(កណ្ដាល)៖ លោកបណ្ឌិត កៅ ថាច ប្រធានក្រុមការងារចលនាយុវជន របស់ក្រុមការងារថ្នាក់កណ្ដាល ចុះជួយស្រុកខ្សាច់កណ្ដាល នៅថ្ងៃទី២៨-២៩ ខែមិថុនា ឆ្នាំ២០២៣ បានចុះសំណេះសំណាល ជាមួយសមាជិក-សមាជិកា ក្នុងរចនាសម្ព័ន្ធយុវជនគណបក្សប្រជាជនកម្ពុជាឃុំ ភូមិ សាលារៀន និងមណ្ឌលសុខភាព ក្នុងឃុំចំនួន១០ នៃស្រុកខ្សាច់កណ្ដាល ខេត្តកណ្ដាល។
កម្មវិធីសំណេះសំណាលនាពេលនេះ គឺដើម្បីលើកទឹកចិត្តដល់សមាជិកសមាជិកាក្នុងរចនាសម្ព័ន្ធ ឲ្យមានគោលជំហរ ស្មារតីរឹងមាំ ក្នុងការបន្តគាំទ្រចំពោះគណបក្សប្រជាជនកម្ពុជា និងបន្តបំពេញភារកិច្ច ឲ្យកាន់តែសកម្មខ្លាំងក្លាថែមទៀត ចាប់ពីពេលនេះតទៅ ពិសេសក្នុងដំណាក់កាលឃោសនាបោះឆ្នោតពីថ្ងៃទី១ដល់ ថ្ងៃទី២១ ខែកក្កដា ឆ្នាំ២០២៣ ដំណាក់កាលបោះឆ្នោត និងដំណាក់កាលក្រោយបោះឆ្នោត។
ក្នុងឱកាសនោះ លោកបណ្ឌិត កៅ ថាច បានជម្រាបជូនសមាជិកសមាជិកាទាំងអស់ ឲ្យបន្តខិតខំបំពេញការងារគណបក្ស ឲ្យកាន់តែសកម្មថែមទៀត, បន្តចូលរួមធ្វើអំពើល្អ អំពើជាកុសលដូចជា ការងារសង្គម ការងារមនុស្សធម៌ និងការងារបរិស្ថាន មានជាអាទិ៍ ដាំដើមឈើ និងសម្អាតអនាម័យតាមទីសាធារណៈ ដើម្បីទាក់ទាញនូវការគាំទ្រកាន់តែច្រើនឡើង ពីសំណាក់ប្រជាជន ចំពោះគណបក្សប្រជាជនកម្ពុជា ព្រមទាំងស្នើដល់សមាជិកសមាជិកាគណបក្សទាំងអស់ ទៅចូលរួមបោះឆ្នោតនៅថ្ងៃទី២៣ ខែកក្កដា ឆ្នាំ២០២៣ ឲ្យបានគ្រប់ៗគ្នា។
លោកបណ្ឌិត ក៏បានរំលឹកជម្រាបជូនសមាជិកសមាជិកាអំពីសមិទ្ធផលធំៗ ជាប្រវត្តិសាស្រ្តរបស់គណបក្សប្រជាជនកម្ពុជា និងរាជរដ្ឋាភិបាល ក្រោមការដឹកនាំដ៏ឈ្លៀសវៃរបស់សម្តេចតេជោ ហ៊ុន សែន ដែលកសាងបាននូវសុខសន្តិភាពពេញលេញ និងការអភិវឌ្ឍប្រទេសជាតិ ឲ្យមានការរីកចម្រើនឆាប់រហ័ស។
ក្នុងរយៈពេលចុងក្រោយនេះ កម្ពុជាសម្រេចបាននូវជោគជ័យធំៗជាប្រវត្តិសាស្រ្ត ដោយទទួលបាននូវកេរ្តិ៍ឈ្មោះល្បីរន្ទឺ និងមានការទទួលស្គាល់កាន់តែច្រើនឡើងពីសំណាក់អន្តរជាតិ ពិសេសជោគជ័យនៃការគ្រប់គ្រងជំងឺកូវី ១៩ ជោគជ័យនៃការរៀបចំកិច្ចប្រជុំកំពូលអាស៊ាន និងការរៀបចំប្រកួតកីឡាស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២។
បន្ថែមលើនេះ លោកបណ្ឌិត ក៏បានរំលឹកជម្រាបជូនសមាជិកសមាជិកាអំពីបំណងប្រាថ្នា និងចក្ខុវិស័យរបស់សម្តេចតេជោនាយកដ្ឋមន្រ្តី ក្នុងការប្រែក្លាយប្រទេសកម្ពុជា ទៅជាប្រទេសមានចំណូល មធ្យមកម្រិតខ្ពស់នៅឆ្នាំ២០៣០ និងមានប្រាក់ចំណូលកម្រិតខ្ពស់នៅឆ្នាំ២០៥០ខាងមុខ ហើយដើម្បីឲ្យចក្ខុវិស័យនេះ សម្រេចបានជោគជ័យ គឺត្រូវតែចូលរួមថែរក្សាការពារនូវសុខសន្តិភាព ឲ្យបានជាដាច់ខាត។
ក្នុងឱកាសនោះដែរ លោកបណ្ឌិត ក៏បានឧបត្ថម្ភថវិកាមួយចំនួនជូនដល់គណបក្សស្រុក និងសមាជិកសមាជិកគណបក្សទាំងអស់ ដែលបានចូលរួមក្នុងកម្មវិធីផងដែរ៕
