(កំពង់ធំ)៖ លោកស្រី ឃួន ឃុនឌី សមាជិកព្រឹទ្ធសភា លោក សួស យ៉ារ៉ា ប្រធានគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាន នៃរដ្ឋសភា និង លោក អ៊ុក វណ្ណរ៉ា អភិបាលស្រុកស្រុកកំពង់ស្វាយ បានអញ្ជើញសមាគមប្រឹក្សាសុខភាពប្រជាជន ចុះទៅពិនិត្យ និងព្យាបាលជំងឺ ជូនប្រជាជន នៅក្នុងឃុំផាត់សណ្តាយ ស្រុកកំពង់ស្វាយ ខេត្តកំពង់ធំ។ កម្មវិធីនេះ បានធ្វើឡើងនាព្រឹក ថ្ងៃទី២៧ ខែមិថុនា ឆ្នាំ២០២៣។
លោក ឡេង សុខ មេឃុំផាត់សណ្តាយ រួមទាំងមេភូមិ បានចូលរួមសហការធ្វើការសម្របសម្រួល និងអំពាវនាវឱ្យប្រជាជនមកចូលរួមពិនិត្យ និងព្យាបាលជំងឺ។ សមាគមប្រឹក្សាសុខភាពប្រជាជន ដឹកនាំដោយ លោកវេជ្ជបណ្ឌិត ហ៊ាន សុខនាង ប្រធានសមាគមប្រឹក្សាសុខភាពប្រជាជន លោកវេជ្ជបណ្ឌិតព្រហ្ម ប៉ូលីម អនុប្រធានសមាគម និង លោកវេជ្ជបណ្ឌិត ឃុន វេហាស៍ អគ្គលេខាធិការសមាគម រួមជាមួយក្រុមគ្រូពេទ្យចំនួន ១៧ រូប បានចុះទៅពិនិត្យសុខភាព និងព្យាបាល ជូនប្រជាជនបានប្រមាណ ៤០០នាក់ ដោយឥតគិតថ្លៃ ក្នុងនោះដែរ ជំងឺដែលកត់សំគាល់ឃើញជាទូទៅ រួមមាន៖ ជំងឺសើរស្បែក ជំងឺរាក ជំងឺរលាកសួត ជំងឺលើសសំពាធឈាម ជំងឺទឹកនោមផ្អែម ជំងឺក្រពះពោះវៀន និងរោគស្ត្រី។
ក្រុមគ្រូពេទ្យ ក៏សង្កេតឃើញផងដែរថា ប្រជាជន នៅទីនោះ ភាគច្រើនមានបញ្ហាសុខភាពមាត់ធ្មេញជាច្រើន ដូច្នេះក្រុមគ្រូពេទ្យនឹងរៀបចំការព្យាបាលធ្មេញ និងណែនាំពីវិធានការបង្កាជំងឺនិងថែទាំធ្មេញ នៅពេលចុះទៅព្យាបាល នាពេលក្រោយៗ។
ក្រុមគ្រូពេទ្យនៃសមាគមប្រឹក្សាសុខភាពប្រជាជន បាននាំយកអំណោយជាអនុស្សាវរីយ៍ ជូនប្រជាជនដែលមកពិនិត្យ និងព្យាបាលជំងឺ ក្នុងម្នាក់ៗ ទទួលបានក្រម៉ាមួយ និងមួកមួយផងដែរ៕
