(កំពង់ធំ)៖ លោក ជា ចាន់តូ សមាជិកគណៈអចិន្ត្រៃយ៍ គណៈកម្មាធិការកណ្តាលគណបក្សប្រជាជនកម្ពុជា និងជាប្រធានក្រុមការងារគណបក្សចុះជួយខេត្តកំពង់ធំ បានអំពាវនាវដល់សមាជិកសមាជិកា គណបក្សប្រជាជនកម្ពុជា ក្នុងស្រុកស្ទោង និងក្រុងស្ទឹងសែន ខេត្តកំពង់ធំ បន្តពង្រឹងស្មារតីសាមគ្គី និងត្រូវខិតខំប្រឹងប្រែងប្រកបដោយ ការលះបង់ខ្ពស់ ចំពោះការងារដែលជាប្រពៃណីដ៏ល្អរបស់គណបក្សនជាបន្តទៀត ព្រោះវាជាកត្តាគន្លឹះដែលធ្វើឲ្យគណបក្សទទួលបានជោគជ័យ ក្នុងការបោះឆ្នោតជ្រើសតាំងតំណាងរាស្រ្ត នីតិកាលទី៧ខាងមុខនេះ និងបន្តអនុវត្តឲ្យបានសម្រេចនូវសមិទ្ធផលថ្មីៗជាបន្តបន្ទាប់ទៀតជូនជាតិមាតុភូមិ។
ការអំពាវនាវរបស់លោក ជា ចាន់តូ ធ្វើឡើងក្នុងឱកាសអញ្ជើញចុះជួបសំណាល ជាមួយសមាជិក សមាជិកាគណបក្សប្រជាជនកម្ពុជា ក្នុងស្រុកស្ទោង និងក្រុងស្ទឹងសែន ខេត្តកំពង់ធំ នៅថ្ងៃទី២៨ខែមីថុនាឆ្នាំ២០២៣។
លោក ជា ចាន់តូ បានថ្លែងថា ចំពោះមុខត្រូវបន្ថែរក្សា ការពារសន្តិភាព ការពារឯករាជ្យ អធិបតេយ្យ បូរណភាពទឹកដី និងការពាររាល់សមិទ្ធផលនៃសង្គមជាតិឲ្យបានគង់វង្សស្ថិតស្ថិរ ហើយអំឡុងពេលឃោសនាបោះឆ្នោត ត្រូវតែប្រើប្រាស់ទិសស្លោកថា «រួមគ្នារក្សាសន្តិភាពឱ្យខានតែបាន» ឲ្យបានជាប់ដើម្បីបំផុសស្មារតីប្រជាជនមើលឃើញពីតម្លៃពិតនៃសន្តិភាព។
ជាមួយនេះត្រូវបង្ហាញឲ្យឃើញពីស្ថានភាពនយោបាយទូទៅ និងសមិទ្ធផលរបសរាជរដ្ឋាភិបាល សម្រេចបាននៅក្នុងអាណត្តិទី៦ ពិសេសជោគជ័យយ៉ាងត្រចះត្រចង់ និងជាប្រវត្តិសាស្ត្រក្នុងតួនាទីជាប្រធានប្តូរវេន អាស៊ានឆ្នាំ២០២២ និងការរៀបចំប្រកបដោយជោគជ័យ និងជាទីមោទនភាពជាតិ នៅព្រឹត្តិការណ៍កីឡាស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ ដែលបានបញ្ចប់កាលពីពេលថ្មីៗនេះ ឲ្យប្រជាជនយល់ដឹង នោះទើបការបោះឆ្នោតជ្រើសតាំងតំណាងរាស្រ្តនីតិកាលទី៧ នៅថ្ងៃទី២៣ ខែកក្កដា ឆ្នាំ២០២៣ ទទួលបានជោគជ័យ។
លោក ជា ចាន់តូ បានក្រើនរំលឹកដល់សមាជិកសមាជិកា គណបក្សប្រជាជនកម្ពុជា ខេត្តកំពង់ធំ ត្រូវបន្តកសាងកម្លាំង និងពង្រឹងសាមគ្គីផ្ទៃក្នុងតាំងពីថ្នាក់លើ ដល់ថ្នាក់ក្រោម និងបន្តកសាងធនធានមនុស្ស ប្រកបដោយចំណេះដឹង និងគុណធម៌ ពិសេសយុវជនជាអ្នកបន្តវេនជំនាន់ក្រោយ៕
