(អារ៉ាប់)៖ យន្តហោះដំណើរការដោយថាមពលព្រះអាទិត្យដែលមានឈ្មោះថា Solar Impulse 2 បានចុះចត​នោ​ក្នុងទីក្រុង Abu Dhabi ប្រទេសអេមីរ៉ាត់ អារ៉ាប់រួម នៅព្រឹកថ្ងៃអង្គារនេះ បន្ទាប់ពី​បានធ្វើដំណើរកម្សាន្ត​ជុំវិញពិភពលោក។ នេះបើយោងតាមការចេញ​ផ្សាយ​របស់សារព័ត៌មាន BBC នៅថ្ងៃទី២៦ ខែ​កក្កដា។

វាជា​ប្រវត្តិសាស្ត្រ ដែល​យន្តហោះប្រើថាមពលព្រះអាទិត្យមួយនេះ បានធ្វើដំណើរការ​កម្សាន្តជុំវិញពិភពលោក ជាពិសេសគឺបាន​ហោះឆ្លងមហាសមុទ្រប៉ាស៊ីហ្វិក និង​អាត្លង់ទិក ដោយបានចំណាយពេល ២៣ថ្ងៃ នៅលើ​លំហ​អាកាស។

លោក Piccard ជា Cockpit បានថ្លែងឲ្យដឹងនៅមុនពេលចុះចតបានថា លោកមានអារម្មណ៍រំភើបខ្លាំង​ណាស់ ដោយបានបញ្ចប់ដំណើរកម្សាន្តមួយនេះ «ខ្ញុំ ពិតជាសប្បាយ...សប្បាយរីករាយខ្លាំងណាស់។ ខ្ញុំបាន​ចំណាយពេល ១៥ឆ្នាំ​ ដើម្បីធ្វើការងារជាមួយគម្រោងមួយនេះ»។

គួរបញ្ជាក់ផងដែរថា Solar Impulse 1 បានចាប់ផ្ដើមធ្វើការសាកល្បងហោះហើរដំបូងនៅឆ្នាំ២០០៩ ហើយ​នៅ​ឆ្នាំ២០១២ បានចាប់ផ្ដើមហោះហើរជាផ្លូវការ ដោយបានចេញដំណើរពីប្រទេសស្វីស ទៅកាន់ប្រទេសអេស្ប៉ាញ និងបានបន្តដំណើរទៅកាន់ប្រទេសម៉ូរ៉ូកូ។ នៅឆ្នាំ ២០១៤ Solar Impulse 2 បាន​បន្តបេសកម្ម ហើយបានបញ្ចប់វានៅក្នុងទីក្រុង Abu Dhabi ប្រទេសអេមីរ៉ាត់ អារ៉ាប់រួម៕