(ភ្នំពេញ)៖ គ្រឿងញៀនជាច្រើនប្រភេទ ដែលមានទម្ងន់រហូតដល់ជាង៥តោន ត្រូវបានដុតបំផ្លាញចោល ក្រោយពីបង្ក្រាប និងរឹបអូសបាននៅក្នុងរាជធានីភ្នំពេញ នាពេលកន្លងមកនេះ។
ពិធីនេះបានធ្វើឡើងនាព្រឹកថៃ្ងទី២៨ ខែមិថុនា ឆាំ២០២៣នេះ ក្នុងពិធីអបអរសាទរទិវាអន្តរជាតិ ប្រយុទ្ធប្រឆាំងគ្រឿងញៀនថ្ងៃទី២៦ ខែមិថុនា ឆ្នាំ២០២៣ ក្រោមប្រធានបទ «អ្វីៗដើម្បីប្រជាជនជាចម្បង បញ្ឈប់ការរើសអើង និងមាក់ងាយអ្នកញៀនគ្រឿងញៀន ពង្រឹងការងារអប់រំបង្ការ» ក្រោមអធិបតីភាព សម្ដេចក្រឡាហោម ស ខេង ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ និងមានការចូលរួមពីអាជ្ញាធរ កងកម្លាំង ប្រជាពលរដ្ឋ និងយុវជន ប្រមាណជាង៣០០០នាក់ នៅនៅមជ្ឈមណ្ឌលសន្និបាត និងពិព័រណ៍កោះពេជ្រ ។
សម្ដេចក្រឡាហោម ស ខេង បានលើកឡើងថា ក្នុងរយៈពេល៥ខែ ដើមឆ្នាំ២០២៣នេះ កម្លាំងមានសមត្ថកិច្ចរបស់យើង បង្ក្រាបគ្រឿងញៀនបានចំនួន៣១៤៣ករណី និងឃាត់ខ្លួនជនសង្ស័យ បានចំនួន៧៤៨០នាក់ ជាមួយនឹងការរឹបអូសគ្រឿងញៀនបានចំនួន៨៣៨គីឡូក្រាម ៧៧២,៦ក្រាម។
ពាក់ព័ន្ធនឹងគ្រឿងញៀននេះ គ្រាន់តែនៅរាជធានីភ្នំពេញ កម្លាំងមានសមត្ថកិច្ចយើង បង្ក្រាបបានជាង៥តោនកន្លះ ដែលយើងត្រូវដុតបំផ្លាញចោលពេលនេះ ។ ប៉ុន្តែក្នុងចំនួននេះ មិនបានគិតពីសារធាតុគីមីផ្សេងៗ ដែលយើងត្រូវបន្សាប និងរំលាយចោលនៅពេលក្រោយនោះទេ។
សម្ដេចក្រឡាហោម ស ខេង ក៏បានបញ្ជាក់ផងដែរថា ករណីគ្រឿងញៀននេះ នៅតែកើនឡើងជាលំដាប់ដែលទាមទារឲ្យអាជ្ញាធរ កងកម្លាំងមានសមត្ថកិច្ចទាំងអស់ត្រូវតែមានឆន្ទៈខ្ពស់ ក្នុងការបង្ក្រាប់ ព្រោះថា វាជាគ្រោះថ្នាក់ដ៏ធ្ងន់ធ្ងរ សម្រាប់ប្រជាពលរដ្ឋរបស់យើង ពិសេសស្រទាប់យុវវ័យ ដែលជាទំពាំងស្នងឬស្សីរបស់ជាតិ។
លោក ហ៊ុន សុរិទ្ធី អភិបាលរងរាជធានីភ្នំពេញ តំណាងអោយលោក ឃួង ស្រេង អភិបាលរាជធានីភ្នំពេញ បានលើកឡើងថា ក្នុងឆ្នាំ២០២២កន្លងមកនេះ គណៈកម្មាធិការត្រួតពិនិត្យគ្រឿងញៀនរាជធានីភ្នំពេញ បានបង្ក្រាបបទ ល្មើសគ្រឿងញៀន ចំនួន ៩៧៨ករណី ឃាត់ខ្លួនជនសង្ស័យចំនួន ១.៨៥៧នាក់ (នារី ១៧៨នាក់) ពាក់ព័ន្ធបទល្មើសដូចជា ជួញដូរ និងរក្សាទុក គ្រឿងញៀន, ដឹកជញ្ជូន និងរក្សាទុកគ្រឿងញៀន, ចាត់ចែង-សម្រួល ឲ្យប្រើប្រាស់គ្រឿងញៀន, បើកបរក្រោម ឥទ្ធិពលគ្រឿងញៀន និងករណីប្រើប្រាស់គ្រឿងញៀន ជាដើម។
ដោយឡែក ចំពោះការងារអប់រំកែប្រែ និងស្តារនីតិសម្បទា គណៈកម្មាធិការបានយកចិត្តទុកដាក់បញ្ចូនជនរងគ្រោះ ដោយសារគ្រឿងញៀនទាំងដើមគ្រា និងក្នុងគ្រា បញ្ចូនទៅមជ្ឈមណ្ឌលឱកាសខ្ញុំ សរុបចំនួន ៧.១៧៦នាក់ (នារី ៣៥២នាក់) បញ្ចូនទៅព្យាបាលនៅតាមសហគមន៍ ចំនួន ៧នាក់ (នារី ១នាក់) និងបានធ្វើសមាហរណកម្មជនរងគ្រោះ ដែលបានទទួលការព្យាបាលរួច ឲ្យចូលទៅរស់នៅក្នុងសហគមន៍វិញ ចំនួន ៥.២៩០នាក់ (នារី ២៧៩នាក់) ផងដែរ។
លោកបន្តថា ការជួបជុំគ្នាប្រារព្ធទិវាអន្តរជាតិ ប្រយុទ្ធប្រឆាំងគ្រឿងញៀន ក្នុងថ្ងៃនេះ ធ្វើឡើងក្នុងគោលបំណងដាស់តឿន ក្រើនរំលឹក និងផ្សព្វផ្សាយដល់ប្រជាពលរដ្ឋទូទៅ ជាពិសេសក្មួយៗយុវជនយើង ឲ្យយល់ដឹងច្បាស់ពីគ្រោះថ្នាក់ និងផលប៉ះពាល់យ៉ាងធ្ងន់ធ្ងរ បង្កឡើងដោយគ្រឿងញៀន ហើយក៏ជាសារព្រមានដល់ក្រុមឧក្រិដ្ឋជនទាំងឡាយ ឲ្យបញ្ឈប់ជាបន្ទាន់នូវរាល់ សកម្មភាពល្មើស ច្បាប់ពាក់ព័ន្ធបញ្ហាគ្រឿងញៀន និងឧក្រិដ្ឋកម្មឆ្លងដែន ព្រោះថារាជរដ្ឋាភិបាលកម្ពុជា ក៏ដូចជាអាជ្ញាធរ គ្រប់ជាន់ថ្នាក់ មានឆន្ទៈយ៉ាងមោះមុតក្នុងប្រយុទ្ធប្រឆាំងគ្រឿងញៀនខុសច្បាប់ និងប្តេជ្ញាបង្ក្រាបឲ្យខានតែបាន ដោយគ្មានការលើកលែងណាមួយឡើយ៕
