(កណ្ដាល)៖ រសៀលថ្ងៃទី២៥ ខែមិថុនា ឆ្នាំ២០២៣ លោក ហាក់ សុខមករា អភិបាលរងខេត្តកណ្ដាល តំណាងលោក គង់ សោភ័ណ្ឌ អភិបាលខេត្តកណ្តាល បានអញ្ជើញជាអធិបតីភាពក្នុងពិធីបុណ្យផ្កាប្រាក់មហាសាមគ្គី កសាងសាកលវិទ្យាល័យសម្តេចព្រះមហាសង្ឃរាជ បួរ គ្រី នៅវត្តព្រះឥន្ទសាមគ្គីធម៌ ឃុំក្រាំងម្កាក់ ស្រុកអង្គស្នួល ខេត្តកណ្ដាល។

នៅក្នុងឱកាសនោះលោក ហាក់ សុខមករា បានលើកឡើងថា ការប្រារព្ធពិធីបុណ្យផ្កាប្រាក់មហាសាមគ្គី កសាងសាកលវិទ្យាល័យ សម្តេចព្រះមហាសង្ឃរាជ បួរ គ្រី នាពេលនេះ គឺបានសបញ្ចាក់ឲ្យឃើញពី ការផ្សារភ្ជាប់យ៉ាងរឹងមាំ រវាងវិស័យអាណាចក្រ និងពុទ្ធចក្រ ព្រោះថាសាកលវិទ្យាល័យនេះ ផ្តួចផ្តើមបង្កើតឡើងក្រោមព្រះរាជតម្រិះដ៏ខ្ពង់ខ្ពស់បំផុតរបស់សម្តេចព្រះអភិសិរីសុគន្ធាមហាសង្ឃរាជាធិបតី កិត្តិឧទ្ទេសបណ្ឌិត បួរ គ្រី សម្តេចព្រះមហាសង្ឃរាជ នៃគណៈធម្មយុត្តិកនិកាយ នៃព្រះរាជាណាចក្រកម្ពុជា និងមានសម្ដេច ព្រះមង្គលទេពាចារ្យ វង្ស អានតា សម្តេចព្រះសង្ឃនាយករង នៃគណៈធម្មយុត្តិកនិកាយ នៃព្រះរាជាណាចក្រកម្ពុជា ព្រះមេគណគណៈធម្មយុត្តិកនិកាយ ខេត្តកណ្តាល ជាព្រះសាកលវិទ្យាធិការ ប៉ុន្តែកម្មវិធីសិក្សា គឺអនុវត្តដូចនឹងគ្រឹះស្ថានឧត្តមសិក្សាទូទៅ ស្ថិតក្រោមការគ្រប់គ្រងរបស់ក្រសួងអប់រំ យុវជន និងកីឡា។

លោកអភិបាលរងខេត្តកណ្ដាល បានបញ្ជាក់បន្ថែមថា សាកលវិទ្យាល័យនេះ មានមហាវិទ្យាល័យចំនួន០៥ រួមមាន៖

*ទី១៖ មហាវិទ្យាល័យសិល្បៈ មនុស្សសាស្ត្រ និងភាសា
*ទី២៖ មហាវិទ្យាល័យវិទ្យាសាស្ត្រ និងបច្ចេកវិទ្យា
*ទី៣៖ មហាវិទ្យាល័យ វិទ្យាសាស្ត្រសង្គម
*ទី៤៖ មហាវិទ្យាល័យវិស្វកម្ម និងស្ថាបត្យកម្ម
*ទី៥៖ មហាវិទ្យាល័យសិក្សាអភិវឌ្ឍ និងទេសចរណ៍ ដែលមានមុខជំនាញសរុប ២០ជំនាញ។

សាកលវិទ្យាល័យបានបើកបវេសនកាល ឆ្នាំសិក្សាថ្មី២០២២-២០២៣ ជំនាន់ទី១ កាលពីថ្ងៃអាទិត្យ ទី៥ ខែកុម្ភៈ ឆ្នាំ២០២៣ ដែលមានសមណនិស្សិត និស្សិត កំពុងសិក្សាចំនួន ៦០០នាក់ ស្រី៣ ៣២នាក់, មានសាស្ត្រាចារ្យ បង្រៀន ចំនួន ២៣អង្គ-នាក់ ស្រី ០៣នាក់ និងមានថ្នាក់ដឹកនាំ គណៈគ្រប់គ្រង បុគ្គលិកសរុបចំនួន ៩៧អង្គ-នាក់ ស្រី ១៦នាក់។

លោកបន្ថែមទៀតថា «ក្រោមម្លប់ដ៏ត្រជាក់នៃសន្តិភាព ក្រោមការដឹកនាំដ៏ឈ្លាសវៃ និងប៉ិនប្រសប់ប្រកបដោយគតិបណ្ឌិត និងចក្ខុវិស័យវែងឆ្ងាយរបស់សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា ជាអគ្គមហារដ្ឋបុរសដ៏ឆ្នើម និងជាស្ថាបនិកមគ្គុទេសន៍ឯក ប្រតិបត្តិករ នយោបាយឈ្នះ-ឈ្នះ ដោយបានផ្តើមចេញពីការយកអាយុជីវិត សាច់ស្រស់ ឈាមស្រស់ ធ្វើជាដើមទុន ដើម្បីសង្គ្រោះអាយុជីវិតរបស់ប្រជាពលរដ្ឋ រាប់លាននាក់យ៉ាងអង់ អាចក្លាហានពីរបប ប៉ុល ពត និងបានដាក់ចេញគោលនយោបាយស្ដារសេដ្ឋកិច្ច-សង្គម ពីកំទេចផេះផង់ឈានទៅរកការរីកចម្រើន នូវផ្នែកសេដ្ឋកិច្ច នាំមកនូវការអភិវឌ្ឍឥតឈប់ឈរ ដោយបានប្រែក្លាយប្រទេសកម្ពុជា ពីប្រទេស ដែលធ្លាប់ត្រូវបានគេស្គាល់ថា ជាប្រទេសហែកហួរដោយសារសង្គ្រាមស៊ីវិល គ្រាប់មីន អសន្តិសុខ និងក្រីក្រ មកជាប្រទេសមានសន្តិភាពបរិបូរណ៍, ប្រែក្លាយដីចម្ការមីន ទៅជាដីមាស តាមរយៈការ អភិវឌ្ឍយ៉ាងឆាប់រហ័សលើ គ្រប់វិស័យ ទាំងអាណាចក្រ និងពុទ្ធចក្រ ជាពិសេសការរក្សាបាននូវ ស្ថិរភាពនយោបាយ មានសន្តិភាពពិតប្រាកដ ធ្វើឱ្យប្រជាពលរដ្ឋរស់នៅដោយភាពសុខសាន្ត ដែល មិនធ្លាប់មានក្នុងរយៈពេលជាង ៥០០ឆ្នាំ ចុងក្រោយនៃប្រវត្តិសាស្ត្រកម្ពុជា»៕