(កំពង់ធំ)៖ លោក ស៊ាន បូរ៉ាត សមាជិកគណៈកម្មាធិការកណ្តាលគណបក្សប្រជាជនកម្ពុជា និងជាអនុប្រធានយុវជនគណបក្សប្រជាជនកម្ពុជាថ្នាក់កណ្ដាល តំណាងបណ្ឌិត ហ៊ុន ម៉ាណែត សមាជិកគណៈអចិន្ត្រៃយ៍គណៈកម្មាធិការកណ្តាលគណបក្សប្រជាជនកម្ពុជា និងជាប្រធានយុវជនគណបក្សប្រជាជនកម្ពុជាថ្នាក់កណ្តាល នាថ្ងៃទី២៥ ខែមិថុនា ឆ្នាំ២០២៣ បានប្រកាសបញ្ចូលសមាជិកសមាជិកាគណបក្សប្រជាជនកម្ពុជា១,៥៩៥នាក់ មកពីបណ្ដាឃុំចំនួន១២ នៅស្នាក់ការគណបក្សប្រជាជនកម្ពុជាស្រុកស្ទោង ខេត្តកំពង់ធំ។
លោក សុក ហៃ សមាជិកគណៈអចិន្រ្តៃយ៍នៃគណកម្មាធិការគណបក្សប្រជាជនកម្ពុជាខេត្តកំពង់ធំ បានអំពាវនាវដល់អាជ្ញាធរមូលដ្ឋាភូមិ/ឃុំ ដែលជាអ្នកនៅស្និទ្ធស្នាលរួមរស់រួមសុខរួមទុក្ខផ្ទាល់ជាមួយប្រជាពលរដ្ឋ និងក្រុមការងារគណបក្ស ត្រូវធ្វើអំពើល្អកុំឱ្យមានការរើសអើងណាមួយ ជាមួយនឹងប្រជាពលរដ្ឋរបស់ខ្លួន នោះយើងនឹងទទួលបាននូវការគាំទ្រជាសារវ័ន្តយ៉ាងពិតប្រាកដចេញពីបេះដូងរបស់ប្រជាពលរដ្ឋ។
លោក ស៊ាន បូរ៉ាត បានកោតសរសើរខ្ពស់ដល់ក្រុមការងារគណបក្សគ្រប់មូលដ្ឋាន ដែលបានខិតខំធ្វើសកម្មភាពគ្រប់បែបយ៉ាងក្នុងការចុះជួបផ្ទាល់ជាមួយបងប្អូនប្រជាពលរដ្ឋ ក៏ដូចជាការស្វែងយល់នូវសុខសុខទុក្ខ សុខុមាលភាពរបស់ពួកគាត់ និងការចុះជួយបានទាន់ពេលវេលា ជាពិសេសការខិតខំកសាងសមាជិកសមាជិកាគណបក្សថ្មីៗថែមទៀត។
លោកបានថ្លែងអំណរគុណយ៉ាងជ្រាលជ្រៅដល់សម្ដេចតេជោ ហ៊ុន សែន ប្រមុខរាជរដ្ឋាភិបាលកម្ពុជា និងក្រុមការងារគណបក្ស ក៏ដូចជាអាជ្ញាធរមូលដ្ឋានដែលបានជួយសង្គ្រោះស្រុកស្ទោងកន្លងមក នៅក្នុងពេលដែលរងគ្រោះដោយសារទឹកជំនន់កាលពីចុងឆ្នាំ២០២២ បានទាន់ពេលវេលាក៏ដូចជាការកាត់ឆ្វៀលដីជូនបងប្អូនប្រជាពលរដ្ឋពីតំបន់៣ មកតំបន់២ និងពីតំបន់២ មកតំបន់១ ដើម្បីជូនបងប្អូនប្រជាពលរដ្ឋរស់នៅ អាស្រ័យផលនិងក្លាយជាម្ចាស់កម្មសិទ្ធិពេញលេញ ក៏ដូចជាការជួយលើកកម្ពស់សេដ្ឋកិច្ចគ្រួសារបានមួយកម្រិតផងដែរ។
បណ្ឌិត ស៊ាន បូរ៉ាត ក៏បានថ្លែងអំណរគុណដល់សមាជិកសមាជិកាដែលបានផ្ដាច់ខ្លួនពីក្រុមគណបក្សផ្សេងៗ មករួមរស់ជីវភាពជាមួយនឹងគណបក្សប្រជាជនកម្ពុជា ដែលស្ដែងឱ្យឃើញពីការគាំទ្រ និងគុណតម្លៃគណបក្សប្រជាជនកម្ពុជា ដែលតែងតែយកចិត្តទុកដាក់រួមរស់ជាមួយបងប្អូនប្រជាពលរដ្ឋគ្រប់កាលៈទេសៈ និងដឹកនាំថែរក្សាសុខសន្តិភាពក៏ដូចជានាំឱ្យប្រទេសជាតិមានការអភិវឌ្ឍជាលំដាប់ផងដែរ។
គណៈអធិបតីបានអំពាវនាវដល់ប្រជាពលរដ្ឋ សមាជិកាគណបក្សទាំងអស់ទៅបោះឆ្នោតជូនគណបក្សគណបក្សប្រជាជនកម្ពុជា ដែលមានលេខរៀងទី១៨ នៅលើសន្លឹកឆ្នោតនៅថ្ងៃទី២៣ ខែកក្កដា ឆ្នាំ២០២៣ ខាងមុខនេះឲ្យបានគ្រប់ៗគ្នា។សមាជិកសមាជិកាដែលបានប្រកាសបញ្ចូលនៅក្នុងឱកាសនេះមាន១,៥៩៥នាក់ ក្នុងនោះមានសមាជិកសមាជិកាដែលបានអញ្ជើញមកពីគណបក្សភ្លើងទាន៣៤៨នាក់ផងដែរ៕
