួមហាវិថីសម្រេចរួចរាល់ ដោយបានប្រើប្រាស់មាឌដីសរុប ១លាន ៣សែនម៉ែត្រគូប ជាប្រភេទដីអំបិល និងកំពុងស្ថាបនាគ្រឹះសម្រេចបានប្រមាណ ៦០ភាគរយ ដោយបានប្រើប្រាស់ល្បាយថ្មមិចប្រមាណ ៨៥,១២០ម៉ែត្រគូប។
រីឯការងារក្រាលកៅស៊ូបេតុង សម្រេចបានប្រវែង ៥១៣ម៉ែត្រ។ លោកបានបញ្ជាក់ថា «ផ្អែកតាមប្រតិទិនការងារ មហាវិថីដ៏សំខាន់មួយនេះគ្រោងនឹងបញ្ចប់ជាស្ថាពរនៅដំណាច់ឆ្នាំ ២០២៤ខាងមុខ»។
នៅលើមហាវិថី «ឈុន គង់» នឹងត្រូវស្ថាបនាស្ពានបេតុងអាម៉េ ឆ្លងកាត់ចំនួន២កន្លែង មានបណ្ដោយប្រវែង ៤០ម៉ែត្រ ទទឹង២០,៨៦ម៉ែត្រ ដោយស្ពានទី១ កាត់ប្រឡាយរលួស ស្ថិតក្នុងភូមិសាស្ត្រសង្កាត់ជើងឯក ខណ្ឌដង្កោ និងស្ពានទី២ ឆ្លងកាត់ប្រឡាយស្ទឹងជ្រៅ ស្ថិតក្នុងភូមិសាស្រ្តសង្កាត់ចាក់អង្រែក្រោម ខណ្ឌមានជ័យ គឺនៅប៉ែកខាងកើតនៃមហាវិថីសម្តេច ហ៊ុន សែន។
លោក អ៉ឹង ស៊ីវម៉េង បានបញ្ជាក់ថា គម្រោងអភិវឌ្ឍន៍ទីក្រុង ING City អាចលេចចេញជារូបរាងបាន ដោយសារប្រទេសជាតិមានសន្តិភាពពេញលេញ និងការអភិវឌ្ឍលើគ្រប់វិស័យ ក្រោមការដឹកនាំប្រកបដោយភាពឈ្លាសវៃ និងប៉ិនប្រសប់បំផុតរបស់សម្តេចតេជោនាយករដ្ឋមន្ត្រី បានបង្កនូវបរិយាកាសធុរកិច្ចយ៉ាងល្អប្រសើរ ជូនដល់វិស័យឯកជន ក្នុងការរួមចំណែកកសាង និងអភិវឌ្ឍវិស័យសេដ្ឋកិច្ច-សង្គមកម្ពុជា។
ក្នុងរបាយការណ៍សាងសង់ លោកបានលើកឡើងថា ដោយបានមើលឃើញនូវសន្ទុះអភិវឌ្ឍ និងតម្រូវការចាំបាច់ពិសេសលើការស្ថាបនាហេដ្ឋារចនាសម្ព័ន្ធរូបវ័ន្តចាំបាច់ទាំងឡាយ ឱ្យមានដំណើរការរលូន។
ក្រុមហ៊ុន «អាយអិនជី ហូលឌីង (ING Holdings)» អំពាវនាវដល់ម្ចាស់ក្បាលដី និងអ្នកអភិវឌ្ឍន៍ក្នុងតំបន់ មេត្តាចូលរួម ព្រមទាំងសម្របសម្រួលដោះស្រាយ កុំតាំងទីលំនៅលើលំហដីដែលទុក សម្រាប់អនុវត្តគម្រោងស្ថាបនាផ្លូវ ជាពិសេសអ្នកវិនិយោគ និងអភិវឌ្ឍន៍ធំៗ និងសូមបន្តចូលរួមបដិភាគ ដើម្បីកិច្ចអភិវឌ្ឍន៍ក្នុងតំបន់នេះ៕
